ଭୁବନେଶ୍ୱର: ବିକାଶ ନାଁରେ ଅନେକ ନାରାବାଜି ଶୁଣିଛୁ, ଆଉ ଅପେକ୍ଷା କରିଲୁଣି ମଧ୍ୟ, ଧୈର୍ଯ୍ୟର ଗୋଟିଏ ସୀମା ରେଖି ଅଛି ତାହା ଏବେ ଆଉ ନାହିଁ। ଏପରି କିଛି କହି ଭୁବନେଶ୍ୱରର ଅଞ୍ଚଳର ପଳାଶୁଣି ବାସିନ୍ଦାମାନେ ନିଜ ଉଦ୍ୟମରେ ଏକ ୧୦୦ କୋଟି ଟଙ୍କା ମୂଲ୍ୟର ଆବର୍ଜନା ପ୍ରକ୍ରିୟାକରଣ କାରଖାନାର ଉଦ୍ଘାଟନ କରିଛନ୍ତି। ଏହି ବିଶାଳ ପ୍ରକଳ୍ପ ଗତ ଆଠ ମାସ ପୂର୍ବେ ନିର୍ମାଣ ଶେଷ ହୋଇଥିଲା କିନ୍ତୁ ଭୁବନେଶ୍ୱର ମହାନଗର ନିଗମ (ବିଏମ୍ସି)ର ନିଷ୍କ୍ରିୟତା ଯୋଗୁଁ ଏହା କାର୍ଯ୍ୟକ୍ଷମ ହୋଇପାରି ନଥିଲା। ଏହି ଅବହେଳା ଓ ଉଦାସୀନତା ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଥିଲା। ଫଳସ୍ୱରୂପ, ରବିବାର ଦିନ ଶହ ଶହ ବାସିନ୍ଦା ଏକତ୍ରିତ ହୋଇ ଏହି କାରଖାନାର ପ୍ରତୀକାତ୍ମକ ଉଦ୍ଘାଟନ କରିଛନ୍ତି।
ପଳାଶୁଣିର ଶହ ଶହ ବାସିନ୍ଦା, ‘ଅଳିଆଗାଦା ହଟାଓ ଓ ସୈନିକ ସ୍କୁଲ ବଞ୍ଚାଓ ଅଭିଯାନ’ ସଂଗଠନ ସହିତ ମିଶି, ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ସେମାନେ ପାରମ୍ପରିକ ରୀତିରେ ନଡ଼ିଆ ଭାଙ୍ଗି ଓ ଫିତା କାଟି କାରଖାନାର ଆନୁଷ୍ଠାନିକ ଶୁଭାରମ୍ଭ କରିଛନ୍ତି। ଏହି ଅବସରରେ ସ୍ଥାନୀୟ ଲୋକେ ବିଏମ୍ସି କର୍ତ୍ତୃପକ୍ଷଙ୍କୁ ଚେତାବନୀ ଦେଇ କହିଛନ୍ତି ଯେ, ଯଦି ଗାଡ଼କଣା ଡମ୍ପିଂ ୟାର୍ଡରୁ ଆବର୍ଜନା ଏହି ନୂଆ କାରଖାନାକୁ ସ୍ଥାନାନ୍ତର ନ କରାଯାଏ, ତେବେ ଆଗାମୀ ଦିନରେ ସେମାନେ ଆନ୍ଦୋଳନକୁ ଆହୁରି ଜୋରଦାର କରିବେ।
ଏହି ପ୍ରକଳ୍ପର ନିର୍ମାଣ କାର୍ଯ୍ୟ ଗତ ଆଠ ମାସ ତଳେ ଶେଷ ହୋଇଥିଲେ ମଧ୍ୟ, ଆନୁଷ୍ଠାନିକ ଉଦ୍ଘାଟନ ହୋଇନଥିଲା। ତେଣୁ ଏହା ଅଚଳ ରହିଛି। ସ୍ଥାନୀୟ ଲୋକେ ବାରମ୍ବାର ବିଭାଗୀୟ ମନ୍ତ୍ରୀ, ମେୟର ଓ ବିଏମ୍ସି କମିଶନରଙ୍କୁ ଏହି ସମସ୍ୟା ସମ୍ପର୍କରେ ଅବଗତ କରାଇଥିଲେ, କିନ୍ତୁ କୌଣସି ପଦକ୍ଷେପ ଗ୍ରହଣ କରାଯାଇ ନଥିଲା। ତେଣୁ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ବଢ଼ାଇଛି।
ଗଡ଼କଣା ଡମ୍ପିଂ ୟାର୍ଡରୁ ନିର୍ଗତ ଦୁର୍ଗନ୍ଧ ସୈନିକ ସ୍କୁଲ, ପଟିଆ, ଡମଣା ଗାଁ, ଆଦିମାତା କଲୋନୀ, ହାଉସିଂ ବୋର୍ଡ କଲୋନୀ, କେନ୍ଦ୍ରୀୟ ବିଦ୍ୟାଳୟ ଓ ରେଳ କଲୋନୀ ଆଦି ଅଞ୍ଚଳର ବାସିନ୍ଦାଙ୍କ ପାଇଁ ଦୀର୍ଘ ଦିନ ଧରି ଅସୁବିଧାର କାରଣ ହୋଇଛି। ଏହି ସମସ୍ୟାର ସମାଧାନ ପାଇଁ ନୂଆ କାରଖାନାଟି ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ ବୋଲି ବାସିନ୍ଦାମାନେ ଆଶା ରଖିଛନ୍ତି।
ସ୍ଥାନୀୟ ଲୋକଙ୍କ ଏହି ଉଦ୍ୟମ ସତ୍ୱେ, ବିଏମ୍ସି ମେୟର କିମ୍ବା କମିଶନରଙ୍କ ତରଫରୁ ଏ ପର୍ଯ୍ୟନ୍ତ କୌଣସି ଆନୁଷ୍ଠାନିକ ପ୍ରତିକ୍ରିୟା ମିଳି ନାହିଁ। ଏହି ଘଟଣା ସମ୍ପର୍କରେ କର୍ତ୍ତୃପକ୍ଷଙ୍କ ମୌନତା ସ୍ଥାନୀୟ ଲୋକଙ୍କ ଅସନ୍ତୋଷକୁ ଆହୁରି ବଢ଼ାଇଛି।
“ଏହି ଉଦ୍ଘାଟନରେ କୌଣସି ରାଜନେତା କିମ୍ବା ମନ୍ତ୍ରୀ ସାମିଲ ହୋଇ ନଥିଲେ। ସାଧାରଣ ଲୋକେ ନିଜ ସୁବିଧା ପାଇଁ ଏହି ପଦକ୍ଷେପ ନେଇଛନ୍ତି। ଦୀର୍ଘ ଦିନ ଧରି ଆମର ଅନୁରୋଧ ଶୁଣା ଯାଉ ନଥିଲା,” ଜଣେ ମହିଳା ବାସିନ୍ଦା କହିଛନ୍ତି।
ଭୁବନେଶ୍ୱର ଉନ୍ନୟନ ପରିଷଦର ସଭାପତି ବାସୁଦେବ ଭଟ୍ଟ କହିଛନ୍ତି, “ଏହି ଶୁଷ୍କ ଆବର୍ଜନା ପ୍ରକ୍ରିୟାକରଣ କାରଖାନା ଦୈନିକ ୧୫୦ ମେଟ୍ରିକ ଟନ ଆବର୍ଜନା ପରିଚାଳନା କରିବାର କ୍ଷମତା ରଖିଛି। ଆଠ ମାସ ପୂର୍ବେ ନିର୍ମାଣ ଶେଷ ହୋଇଥିଲେ ମଧ୍ୟ, କର୍ତ୍ତୃପକ୍ଷ ଏହାର ଉଦ୍ଘାଟନ ପାଇଁ କୌଣସି ପଦକ୍ଷେପ ନେଇ ନାହାନ୍ତି। ଯଦି ସୈନିକ ସ୍କୁଲ ଡମ୍ପିଂ ୟାର୍ଡରୁ ଆବର୍ଜନା ଏହି କାରଖାନାକୁ ସ୍ଥାନାନ୍ତର ନ ହୁଏ, ତେବେ ଶହ ଶହ ବାସିନ୍ଦା ଡମ୍ପିଂ ୟାର୍ଡ ସମ୍ମୁଖରେ ଧାରଣା ଦେବେ ଓ କୌଣସି ଟ୍ରକକୁ ଭିତରକୁ ପ୍ରବେଶ କରିବାକୁ ଦେବେ ନାହିଁ।” ଭୁବନେଶ୍ୱର ଉନ୍ନୟନ ପରିଷଦ ଘୋଷଣା କରିଛି ଯେ, ଆସନ୍ତାକାଲି ମଙ୍ଗଳବାର (ମେ ୨୭) ଠାରୁ ଆନ୍ଦୋଳନକୁ ଆହୁରି ତୀବ୍ର କରାଯିବ।
Comments are closed.