ନୂଆଦିଲ୍ଲୀ: ପୁଟିନଙ୍କୁ ଅଲ୍ଟିମେଟମ ଦେଲେ ଟ୍ରମ୍ପ । ୫୦ ଦିନ ଭିତରେ ଯୁଦ୍ଧ ବନ୍ଦ କର, ନହେଲେ ……ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ରାଷ୍ଟ୍ରପତି ପୁଟିନଙ୍କୁ ଧମକ ଦେଇଛନ୍ତି ଯେ ଯଦି ୫୦ ଦିନ ମଧ୍ୟରେ ୟୁକ୍ରେନରେ ଯୁଦ୍ଧ ସମାପ୍ତ କରିବା ପାଇଁ କୌଣସି ଚୁକ୍ତି ନହୁଏ, ତେବେ ରୁଷ ଉପରେ ୧୦୦ ପ୍ରତିଶତ ଶୁଳ୍କ ଲଗାଯିବ। ଏଥିସହିତ ଆମେରିକା ରାଷ୍ଟ୍ରପତି ନାଟୋ ସହଯୋଗୀଙ୍କ ସହିତ ୟୁକ୍ରେନକୁ ଅଧିକ ଅସ୍ତ୍ରଶସ୍ତ୍ର ପଠାଇବା ପାଇଁ ଏକ ଚୁକ୍ତି ଘୋଷଣା ମଧ୍ୟ କରିଛନ୍ତି। ସୋମବାର ନାଟୋ ସଚିବ ଜେନେରାଲ ମାର୍କ ରୁଟଙ୍କ ସହ ଓଭାଲ ଅଫିସରେ ଏକ ବୈଠକ ସମୟରେ, ଆମେରିକା ରାଷ୍ଟ୍ରପତି କହିଛନ୍ତି ଯେ ରୁଷ ଏବଂ ୟୁକ୍ରେନ ଯୁଦ୍ଧ ସମାପ୍ତ କରିବା ପାଇଁ ଏକ ଚୁକ୍ତି ଦିଗରେ ଅଗ୍ରଗତି ନକରିବା ପାଇଁ ସେ ରୁଷ ଉପରେ ଅସନ୍ତୁଷ୍ଟ ଅଛନ୍ତି ।
ହ୍ୱାଇଟ ହାଉସରେ ସାମ୍ବାଦିକମାନଙ୍କ ସହିତ ଆଲୋଚନା ବେଳେ ଟ୍ରମ୍ପ କହିଛନ୍ତି, ଆମେ ରୁଷ ଉପରେ ଦ୍ୱିତୀୟ ଶୁଳ୍କ ଲାଗୁ କରିବାକୁ ଯାଉଛୁ । ଯଦି ଯୁଦ୍ଧ ବିରତି ନେଇ ୫୦ ଦିନ ମଧ୍ୟରେ ରୁଷ କୌଣସି ଚୁକ୍ତି ସ୍ୱାକ୍ଷର ନ କରେ, ତାହାଲେ ରୁଷ ଉପରେ ୧୦୦ ପ୍ରତିଶତ ଟାରିଫ୍ ଲଗାଇବ ଆମେରିକା । ଏଥିସହିତ ସେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଉପରେ ଅସନ୍ତୋଷ ଝାଡି କହିଛନ୍ତି, ପୁଟିନ୍ ଦିନରେ ମିଠା କଥା କହୁଛନ୍ତି, କିନ୍ତୁ ରାତିରେ ସମସ୍ତଙ୍କ ଉପରେ ବୋମା ବର୍ଷା କରୁଛନ୍ତି ।
ଏହା ସହ ୟୁକ୍ରେନକୁ ଆମେରିକା ପାଟ୍ରିଅଟ ବାୟୁ ପ୍ରତିରକ୍ଷା ବ୍ୟବସ୍ଥା ବା କ୍ଷେପଣାସ୍ତ୍ର ପଠାଇବ ନେଇ ମଧ୍ୟ ଘୋଷଣା କରିଥିଲେ ଟ୍ରମ୍ପ । ତେବେ କେତେ ସଂଖ୍ୟକ ପାଟ୍ରିଅଟ କ୍ଷେପଣାସ୍ତ୍ର ପଠାଇବେ, ସେ ନେଇ ଟ୍ରମ୍ପ କିଛି ଠୋସ୍ କହିନଥିବା ବେଳେ ୟୁକ୍ରେନର ସୁରକ୍ଷା ପାଇଁ ଏହା ଗୁରୁତ୍ବପୂର୍ଣ୍ଣ ଏବଂ ତାହାର ଏହା ଆବଶ୍ୟକତା ଥିବାରୁ ପାଟ୍ରିଅଟ କ୍ଷେପଣାସ୍ତ୍ର ପଠାଯିବ ବୋଲି ସେ କହିଛନ୍ତି । ତେବେ ଏହା ସିଧାସଳଖ ୟୁକ୍ରେନକୁ ପଠାଯିବ ନାହିଁ । ଏସବୁ ଯୁଦ୍ଧାସ୍ତ୍ର ନାଟୋକୁ ଦିଆଯିବ । ନାଟୋ ରାଷ୍ଟ୍ରମାନେ ୧୦୦ ପ୍ରତିଶତ ଅର୍ଥ ପଇଠ କରିବେ ଏବଂ ପରେ ପାଟ୍ରିଅଟ କ୍ଷେପଣାସ୍ତ୍ର ୟୁକ୍ରେନକୁ ପ୍ରଦାନ କରିବେ । ଟ୍ରମ୍ପ କହିଛନ୍ତି, ମୁଁ ଜର୍ମାନୀ ଏବଂ ଅଧିକାଂଶ ପ୍ରମୁଖ ନାଟୋ ଦେଶ ସହିତ କଥା ହୋଇଛି ଏବଂ ସେମାନେ ଏ ବିଷୟରେ ବହୁତ ଉତ୍ସାହିତ।
ଏହାବ୍ୟତୀତ ପୁଣି ଥରେ ଭାରତ ଏବଂ ପାକିସ୍ତାନ, ରୱାଣ୍ଡା ଏବଂ ଡେମୋକ୍ରାଟିକ୍ ରିପବ୍ଲିକ୍ ଅଫ୍ କଙ୍ଗୋ ମଧ୍ୟରେ ବିବାଦକୁ ଉଲ୍ଲେଖ କରି ଟ୍ରମ୍ପ ଦାବି କରିଛନ୍ତି, ଆମେ ବାଣିଜ୍ୟ ମାଧ୍ୟମରେ ଯୁଦ୍ଧ ସମାଧାନ କରିବାରେ ବହୁତ ସଫଳ ହୋଇଛୁ ବୋଲି କହି ଭାରତ ପାକିସ୍ତାନ ଯୁଦ୍ଧ ନେଇ ନିଜକୁ ଶ୍ରେୟ ଦେଇଛନ୍ତି ଟ୍ରମ୍ପ ।
ତେବେ ଟ୍ରମ୍ପଙ୍କ ସହ ନାଟୋ ମହାସଚିବ ମାର୍କ ରୁଟ୍ ମଧ୍ୟ ଏଥିରେ ଉପସ୍ଥିତ ଥିଲେ । ସେ କହିଛନ୍ତି ଯେ ଏହା ୟୁକ୍ରେନକୁ ଅସ୍ତ୍ରଶସ୍ତ୍ରର କେବଳ ପ୍ରଥମ ପଠାଣ ହେବ, ଏବଂ ଭବିଷ୍ୟତରେ ଆହୁରି ଅସ୍ତ୍ରଶସ୍ତ୍ର ପଠାଯିବ । ରୁଷିଆ ବିମାନ ଆକ୍ରମଣ ବିରୁଦ୍ଧରେ ୟୁକ୍ରେନର ସୁରକ୍ଷା ପାଇଁ ପାଟ୍ରିଅଟ୍ ଇଣ୍ଟରସେପ୍ଟର ମିସାଇଲ୍ ବହୁତ ଗୁରୁତ୍ୱପୂର୍ଣ୍ଣ । ଏହି ଆମେରିକା ନିର୍ମିତ ଅସ୍ତ୍ରଶସ୍ତ୍ର ହେଉଛି ୟୁକ୍ରେନର ଅସ୍ତ୍ରାଗାରରେ ଏକମାତ୍ର ମିସାଇଲ୍ ଯାହା ରୁଷିଆ ବାଲିଷ୍ଟିକ୍ ମିସାଇଲ୍ କୁ ଖସାଇ ଦେବାକୁ ସକ୍ଷମ। ରୁଟ୍ ଜୋର ଦେଇ କହିଛନ୍ତି ଯେ ୟୁକ୍ରେନ ସହିତ ଅସ୍ତ୍ରଶସ୍ତ୍ର ଚୁକ୍ତିନାମାରେ ଆମେରିକାର ନିଜସ୍ୱ ଭଣ୍ଡାରକୁ ମଧ୍ୟ ବିଚାରକୁ ନିଆଯିବ ।
Comments are closed.