ନୂଆଦିଲ୍ଲୀ: ଏକ ରହସ୍ୟମୟ ଅନ୍ତରୀକ୍ଷ ବସ୍ତୁ 3I/ATLAS ପୃଥିବୀ ଆଡ଼କୁ ଅତ୍ୟନ୍ତ ଦ୍ରୁତ ଗତିରେ ଆଗେଇ ଆସୁଛି, ଯାହା ବୈଜ୍ଞାନିକଙ୍କ ମଧ୍ୟରେ ଡର ବଢ଼ାଇଛି । କେହି ଏହାକୁ ଆମ ସୌରମଣ୍ଡଳ ବାହାରୁ ଆସିଥିବା ଏକ ସାଧାରଣ ଧୂମକେତୁ ବୋଲି ମାନୁଛନ୍ତି, ଆଉ କେହି ବିଶେଷଜ୍ଞ ଦାବି କରୁଛନ୍ତି ଯେ ଏହା ଏକ ଏଲିୟନ ସର୍ଭେଲାନ୍ସ ଡିଭାଇସ ହୋଇପାରେ । ଯାହା ନଭେମ୍ବର ୨୦୨୫ରେ ପୃଥିବୀର ନିକଟତର ହେବ। ଏହାର ଗତି ଓ ଦିଗ ଏପରି ଯେ ଏହାକୁ ଏ ପର୍ଯ୍ୟନ୍ତ ଦେଖାଯାଇଥିବା ଅନ୍ୟ ଅନ୍ତରୀକ୍ଷ ବସ୍ତୁଠାରୁ ଅଲଗା ମନେ କରାଯାଉଛି। ଏହି ବସ୍ତୁ ବିଜ୍ଞାନ ଜଗତରେ ହଲଚଲ ସୃଷ୍ଟି କରିଛି। ପ୍ରଶ୍ନ ଉଠୁଛି, ଏହା କ’ଣ ଏକ ପ୍ରାକୃତିକ ପିଣ୍ଡ ନା ଏଲିୟନ ଟେକ୍ନୋଲୋଜିର ଅଂଶ?
3I/ATLAS କ’ଣ?
୧ ଜୁଲାଇ ୨୦୨୫ରେ 3I/ATLASକୁ ପ୍ରଥମେ ଦେଖାଯାଇଥିଲା, ଯେତେବେଳେ ଏହା ସୂର୍ଯ୍ୟଙ୍କ ଆଡ଼କୁ ଦ୍ରୁତ ଗତିରେ ଆଗେଇ ଆସୁଥିଲା। ମାତ୍ର ଗୋଟିଏ ଦିନ ପରେ ସ୍ପଷ୍ଟ ହେଲା ଯେ ଏହା ଆମ ସୌରମଣ୍ଡଳର ଅଂଶ ନୁହେଁ, ବରଂ ବାହାରୁ ଆସିଥିବା ଏକ ଅନ୍ତରୀକ୍ଷ ପରିଭ୍ରମଣକାରୀ। ଏପରି ଘଟଣା ମାତ୍ର ତୃତୀୟ ଥର ପାଇଁ ଘଟିଛି। ଏହି ବସ୍ତୁର ଆକାର ପ୍ରାୟ ୧୫ ମାଇଲ (୨୪ କିଲୋମିଟର) ଚଉଡ଼ା, ଯାହା ନ୍ୟୁୟର୍କର ମ୍ୟାନହାଟନଠାରୁ ମଧ୍ୟ ବଡ଼। ଏଥିରେ ବରଫ, କାର୍ବନ ଯୁକ୍ତ ଖଣିଜ, ଜୈବିକ ଅଣୁ ଏବଂ ସିଲିକେଟ ମିଳିଛି। ବିଜ୍ଞାନୀମାନେ ମାନୁଛନ୍ତି ଯେ ଏଥିରେ ଥିବା ପାଣି ୭ ବିଲିୟନ ବର୍ଷରୁ ଅଧିକ ପୁରୁଣା ହୋଇପାରେ, ଯାହା ଆମ ସୌରମଣ୍ଡଳଠାରୁ ମଧ୍ୟ ଅଧିକ ବୟସ୍କ!
ଏଲିୟନ ଆକ୍ରମଣ ନା ବିଜ୍ଞାନୀୟ ଭ୍ରମ?
ହାର୍ଭାର୍ଡ ବିଶ୍ଵବିଦ୍ୟାଳୟର ପ୍ରସିଦ୍ଧ ମହାକାଶ ବିଜ୍ଞାନୀ ପ୍ରଫେସର ଆଭି ଲୋଏବ କହିଛନ୍ତି ଯେ 3I/ATLAS କୌଣସି ସାଧାରଣ ଅନ୍ତରୀକ୍ଷ ପିଣ୍ଡ ନୁହେଁ, ବରଂ ଏଲିୟନ ଟେକ୍ନୋଲୋଜିରେ ସଜ୍ଜିତ ଏକ ସର୍ଭେଲାନ୍ସ ଯନ୍ତ୍ର ହୋଇପାରେ। ତାଙ୍କ ଦୁଇ ସହଯୋଗୀ ଆଡ଼ମ ହିବାର୍ଡ ଓ ଆଡ଼ମ କ୍ରୋଲଙ୍କ ସହ ଏକ ଗବେଷଣାପତ୍ରରେ ସେ ଦାବି କରିଛନ୍ତି ଯେ ଏହାର ଗତି, ପ୍ରବେଶ କୋଣ ଏବଂ ଗ୍ରହମାନଙ୍କ ନିକଟରୁ ଚୁପଚାପ ଅତିକ୍ରମ କରିବାର ଢଙ୍ଗ ଏକ ବୁଦ୍ଧିମାନ ରଣନୀତିର ଅଂଶ ହୋଇପାରେ। ଲୋଏବ ପୂର୍ବରୁ ୨୦୧୭ରେ ଦେଖାଯାଇଥିବା ‘Oumuamua ବସ୍ତୁକୁ ମଧ୍ୟ ଏକ ଏଲିୟନ “ପ୍ରୋବ” ବୋଲି ଦାବି କରିଥିଲେ।
ନଭେମ୍ବରରେ ଦେଖା ନ ଯାଇ ମଧ୍ୟ ପୃଥିବୀର ଅତି ନିକଟତର
3I/ATLAS ନଭେମ୍ବର ଶେଷ ଆଡ଼କୁ ସୂର୍ଯ୍ୟଙ୍କ ନିକଟତମ ପହଞ୍ଚିବ, କିନ୍ତୁ ଏହି ସମୟରେ ଏହା ପୃଥିବୀରୁ ଦୃଶ୍ୟମାନ ହେବ ନାହିଁ, କାରଣ ଏହା ସୂର୍ଯ୍ୟଙ୍କ ଅପର ପାର୍ଶ୍ଵରେ ରହିବ। ଆଭି ଲୋଏବ କହୁଛନ୍ତି ଯେ ଏହା କୌଣସି “ସଂଯୋଗ” ନୁହେଁ, ବରଂ ଏକ “ବୁଦ୍ଧିମାନ ରଣନୀତି” ହୋଇପାରେ। ତାଙ୍କ ମତରେ, “ସମ୍ଭବତଃ ଏଲିୟନ ସଭ୍ୟତା ଚାହୁଁନଥିବେ ଯେ ଏହା ସବୁଠାରୁ ଉଜ୍ଜ୍ଵଳ ଥିବା ସମୟରେ ପୃଥିବୀର ଟେଲିସ୍କୋପ ଏହାକୁ ଦେଖି ପାରିବ କିମ୍ବା ଏହି ସମୟରେ କୌଣସି ଯନ୍ତ୍ର ପୃଥିବୀ ଆଡ଼କୁ ପଠାଯାଇ ପାରିବ।” ଲୋଏବ ଏହି ପରିସ୍ଥିତିକୁ ‘Dark Forest Theory’ ସହ ଯୋଡ଼ିଛନ୍ତି, ଯେଉଁଥିରେ ମାନାଯାଏ ଯେ ଏଲିୟନ ସଭ୍ୟତାମାନେ ଜାଣିଶୁଣି ନିଜକୁ ଲୁଚାଇ ରଖନ୍ତି ଯାହା ଫଳରେ ଅନ୍ୟ ବିପଦରୁ ସେମାନେ ନିଜକୁ ସୁରକ୍ଷିତ ରଖିପାରନ୍ତି।
କିନ୍ତୁ ସମସ୍ତେ ଏହି ସିଦ୍ଧାନ୍ତରେ ସହମତ ନୁହନ୍ତି
ଅନେକ ବିଜ୍ଞାନୀ ଏହି ଚିନ୍ତାଧାରାକୁ “ଅଧିକ କଳ୍ପନାପ୍ରସୂତ ଓ କମ ବୈଜ୍ଞାନିକ” ବୋଲି କହିଛନ୍ତି। କାନାଡ଼ାର ଖଗୋଳ ବିଜ୍ଞାନୀ ସାମାନ୍ଥା ଲଲର ଲାଇଭ ସାଇନ୍ସକୁ କହିଛନ୍ତି, “ଏହା ଏକ ସାଧାରଣ ଧୂମକେତୁ, ଯାହା ପ୍ରତ୍ୟେକ ସୌରମଣ୍ଡଳରୁ ବାହାରିଥାଏ।” ଏହି ଗବେଷଣା ଏପର୍ଯ୍ୟନ୍ତ ପିୟର-ରିଭ୍ୟୁ (ବୈଜ୍ଞାନିକ ସମୀକ୍ଷା) ପ୍ରକ୍ରିୟାରୁ ଗତି କରିନାହିଁ। ଲୋଏବ ନିଜେ ମଧ୍ୟ ସ୍ଵୀକାର କରିଛନ୍ତି ଯେ ସମ୍ଭାବନା ଅଧିକ ଯେ ଏହା ଏକ ପ୍ରାକୃତିକ ପିଣ୍ଡ।
Comments are closed.