ରେଳବାଇ ବାହାର କଲା ବଡ଼ ନିଯୁକ୍ତି, ଏହି ଦିନ ଆବେଦନର ଶେଷ ତାରିଖ

ନୂଆଦିଲ୍ଲୀ: ରେଳବାଇରେ ସରକାରୀ ଚାକିରିର ସ୍ୱପ୍ନ ଦେଖୁଥିବା ଆଶାୟୀଙ୍କ ପାଇଁ ଏକ ବଡ଼ ସୁଯୋଗ ଆସିଛି। ଦକ୍ଷିଣ ରେଳବାଇ (Southern Railway) ଆପ୍ରେଣ୍ଟିସସିପ୍ ଅଧୀନରେ ମୋଟ ୩୫୧୮ଟି ପଦବୀ ପାଇଁ ନିଯୁକ୍ତି ବିଜ୍ଞପ୍ତି ଜାରି କରିଛି। ଏଥିପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇସାରିଛି ଏବଂ ଆଗ୍ରହୀ ପ୍ରାର୍ଥୀମାନେ ୨୫ ସେପ୍ଟେମ୍ବର ୨୦୨୫ ପର୍ଯ୍ୟନ୍ତ ଅନଲାଇନ ଆବେଦନ କରିପାରିବେ। ଏଥିପାଇଁ ସେମାନଙ୍କୁ ଦକ୍ଷିଣ ରେଳବାଇର ଅଫିସିଆଲ ଓ୍ୱେବସାଇଟ sr.indianrailways.gov.in କୁ ଭିଜିଟ୍ କରିବାକୁ ହେବ।

ଏହି ନିଯୁକ୍ତି ଅଭିଯାନ ଅଧୀନରେ ଦକ୍ଷିଣ ରେଳବାଇର ବିଭିନ୍ନ କାରଖାନା ଏବଂ ୟୁନିଟରେ ଆପ୍ରେଣ୍ଟିସ ନିଯୁକ୍ତ ହେବେ। ଏଥିରେ ପେରାମ୍ବୁରରେ ଥିବା କ୍ୟାରେଜ ଆଣ୍ଡ ୱାଗନ ୱାର୍କସ, ଗୋଲ୍ଡେନ ରକ ସେଣ୍ଟ୍ରାଲ ୱାର୍କସପ ଏବଂ ପୋଣ୍ଡନୁରରେ ଥିବା ସିଗନାଲ ଆଣ୍ଡ ଟେଲିକମ ୱାର୍କସପ ୟୁନିଟ ଅନ୍ତର୍ଭୁକ୍ତ। ଏହି ସମସ୍ତ ସ୍ଥାନରେ ମୋଟ ୩୫୧୮ ଜଣ ପ୍ରାର୍ଥୀଙ୍କୁ ଆପ୍ରେଣ୍ଟିସସିପ୍ ପାଇଁ ସୁଯୋଗ ମିଳିବ।

ପ୍ରାର୍ଥୀଙ୍କ ଶିକ୍ଷାଗତ ଯୋଗ୍ୟତା ପଦ ଏବଂ ଟ୍ରେଡ ଅନୁଯାୟୀ ନିର୍ଦ୍ଧାରିତ ହୋଇଛି। ଆବେଦନ କରୁଥିବା ପ୍ରାର୍ଥୀମାନଙ୍କୁ ଦଶମ, ଦ୍ୱାଦଶ କିମ୍ବା ଆଇଟିଆଇ (ITI) ପାସ ହେବା ଆବଶ୍ୟକ। ଏହା ସହିତ ବୟସ ସୀମା ସର୍ବନିମ୍ନ ୧୫ ବର୍ଷ ଏବଂ ସର୍ବାଧିକ ୨୨ ରୁ ୨୪ ବର୍ଷ ମଧ୍ୟରେ ରହିଛି। ସଂରକ୍ଷିତ ଶ୍ରେଣୀର ପ୍ରାର୍ଥୀମାନେ ସରକାରୀ ନିୟମ ଅନୁଯାୟୀ ଉଚ୍ଚ ବୟସ ସୀମାରେ ଛାଡ଼ ପାଇବେ। ଆବେଦନ ପ୍ରକ୍ରିୟା ସମ୍ପୂର୍ଣ୍ଣ ଅନଲାଇନ ହେବ। ପ୍ରାର୍ଥୀମାନଙ୍କୁ ପ୍ରଥମେ ଅଫିସିଆଲ ଓ୍ୱେବସାଇଟକୁ ଯାଇ ଆକ୍ଟ ଆପ୍ରେଣ୍ଟିସ ୨୦୨୫-୨୬ ଲିଙ୍କ ଉପରେ କ୍ଲିକ କରିବାକୁ ହେବ। ଏହାପରେ ରେଜିଷ୍ଟ୍ରେସନ କରି ଆବଶ୍ୟକ ସମସ୍ତ ତଥ୍ୟ ପୂରଣ କରିବାକୁ ହେବ। ପଞ୍ଜୀକରଣ ସମ୍ପୂର୍ଣ୍ଣ ହେବା ପରେ ଲଗଇନ କରି ଅନ୍ୟାନ୍ୟ ବିବରଣୀ ପୂରଣ କରି ଫର୍ମ ଜମା କରିବାକୁ ହେବ। ଆବେଦନ ଶୁଳ୍କ ଭାବେ ସାଧାରଣ ଏବଂ ଓବିସି ଶ୍ରେଣୀର ପ୍ରାର୍ଥୀମାନଙ୍କୁ ୧୦୦ ଟଙ୍କା ଜମା କରିବାକୁ ହେବ, ଯେତେବେଳେ ଏସସି, ଏସଟି, ଦିବ୍ୟାଙ୍ଗ ଏବଂ ସମସ୍ତ ମହିଳା ପ୍ରାର୍ଥୀଙ୍କ ପାଇଁ ଆବେଦନ ମାଗଣା ରହିଛି।

ଆପ୍ରେଣ୍ଟିସସିପ୍ ସମୟରେ ମନୋନୀତ ପ୍ରାର୍ଥୀମାନଙ୍କୁ ମାସିକ ଷ୍ଟାଇପେଣ୍ଡ ମିଳିବ। ଦଶମ ପାସ ଫ୍ରେସର୍ସମାନଙ୍କୁ ମାସିକ ୬୦୦୦ ଟଙ୍କା ଏବଂ ଦ୍ୱାଦଶ ପାସ କିମ୍ବା ଆଇଟିଆଇ ଧାରୀମାନଙ୍କୁ ମାସିକ ୭୦୦୦ ଟଙ୍କା ଷ୍ଟାଇପେଣ୍ଡ ମିଳିବ। ଏହି ଷ୍ଟାଇପେଣ୍ଡ ପ୍ରାର୍ଥୀମାନଙ୍କୁ ତାଲିମ ସମୟରେ ଆର୍ଥିକ ସହାୟତା ଦେବ ଏବଂ ଅଭିଜ୍ଞତା ସହିତ ଆର୍ଥିକ ସ୍ଥିରତା ମଧ୍ୟ ପ୍ରଦାନ କରିବ।