Manimahesh yatra: ମଣିମହେଶ ଯାତ୍ରାରେ ୧୬ ଶ୍ରଦ୍ଧାଳୁଙ୍କ ମୃତ୍ୟୁ; ହଜାର ହଜାର ଲୋକଙ୍କୁ କରାଗଲା ଉଦ୍ଧାର

ନୂଆଦିଲ୍ଲୀ:ବର୍ଷା ଯୋଗୁଁ ହିମାଚଳପ୍ରଦେଶର ଚମ୍ବା ଜିଲ୍ଲାର ପରିସ୍ଥିତି ମଧ୍ୟ ବହୁତ ଖରାପ ହୋଇ ପଡିଛି । ଅଗଷ୍ଟ ତାରିଖରୁ ବର୍ଷା ଜାରି ରହିଛି। ଏହି କାରଣରୁ ଅଗଷ୍ଟ ୨୭ତାରିଖରେ ମଣିମହେଶ ଯାତ୍ରାକୁ ସମୟ ପୂର୍ବରୁ ବନ୍ଦ କରିଦିଆଯାଇଥିଲା। ଚଳିତ ବର୍ଷ ଏହି ଯାତ୍ରା ୧୫ ଅଗଷ୍ଟରେ ଆରମ୍ଭ ହୋଇ ୮ ସେପ୍ଟେମ୍ବରରେ ଶେଷ ହେବାର ଥିଲା। କିନ୍ତୁ ପ୍ରବଳ ବର୍ଷାକୁ ଦୃଷ୍ଟିରେ ରଖି ପ୍ରଶାସନ ଏହାକୁ ସମୟ ପୂର୍ବରୁ ବନ୍ଦ କରିବାକୁ ନିଷ୍ପତ୍ତି ନେଇଛି। ଯାତ୍ରା ସମୟରେ ପ୍ରବଳ ବର୍ଷା ଯୋଗୁଁ ଭୂସ୍ଖଳନ ହୋଇଥିଲା, ଫଳରେ ଅନେକ ସ୍ଥାନରେ ରାସ୍ତା ଏବଂ ସେତୁ କ୍ଷତିଗ୍ରସ୍ତ ହୋଇଥିଲା ଏବଂ ୧୫୦୦୦ ରୁ ଅଧିକ ଭକ୍ତ ରାସ୍ତାରେ ଫସି ରହିଥିଲେ। ଚଳିତ ବର୍ଷ ମଣି ମହେଶ ଯାତ୍ରା ସମୟରେ ଏପର୍ଯ୍ୟନ୍ତ ୧୬ ଜଣଙ୍କର ମୃତ୍ୟୁ ହୋଇଛି।

ଫସି ରହିଥିବା ଭକ୍ତମାନଙ୍କୁ ସ୍ଥାନାନ୍ତର କରିବା ପାଇଁ NDRF ଦଳଗୁଡ଼ିକ ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି।

ବୁଧବାର ସନ୍ଧ୍ୟାରେ, NDRF ଦଳଗୁଡ଼ିକ ଧାନଚୋରୁ ପ୍ରାୟ ୩୨୦୦ ଭକ୍ତଙ୍କୁ ସ୍ଥାନାନ୍ତର କରି ହଡସର ପଠାଇଥିଲେ। ସେମାନଙ୍କ ମଧ୍ୟରୁ ପ୍ରାୟ ୫୦୦ ଜଣ ଶିଶୁ ଏବଂ ମହିଳା ଥିଲେ ।

ଡିସି ଚମ୍ବା ମୁକେଶ ରେପ୍ସୱାଲ କହିଛନ୍ତି ଯେ ‘ମଣିମହେଶ ଯାତ୍ରା ସମୟରେ ପ୍ରାକୃତିକ ବିପର୍ଯ୍ୟୟ ଯୋଗୁଁ ମୋଟ ୧୬ ଜଣ ଭକ୍ତ ପ୍ରାଣ ହରାଇଛନ୍ତି। ୧୬ ଜଣଙ୍କ ମଧ୍ୟରୁ ୭ ଜଣ ମଣିମହେଶ କୈଳାସ ପରିକ୍ରମା ସମୟରେ ପ୍ରାଣ ହରାଇଥିଲେ, ଅନ୍ୟ ୯ ଜଣ ତୀର୍ଥପଥର ବିଭିନ୍ନ ସ୍ଥାନରେ ପ୍ରାଣ ହରାଇଥିଲେ।’

ଭକ୍ତମାନଙ୍କୁ ସ୍ଥାନାନ୍ତର କରିବା ପାଇଁ ପ୍ରଶାସନ ହେଲିକପ୍ଟର ବ୍ୟବସ୍ଥା କରିଛି, କିନ୍ତୁ ଖରାପ ପାଗ ଏଥିରେ ବାଧା ସୃଷ୍ଟି କରୁଛି। ନିରନ୍ତର ବର୍ଷା ଏବଂ କୁହୁଡ଼ି ଏଥିରେ ବାଧା ସୃଷ୍ଟି କରୁଛି। ହେଲିକପ୍ଟର ସାହାଯ୍ୟରେ ସଚୁଇରୁ ଗୌରୀକୁଣ୍ଡକୁ ଶ୍ରଦ୍ଧାଳୁମାନଙ୍କୁ ସ୍ଥାନାନ୍ତର କରିବା ପାଇଁ ପ୍ରୟାସ କରାଯାଉଥିଲା କିନ୍ତୁ ଖରାପ ପାଗ ଯୋଗୁଁ ଉଡ଼ାଣ ସମ୍ଭବ ହୋଇପାରିନଥିଲା।