ପାଟନା: ବିହାରର ରାଜଧାନୀ ପାଟନାରେ ରହୁଥିବା ଲକ୍ଷ ଲକ୍ଷ ଲୋକଙ୍କ ସ୍ୱପ୍ନ ଆଜି ପୂରା ହୋଇଛି । ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ନୀତିଶ କୁମାର ଆଜି ବିହାରର ରାଜଧାନୀ ପାଟନାରେ ମେଟ୍ରୋ ରେଳ ପ୍ରକଳ୍ପର ଉଦଘାଟନ କରିଛନ୍ତି । ପାଟନା ମେଟ୍ରୋ ରେଳ ପ୍ରକଳ୍ପର ପ୍ରଥମ ପର୍ଯ୍ୟାୟ ଉଦଘାଟନ ପରେ ସାଧାରଣ ଯାତ୍ରୀମାନେ ମଙ୍ଗଳବାର ଅକ୍ଟୋବର ୭ତାରିଖରୁ ସେମାନଙ୍କ ସହରରେ ମେଟ୍ରୋ ଯାତ୍ରା କରିପାରିବେ। ପାଟନା ମେଟ୍ରୋ ବର୍ତ୍ତମାନ କେବଳ ତିନୋଟି କୋଚ ସହିତ ଚାଲିବ।
ପାଟନା ମେଟ୍ରୋର ଉଦଘାଟନ ସହିତ ପାଟନା ଦେଶର ୨୪ତମ ମେଟ୍ରୋ ସହର ହୋଇଗଲା।
ପାଟନା ମେଟ୍ରୋର ପ୍ରଥମ ପର୍ଯ୍ୟାୟ ନୂତନ ISBT, ଜିରୋ ମାଇଲ୍ ଏବଂ ଭୂତନାଥ ମେଟ୍ରୋ ଷ୍ଟେସନ ମଧ୍ୟରେ କାର୍ଯ୍ୟ କରିବ। ଭଡ଼ା ସର୍ବନିମ୍ନ ₹୧୫ ଏବଂ ସର୍ବାଧିକ ₹୩୦ ଧାର୍ଯ୍ୟ କରାଯାଇଛି। ବର୍ତ୍ତମାନ ପାଇଁ ଯାତ୍ରୀମାନଙ୍କୁ ସେମାନଙ୍କ ଯାତ୍ରା ପାଇଁ ଟୋକନ୍ କିଣିବାକୁ ପଡିବ।
୩କୋଚ୍ ବିଶିଷ୍ଟ ପାଟନା ମେଟ୍ରୋ ଟ୍ରେନରେ ପ୍ରାୟ ୧୩୮ ଜଣ ଯାତ୍ରୀ ବସି ପାରିବେ ଏବଂ ୯୪୫ ଜଣ ଠିଆ ହୋଇ ଯାତ୍ରା କରିପାରିବେ । ପ୍ରାରମ୍ଭିକ ପର୍ଯ୍ୟାୟରେ, ମେଟ୍ରୋ ସୀମିତ ସମୟ ପାଇଁ ଚାଲିବ ଏବଂ ଧୀରେ ଧୀରେ ଯାତ୍ରୀଙ୍କ ଚାହିଦା ଅନୁଯାୟୀ ସମୟ ଏବଂ ଫ୍ରିକ୍ୱେନ୍ସି ବୃଦ୍ଧି କରାଯିବ।
ଯାତ୍ରୀଙ୍କ ସୁରକ୍ଷା ପାଇଁ, ପ୍ରତ୍ୟେକ ମେଟ୍ରୋ କୋଚରେ ୩୬୦-ଡିଗ୍ରୀ ସିସି ଟିଭି କ୍ୟାମେରା ଲାଗିଛି। ଜରୁରୀକାଳୀନ ପରିସ୍ଥିତି ପାଇଁ ଦୁଇଟି ଜରୁରୀକାଳୀନ ବଟନ୍ ଏବଂ ଏକ ମାଇକ୍ରୋଫୋନ୍ ମଧ୍ୟ ଯୋଗାଇ ଦିଆଯାଇଛି।
ସୂଚନାଥାଉକି, ପାଟନା ମେଟ୍ରୋର ପ୍ରଥମ ପର୍ଯ୍ୟାୟର ଉଦଘାଟନ କରିବା ସହିତ ମୁଖ୍ୟମନ୍ତ୍ରୀ ନୀତିଶ କୁମାର ପାଟନା ଜଙ୍କସନ ଏବଂ ୯.୩୫ କିଲୋମିଟର ଲମ୍ବା ସୁଡ଼ଙ୍ଗ ସମେତ ୬ଟି ଭୂତଳ ମେଟ୍ରୋ ଷ୍ଟେସନର ଶିଳାନ୍ୟାସ ମଧ୍ୟ କରିଥିଲେ।
Comments are closed.