ନୂଆଦିଲ୍ଲୀ: ମଧ୍ୟପ୍ରଦେଶରେ ‘କୋଲଡ୍ରିଫ୍-Coldrif ‘ କଫ ସିରପ ଯୋଗୁଁ ପିଲାଙ୍କ ମୃତ୍ୟୁ ମାମଲାରେ ପୋଲିସ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ‘ଶ୍ରୀସନ୍ ମେଡିକାଲ୍ସ’ (SRESAN MEDICALS) ର ମାଲିକ ଏସ୍ ରଙ୍ଗନାଥନଙ୍କୁ ଚେନ୍ନାଇରୁ ଗିରଫ କରିଛି ଏମପି ସ୍ବତନ୍ତ୍ର ତଦନ୍ତ ଦଳ ।
କଫ୍ ସିରପ୍ ମୃତ୍ୟୁ ମାମଲାରେ ରଙ୍ଗନାଥନ୍ ଙ୍କୁ ଖୋଜାଖୋଜି କରୁଥିଲେ ପୋଲିସ । ମଧ୍ୟପ୍ରଦେଶ ପୋଲିସ ଚେନ୍ନାଇ ପୋଲିସ ସହାୟତାରେ ତାଙ୍କୁ ଗିରଫ କରିଛି ।
ସୂଚନାଥାଉକି, ରଙ୍ଗନାଥନଙ୍କ ଉପରେ ପୋଲିସ ₹୨୦,୦୦୦ ଟଙ୍କାର ପୁରସ୍କାର ଘୋଷଣା କରିଥିଲା। ପଳାତକ ଅଭିଯୁକ୍ତ ରଙ୍ଗନାଥନଙ୍କ ସୂଚନାଦାତାଙ୍କୁ ଏହି ପୁରସ୍କାର ରାଶି ପ୍ରଦାନ କରାଯିବ ବୋଲି କହିଥିଲା ପୋଲିସ । କୁହାଯାଇଥିଲା ଯେ ସୂଚନାଦାତାଙ୍କ ନାମ ଗୋପନ ରଖାଯିବ। ରଙ୍ଗନାଥନ ତାଙ୍କ ପତ୍ନୀଙ୍କ ସହିତ ଚେନ୍ନାଇରେ ଥିବା ତାଙ୍କ ଘର ଏବଂ ତାମିଲନାଡୁର କାଞ୍ଚିପୁରମରେ ଥିବା କାରଖାନାରେ ତାଲା ପକାଇ ଫେରାର୍ ହୋଇଯାଇଥିଲେ।
କମ୍ପାନୀର ପଳାତକ ମାଲିକମାନଙ୍କୁ ଶୀଘ୍ର ଗିରଫ କରିବା ପାଇଁ ଏକ ସ୍ୱତନ୍ତ୍ର SIT ଦଳ ମଧ୍ୟ ଗଠନ କରାଯାଇଥିଲା ।
ମଧ୍ୟପ୍ରଦେଶ ପୋଲିସର ଏକ ସାତ ଜଣିଆ SIT ଚେନ୍ନାଇରେ କମ୍ପାନୀର ପଞ୍ଜିକୃତ କାର୍ଯ୍ୟାଳୟ ଏବଂ କାଞ୍ଚିପୁରମରେ ସ୍ଥିତ କାରଖାନାରେ ତଦନ୍ତ କରିଥିଲା। ତାମିଲନାଡୁ ସରକାର ମଧ୍ୟପ୍ରଦେଶରେ ଶିଶୁ ମୃତ୍ୟୁ ସହିତ ଜଡିତ ନିଷିଦ୍ଧ କଫ ସିରପ କୋଲଡ୍ରିଫ୍ ଉତ୍ପାଦନ କରୁଥିବା ଏକ କମ୍ପାନୀର ପ୍ଲାଣ୍ଟକୁ ସିଲ୍ କରିଛନ୍ତି ଏବଂ କମ୍ପାନୀକୁ ନୋଟିସ୍ ଜାରି କରି ଅପରାଧିକ କାର୍ଯ୍ୟାନୁଷ୍ଠାନ ପାଇଁ ଚେତାବନୀ ଦେଇଥିଲା ।
ଖବରମୁତାବକ, ମଧ୍ୟପ୍ରଦେଶରେ ଏହି ବିଷାକ୍ତ କଫ ସିରପ୍ ପିଇବା ପରେ ଅନେକ ପିଲାଙ୍କ କିଡନୀ ଫେଲ ହୋଇଛି। ଏପର୍ଯ୍ୟନ୍ତ ଚିକିତ୍ସା ସମୟରେ ମୋଟ ୨୦ଜଣ ପିଲାଙ୍କ ମୃତ୍ୟୁ ହୋଇଛି। କେରଳ ଏବଂ ମଧ୍ୟପ୍ରଦେଶ ସମେତ ଅନେକ ରାଜ୍ୟ ଏହାକୁ ନିଷିଦ୍ଧ କରିଛନ୍ତି। ତାମିଲନାଡୁ ସରକାର ଅକ୍ଟୋବର ୧ ରୁ ‘କୋଲ୍ଡରିଫ୍’ କଫ ସିରପ୍ ବିକ୍ରୟ ଉପରେ ନିଷେଧ କରିଥିଲେ ଏବଂ ବଜାରରୁ ଔଷଧର ଷ୍ଟକ୍ ଅପସାରଣ କରିବାକୁ ନିର୍ଦ୍ଦେଶ ଦେଇଥିଲେ।
ପୋଲିସ ସୂତ୍ର ଅନୁଯାୟୀ, SIT ଦଳ ରଙ୍ଗନାଥନଙ୍କୁ ଚେନ୍ନାଇରୁ ଭୋପାଳ ଆଣୁଛନ୍ତି, ଯେଉଁଠାରେ ତାଙ୍କୁ କଫ ସିରପ ଉତ୍ପାଦନ, କଞ୍ଚାମାଲ ଯୋଗାଣ, ବଣ୍ଟନ ନେଟୱାର୍କ ଏବଂ ଲାଇସେନ୍ସ ସହ ଜଡିତ ଅନିୟମିତତା ବିଷୟରେ ପଚରାଉଚରା କରାଯିବ। ସିରପରେ ମାରାତ୍ମକ ରାସାୟନିକ ପଦାର୍ଥ କିପରି ମିଶାଗଲା ଏବଂ କମ୍ପାନୀର ଗୁଣବତ୍ତା ଯାଞ୍ଚ ପ୍ରକ୍ରିୟାରେ ଏତେ ଗୁରୁତର ତ୍ରୁଟି କାହିଁକି ଘଟିଲା ତାହା ତଦନ୍ତକାରୀ ସଂସ୍ଥାଗୁଡ଼ିକ ଜାଣିବାକୁ ଚେଷ୍ଟା କରୁଛନ୍ତି।
Comments are closed.