Taliban visit India: ନୂଆଦିଲ୍ଲୀରେ ପହଞ୍ଚିଲେ ତାଲିବାନ ବୈଦେଶିକ ମନ୍ତ୍ରୀ,  ଭାରତ-ଆଫଗାନିସ୍ତାନ ସମ୍ପର୍କକୁ ମିଳିବ ନୂଆ ଦିଗ…

ନୂଆଦିଲ୍ଲୀ: ଆଫଗାନିସ୍ତାନର ବୈଦେଶିକ ମନ୍ତ୍ରୀ ଅମୀର ଖାନ ମୁତାକି ଭାରତ ଗସ୍ତରେ ନୂଆଦିଲ୍ଲୀରେ ପହଞ୍ଚିଛନ୍ତି। ଏହି ଗସ୍ତକୁ ଆଶରଫ ଗନି ସରକାରଙ୍କ ପତନର ଚାରି ବର୍ଷ ପରେ ଭାରତ ଏବଂ ଆଫଗାନିସ୍ତାନରେ ତାଲିବାନ ଶାସନ ମଧ୍ୟରେ ଉଚ୍ଚସ୍ତରୀୟ ଯୋଗାଯୋଗର ସବୁଠାରୁ ବଡ଼ ସଙ୍କେତ ବୋଲି ବିବେଚନା କରାଯାଉଛି। ତାଙ୍କ ଗସ୍ତ ସମୟରେ ମୁତାକି ଦାରୁଲ ଉଲୁମ ଦେଓବନ୍ଦ ମଦ୍ରାସା ଏବଂ ତାଜମହଲ ମଧ୍ୟ ପରିଦର୍ଶନ କରିବେ। କିଛି ଆଫଗାନ ଛାତ୍ର ମଧ୍ୟ ଦେଓବନ୍ଦ ମଦ୍ରାସାରେ ପାଠ ପଢ଼ୁଛନ୍ତି।

ମୁତାକି ଗତ ମାସରେ ନୂଆଦିଲ୍ଲୀ ଆସିବାର କାର୍ଯ୍ୟକ୍ରମ ଥିଲା, କିନ୍ତୁ ଜାତିସଂଘ ସୁରକ୍ଷା ପରିଷଦ (UNSC) ଦ୍ୱାରା ଲାଗୁ ହୋଇଥିବା ଯାତ୍ରା ପ୍ରତିବନ୍ଧକ ଯୋଗୁଁ ତାଙ୍କ ଗସ୍ତ ବାତିଲ ହୋଇଥିଲା। ସେପ୍ଟେମ୍ବର ୩୦ ତାରିଖରେ, ଜାତିସଂଘ ସୁରକ୍ଷା ପରିଷଦ କମିଟି ମୁତାକିଙ୍କୁ ଏକ ଅସ୍ଥାୟୀ ଛାଡ ପ୍ରଦାନ କରିଥିଲା, ଯାହା ତାଙ୍କୁ ଅକ୍ଟୋବର ୯ ରୁ ୧୬ ପର୍ଯ୍ୟନ୍ତ ନୂଆଦିଲ୍ଲୀ ଗସ୍ତ କରିବାକୁ ଅନୁମତି ଦେଇଥିଲା। ତେବେ ଆଫଗାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକିଙ୍କ ଭାରତ ଗସ୍ତ ସାତ ଦିନ ପାଇଁ ରହିବ।

ମୁତାକିଙ୍କ ଗସ୍ତ କାବୁଲରେ ତାଲିବାନ ଶାସନ ସହିତ ଭାରତର ସମ୍ପର୍କରେ ଏକ ନୂତନ ଦିଗ ଯୋଡ଼ିବ ବୋଲି ଆଶା କରାଯାଉଛି। ପୂର୍ବରୁ, ବୈଦେଶିକ ମନ୍ତ୍ରୀ ଏସ. ଜୟଶଙ୍କର ମେ ୧୫ ରେ ମୁତାକିଙ୍କ ସହିତ ଫୋନ୍ ମାଧ୍ୟମରେ କଥା ହୋଇଥିଲେ। ଭାରତ ଏପର୍ଯ୍ୟନ୍ତ ତାଲିବାନ ସରକାରକୁ ସ୍ୱୀକୃତି ଦେଇନାହିଁ । ତଥାପି ମାନବିକ ଏବଂ ବିକାଶ ସହଯୋଗ ବୃଦ୍ଧି କରିଛି। ଆଉ ,ଭଳି ସମୟରେ ମୁତାକିଙ୍କ ଗସ୍ତ ଗୁରୁତ୍ୱପୂର୍ଣ୍ଣ କାରଣ ଭାରତ ଏପର୍ଯ୍ୟନ୍ତ ତାଲିବାନ ଶାସନ ସହିତ ସୀମିତ ଯୋଗାଯୋଗ ବଜାୟ ରଖିଛି। ଭାରତ ମୁଖ୍ୟତଃ ଆଫଗାନିସ୍ତାନରେ ମାନବିକ ସହାୟତା ଉପରେ ଧ୍ୟାନ ଦେଇଛି। ଭାରତ ଆତଙ୍କବାଦ, ମହିଳା ଅଧିକାର ଏବଂ ସଂଖ୍ୟାଲଘୁଙ୍କ ବିଷୟରେ ମଧ୍ୟ ଚିନ୍ତା ପ୍ରକାଶ କରିଛି।

ତେବେ କହିରଖୁଛୁ, ଯେ ୨୦୨୧ରେ ତାଲିବାନର କ୍ଷମତାକୁ ଫେରିବା ପରେ ଆଫଗାନିସ୍ତାନର ରାଜନୈତିକ ଦୃଶ୍ୟପଟ ସମ୍ପୂର୍ଣ୍ଣ ପରିବର୍ତ୍ତନ ହୋଇଗଲା। ଆମେରିକା ନେତୃତ୍ୱାଧୀନ ସୈନ୍ୟବାହିନୀ ପ୍ରତ୍ୟାହାର ପରେ, ତାଲିବାନ ଏଠାରେ ଶାସନ ଜାରି ରଖିଛି। ତାଲିବାନ ସରକାରକୁ ବିଶ୍ୱ ସ୍ତରରେ ସରକାରୀ ସ୍ୱୀକୃତି ମିଳିନାହିଁ, ତଥାପି ଭାରତ ସମେତ ଅନେକ ଦେଶ ସୁରକ୍ଷା ଏବଂ ମାନବିକ ଚିନ୍ତାଧାରାକୁ ସମାଧାନ କରିବା ପାଇଁ ଆଲୋଚନାର ପଥ ବଜାୟ ରଖିଛନ୍ତି। ଜୁଲାଇରେ, ରୁଷ ତାଲିବାନ ଶାସନକୁ ଆନୁଷ୍ଠାନିକ ଭାବରେ ସ୍ୱୀକୃତି ପ୍ରଦାନ କରିଥିବା ପ୍ରଥମ ଦେଶ ହୋଇଥିଲା।

ପୂର୍ବରୁ ଭାରତ କାବୁଲରେ ପୂର୍ବ ସରକାରମାନଙ୍କ ସମୟରେ ଆଫଗାନିସ୍ତାନର ପୁନଃନିର୍ମାଣରେ ବହୁ ପରିମାଣରେ ନିବେଶ କରିଥିଲା, ଯେଉଁଥିରେ ଭିତ୍ତିଭୂମି, ସ୍କୁଲ ଏବଂ ହସ୍ପିଟାଲ ନିର୍ମାଣ ଅନ୍ତର୍ଭୁକ୍ତ ଥିଲା। ତାଲିବାନ କ୍ଷମତାକୁ ଆସିବା ପରେ, ନୂଆଦିଲ୍ଲୀ ଆଫଗାନିସ୍ତାନରୁ ଏହାର କୂଟନୀତିଜ୍ଞ ଏବଂ ନାଗରିକମାନଙ୍କୁ ପ୍ରତ୍ୟାହାର କରିନେଇଥିଲା। ପରବର୍ତ୍ତୀ ସମୟରେ, ଭାରତ ମାନବିକ ସହାୟତା ପ୍ରଦାନ ତଦାରଖ କରିବା ଏବଂ ସର୍ବନିମ୍ନ କୂଟନୈତିକ ଉପସ୍ଥିତି ବଜାୟ ରଖିବା ପାଇଁ ୨୦୨୨ରେ କାବୁଲରେ ଏକ ‘ବୈଷୟିକ ମିଶନ’ ପୁଣି ଥରେ ଖୋଲିଥିଲା।