PM Modi meets Sri Lankan PM: ମୋଦୀଙ୍କୁ ଭେଟିଲେ ଶ୍ରୀଲଙ୍କା ପ୍ରଧାନମନ୍ତ୍ରୀ; ଏହି ପ୍ରସଙ୍ଗରେ କଲେ ଆଲୋଚନା…

ନୂଆଦିଲ୍ଲୀ: ଶ୍ରୀଲଙ୍କା ପ୍ରଧାନମନ୍ତ୍ରୀ ହରିନୀ ଅମରସୁରିଆ (Sri Lankan PM Harini Amarasuriy) ବର୍ତ୍ତମାନ ଭାରତ ଗସ୍ତରେ ଅଛନ୍ତି। ତାଙ୍କ ଗସ୍ତ ସମୟରେ ସେ ଶୁକ୍ରବାର ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଥିଲେ। ଦୁଇ ନେତା ବିକାଶ ପ୍ରସଙ୍ଗରେ ସହଯୋଗ ଏବଂ ଭାରତୀୟ ମତ୍ସ୍ୟଜୀବୀଙ୍କ କଲ୍ୟାଣ ସମେତ ବିଭିନ୍ନ ବିଷୟ ଉପରେ ଆଲୋଚନା କରିଥିଲେ। ଶ୍ରୀଲଙ୍କା ପ୍ରଧାନମନ୍ତ୍ରୀ ଅମରସୁରିଆ ପ୍ରଧାନମନ୍ତ୍ରୀ ମୋଦୀଙ୍କୁ ତାଙ୍କ ସରକାରୀ ବାସଭବନରେ ଭେଟିଥିଲେ।

ପ୍ରଧାନମନ୍ତ୍ରୀ ମୋଦୀ ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଏକ ପୋଷ୍ଟରେ କହିଛନ୍ତି,”ଶ୍ରୀଲଙ୍କା ପ୍ରଧାନମନ୍ତ୍ରୀ ହରିନୀ ଅମରସୁରିଆଙ୍କୁ ସ୍ୱାଗତ କରି ମୁଁ ଆନନ୍ଦିତ। ଏହି ବୈଠକରେ ଶିକ୍ଷା, ମହିଳା ସଶକ୍ତିକରଣ, ନବସୃଜନ, ବିକାଶ ପ୍ରସଙ୍ଗରେ ସହଯୋଗ ଏବଂ ଆମର ମତ୍ସ୍ୟଜୀବୀଙ୍କ କଲ୍ୟାଣ ସମେତ ବିଭିନ୍ନ ବିଷୟ ଉପରେ ଆଲୋଚନା କରାଯାଇଥିଲା।” ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ନିକଟତମ ପଡ଼ୋଶୀ ହୋଇଥିବାରୁ ଆମ ଦୁଇ ଦେଶର ଲୋକଙ୍କ ସମୃଦ୍ଧି ପାଇଁ ସହଯୋଗ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

ହରିନୀ ତିନି ଦିନିଆ ଭାରତ ଗସ୍ତରେ ଅଛନ୍ତି । ପ୍ରଧାନମନ୍ତ୍ରୀ ପଦ ଗ୍ରହଣ କରିବା ପରେ ଏହା ତାଙ୍କର ପ୍ରଥମ ଭାରତ ଗସ୍ତ। ସେ ଦିଲ୍ଲୀ ସ୍ଥିତ ଭାରତୀୟ ପ୍ରଯୁକ୍ତିବିଦ୍ୟା ସଂସ୍ଥାନ (IIT) ପରିଦର୍ଶନ କରିଥିଲେ ଏବଂ ଗବେଷକ ଏବଂ ଶିକ୍ଷାବିତଙ୍କ ସହ ଆଲୋଚନା କରିଥିଲେ। ଏହି ପରିଦର୍ଶନର ଉଦ୍ଦେଶ୍ୟ ଥିଲା ରାଜଧାନୀର ଆଧୁନିକ ସ୍କୁଲ ଭିତ୍ତିଭୂମି, ଅଭିନବ ଶିକ୍ଷାଦାନ ପଦ୍ଧତି ଏବଂ ଡିଜିଟାଲ୍ ଶିକ୍ଷା ପରିବେଶକୁ ପର୍ଯ୍ୟବେକ୍ଷଣ କରିବା।

“ଏହି ଗସ୍ତ ଭାରତ ଏବଂ ଶ୍ରୀଲଙ୍କା ମଧ୍ୟରେ ନିୟମିତ ଉଚ୍ଚସ୍ତରୀୟ ଆଦାନପ୍ରଦାନର ପରମ୍ପରାକୁ ଜାରି ରଖିଛି ଓ ଗଭୀର ଏବଂ ବହୁମୁଖୀ ଦ୍ୱିପାକ୍ଷିକ ସହଭାଗୀତାକୁ ଆହୁରି ଆଗକୁ ବଢାଇବ। ଏହା ଭାରତର ‘ମହାସାଗର ଭିଜନ’ ଏବଂ ଏହାର ‘ପଡ଼ୋଶୀ ପ୍ରଥମ’ ନୀତି ଦ୍ୱାରା ଅନୁପ୍ରାଣିତ ବନ୍ଧୁତାର ବନ୍ଧନକୁ ଆହୁରି ମଜବୁତ କରିବ।” ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି।