India-Russia annual summit: ଭାରତ-ରୁଷ ଶିଖର ସମ୍ମିଳନୀ ପୂର୍ବରୁ ରୁଷରେ ଏସ୍ ଜୟଶଙ୍କର…ପୁଟିନଙ୍କୁ ଭେଟି ଦେଲେ ବାର୍ତ୍ତା

ନୂଆଦିଲ୍ଲୀ: ବୈଦେଶିକ ମନ୍ତ୍ରୀ ଏସ ଜୟଶଙ୍କର ମଙ୍ଗଳବାର ଦିନ କ୍ରେମଲିନ୍‌ରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟି ଆଗାମୀ ବାର୍ଷିକ ଭାରତ-ରୁଷ ଶିଖର ସମ୍ମିଳନୀର ପ୍ରସ୍ତୁତି ବିଷୟରେ ସୂଚନା ଦେଇଛନ୍ତି ।ଭାରତ-ରୁଷ ବାର୍ଷିକ ଶିଖର ସମ୍ମିଳନୀ ପୂର୍ବରୁ ଏହି ବୈଠକ ହୋଇଛି । ବୈଠକ ପରେ, ବୈଦେଶିକ ମନ୍ତ୍ରୀ ଜୟଶଙ୍କର ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଲେଖିଛନ୍ତି, “ଆଜି ମସ୍କୋରେ ରୁଷ ରାଷ୍ଟ୍ରପତି ପୁଟିନଙ୍କୁ ଭେଟି ସମ୍ମାନିତ ଅନୁଭବ କରୁଛି । ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶୁଭେଚ୍ଛା ଜଣାଇଲି। ଆଗାମୀ ଭାରତ-ରୁଷ ବାର୍ଷିକ ଶିଖର ସମ୍ମିଳନୀ ପାଇଁ ପ୍ରସ୍ତୁତି ବିଷୟରେ ତାଙ୍କୁ ସୂଚନା ଦେଲି। ମୁଁ ଆଞ୍ଚଳିକ ଏବଂ ବିଶ୍ୱସ୍ତରୀୟ ଘଟଣାବଳୀ ବିଷୟରେ ମଧ୍ୟ ଆଲୋଚନା କଲି।ଆମ ସମ୍ପର୍କକୁ ଆହୁରି ଆଗକୁ ବଢ଼ାଇବା ପାଇଁ ତାଙ୍କର ଦୃଷ୍ଟିକୋଣ ଏବଂ ମାର୍ଗଦର୍ଶନକୁ ଅଧିକ ମହତ୍ତ୍ବ ଦେଉଛି।”

କ୍ରେମଲିନ୍ ଦ୍ୱାରା ପ୍ରକାଶିତ ଫଟୋଗୁଡ଼ିକରେ ପୁଟିନ୍ ଜୟଶଙ୍କରଙ୍କୁ ସ୍ୱାଗତ କରୁଥିବାର ଦେଖାଯାଇଥିଲା, ତାଙ୍କ ସହିତ ଭାରତୀୟ ରାଷ୍ଟ୍ରଦୂତ ବିନୟ କୁମାର ଏବଂ ଯୁଗ୍ମ ସଚିବ ମୟଙ୍କ ସିଂହ ମଧ୍ୟ ଉପସ୍ଥିତ ଥିଲେ।

ସୂଚନାଥାଉକି, ବୈଦେଶିକ ମନ୍ତ୍ରୀ ଜୟଶଙ୍କର ସାଂଘାଇ ସହଯୋଗ ସଂଗଠନ (SCO)ର ଅନ୍ୟ ସରକାରୀ ପ୍ରତିନିଧିମଣ୍ଡଳର ମୁଖ୍ୟମାନଙ୍କ ସହିତ ରାଷ୍ଟ୍ରପତି ପୁଟିନଙ୍କୁ ଭେଟିଥିଲେ। ଏସସିଓ ବୈଠକରେ, ଜୟଶଙ୍କର ଆତଙ୍କବାଦ ଉପରେ ଭାରତର ‘ଶୂନ୍ୟ ସହନଶୀଳତା’ ନୀତିକୁ ଦୋହରାଇଥିଲେ ଏବଂ ସଂଗଠନକୁ ଏହାର ମୂଳ ନୀତିଗୁଡ଼ିକ ପାଳନ କରିବାକୁ ନିବେଦନ କରିଥିଲେ।

ଜୟଶଙ୍କର ଆହୁରି କହିଥିଲେ ଯେ, ଆମେ କେବେବି ଭୁଲିବା ଉଚିତ୍ ନୁହେଁ ଯେ SCO ଆତଙ୍କବାଦ, ବିଚ୍ଛିନ୍ନତାବାଦ ଏବଂ ଉଗ୍ରବାଦର ମୁକାବିଲା ପାଇଁ ପ୍ରତିଷ୍ଠିତ ହୋଇଥିଲା। ସାମ୍ପ୍ରତିକ ବର୍ଷଗୁଡ଼ିକରେ ଏହି ବିପଦଗୁଡ଼ିକ ଆହୁରି ଗମ୍ଭୀର ହୋଇଛି। ସମଗ୍ର ବିଶ୍ୱକୁ ସମସ୍ତ ପ୍ରକାରର ଆତଙ୍କବାଦ ପ୍ରତି ଶୂନ୍ୟ ସହନଶୀଳତାର ନୀତି ଗ୍ରହଣ କରିବାକୁ ପଡିବ। ସେ ସ୍ପଷ୍ଟ ଭାବରେ କହିଥିଲେ ଯେ କୌଣସି ପ୍ରକାରର ଆତଙ୍କବାଦର ଯଥାର୍ଥତା ନାହିଁ, ଏହାକୁ ଅଣଦେଖା କରାଯାଇପାରିବ ନାହିଁ କିମ୍ବା ଏହାକୁ ଘୋଡାଇ ଦିଆଯାଇପାରିବ ନାହିଁ। ଜୟଶଙ୍କର ଏହା ମଧ୍ୟ କହିଛନ୍ତି ଯେ ଭାରତକୁ ତାର ନାଗରିକମାନଙ୍କୁ ସୁରକ୍ଷା ଦେବାର ସମ୍ପୂର୍ଣ୍ଣ ଅଧିକାର ଅଛି ଏବଂ ଯେକୌଣସି ମୂଲ୍ୟରେ ଏହା କରିବ।

SCOର ସଦସ୍ୟ ଦେଶମାନଙ୍କ ମଧ୍ୟରେ ଭାରତ, ରୁଷ, ଚୀନ୍, ପାକିସ୍ତାନ, କଜାକିସ୍ତାନ, କିର୍ଗିଜସ୍ତାନ, ତାଜିକିସ୍ତାନ, ଉଜବେକିସ୍ତାନ, ଇରାନ ଏବଂ ବେଲାରୁସ ଅନ୍ତର୍ଭୁକ୍ତ।