ସ୍ୱାମୀଙ୍କ ଆକ୍ରମଣରେ ଦିଲ୍ଲୀ ପୋଲିସ ମହିଳା କମାଣ୍ଡୋଙ୍କ ମୃତ୍ୟୁ, ୩ ବର୍ଷ ପୂର୍ବେ କରିଥିଲେ ପ୍ରମେ ବିବାହ…
ନୂଆଦିଲ୍ଲୀ: ରାଜଧାନୀ ଦିଲ୍ଲୀରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଦିଲ୍ଲୀ ପୋଲିସ ସ୍ପେଶାଲ ସେଲରେ ନିୟୋଜିତ ମହିଳା କମାଣ୍ଡୋ କାଜଲ (୨୭)ଙ୍କୁ ତାଙ୍କ ସ୍ୱାମୀ ହତ୍ୟା କରିଥିବା ଅଭିଯୋଗ ହୋଇଛି । ପୋଲିସ ଅଭିଯୁକ୍ତ ସ୍ୱାମୀଙ୍କୁ ଗିରଫ କରିଛି ଏବଂ ତଦନ୍ତ ଜାରି ରହିଛି ।
୫ ଦିନ ପୂର୍ବେ, ପଶ୍ଚିମ ଦିଲ୍ଲୀର ମୋହନ ଗାର୍ଡେନ୍ ଅଞ୍ଚଳରେ କାଜଲଙ୍କୁ ତାଙ୍କ ସ୍ୱାମୀ ଜିମ୍ ରେ ବ୍ୟବହୃତ ଏକ ଲୁହା ଡମ୍ବଲ୍ ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ । କାଜଲଙ୍କ ମୁଣ୍ଡରେ ଗମ୍ଭୀର ଆଘାତ ଲାଗିଥିଲା ଏବଂ ସେବେଠାରୁ ସେ କୋମାରେ ଥିଲେ । ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ସକାଳେ ତାଙ୍କର ମୃତ୍ୟୁ ଘଟିଛି ।
କାଜଲଙ୍କ ବଡ ଭାଇ ନିଖିଲ ଯିଏ କି ଖୋଦ ନିଜେ ଦିଲ୍ଲୀ ପୋଲିସର ପାର୍ଲିଆମେଣ୍ଟ ଷ୍ଟ୍ରିଟ୍ ପୋଲିସ ଷ୍ଟେସନରେ କାର୍ଯ୍ୟରତ ଅଛନ୍ତି । ସେହି ଦିନର ସମ୍ପୂର୍ଣ୍ଣ କାହାଣୀ ପ୍ରକାଶ କରିଛନ୍ତି, ସେ କହିଛନ୍ତି ଯେ, ଜାନୁଆରୀ ୨୨ ତାରିଖରେ କାଜଲଙ୍କ ସ୍ବାମୀ ଅଙ୍କୁର ତାଙ୍କୁ ଫୋନ୍ କରିଥିଲେ । ସେତେବେଳେ ଦୁହେଁ ଝଗଡ଼ା କରୁଥିଲେ । ଅଙ୍କୁର ନିଖିଲଙ୍କୁ କଲ୍ ରେକର୍ଡ କରିବାକୁ କହିଥିଲେ । ନିଖିଲ କହିଥିଲେ, “କଲ୍ ସମୟରେ, ମୁଁ କାଜଲଙ୍କ ଚିତ୍କାର ଶୁଣିପାରିଲି । କଲ୍ କାଟି ଦିଆଯାଇଥିଲା, ଏବଂ ପାଞ୍ଚ ମିନିଟ୍ ପରେ ଅଙ୍କୁର ପୁଣି ଥରେ ଫୋନ୍ କରି କହିଥିଲେ ଯେ ସେ କାଜଲଙ୍କୁ ହତ୍ୟା କରିଛନ୍ତି।”
ନିଖିଲ କହିଥିଲେ ଯେ, କାଜଲ ଏବଂ ଅଙ୍କୁର ୨୦୨୩ରେ ପ୍ରେମ ବିବାହ କରିଥିଲେ । ସେମାନଙ୍କର ଏକ ଦେଢ଼ ବର୍ଷର ପୁଅ ଅଛି । ତଥାପି, ଅଭିଯୋଗ ହୋଇଛି ଯେ ବିବାହର କିଛି ସମୟ ପରେ, ଅଙ୍କୁରଙ୍କ ପରିବାର ଯୌତୁକ ପାଇଁ କାଜଲଙ୍କୁ ହଇରାଣ କରିବା ଆରମ୍ଭ କରିଥିଲେ । ବିବାଦ ବଢ଼ିବା ପରେ, ସେମାନେ ସୋନିପତର ଗନୌରରୁ ଦିଲ୍ଲୀର ମୋହନ ଗାର୍ଡେନକୁ ଚାଲି ଆସିଥିଲେ । କିନ୍ତୁ, ଅଙ୍କୁରଙ୍କ ଚାପ ଯୋଗୁଁ ସେମାନେ ଫେରି ଆସିଥିଲେ । କାଜଲ ଜାନୁଆରୀ ୨୦ ତାରିଖରେ ଜାନୁଆରୀ ୨୬ (ଗଣତନ୍ତ୍ର ଦିବସ) ରେ ଡ୍ୟୁଟି ପାଇଁ ଦିଲ୍ଲୀ ଆସିଥିଲେ, ଯେଉଁଠାରେ ଏହି ଭୟଙ୍କର ଘଟଣା ଘଟିଥିଲା ।
କାଜଲଙ୍କୁ ପ୍ରଥମେ ମୋହନ ଗାର୍ଡେନର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା, କିନ୍ତୁ ତାଙ୍କ ଅବସ୍ଥା ଆହୁରି ଖରାପ ହେବାରୁ ତାଙ୍କୁ ଜାନୁଆରୀ ୨୪ ତାରିଖରେ ଗାଜିଆବାଦର ଯଶୋଦା ହସ୍ପିଟାଲ (ନେହେରୁ ନଗର)କୁ ସ୍ଥାନାନ୍ତର କରାଯାଇଥିଲା । ମଙ୍ଗଳବାର ସକାଳ ପ୍ରାୟ ୬ଟାରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ । ଗାଜିଆବାଦର ସିହାନି ଗେଟ୍ ପୋଲିସ ଦିଲ୍ଲୀ ପୋଲିସକୁ କାଜଲଙ୍କ ମୃତ୍ୟୁ ସମ୍ପର୍କରେ ସୂଚନା ଦେଇଥିଲା ।
ପ୍ରଥମେ, ମୋହନ ଗାର୍ଡେନ୍ ପୋଲିସ ଅଙ୍କୁରଙ୍କ ବିରୋଧରେ ହତ୍ୟା ଉଦ୍ୟମ ମାମଲା ରୁଜୁ କରିଥିଲା । ଏବେ, କାଜଲଙ୍କ ମୃତ୍ୟୁ ପରେ, ପୋଲିସ ମାମଲାରେ ଧାରା ୩୦୨ (ହତ୍ୟା) ଯୋଡିବ । ତଥାପି, ପରିବାର ଦ୍ୱାରା ଯୌତୁକ ନିର୍ଯାତନା ଅଭିଯୋଗ ସତ୍ତ୍ୱେ, ଯୌତୁକ ସମ୍ବନ୍ଧୀୟ ଧାରା ଏପର୍ଯ୍ୟନ୍ତ ଏଫଆଇଆରରେ ଯୋଡା ଯାଇନାହିଁ । ପୋଲିସ ଏହି ମାମଲାର ପୁଙ୍ଖାନୁପୁଙ୍ଖ ତଦନ୍ତ କରୁଛି ।