Israel’s Foreign Minister : ଇସ୍ରାଏଲୀ ବୈଦେଶିକ ମନ୍ତ୍ରୀ କଲେ ସ୍ପଷ୍ଟ ;ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ ପରେ ନିଷ୍ପତ୍ତି…

ନୂଆଦିଲ୍ଲୀ:ଇସ୍ରାଏଲର ବୈଦେଶିକ ମନ୍ତ୍ରୀ ଗିଦୋନ ସାର ଶୁକ୍ରବାର ଦିନ ଏକ ଗୁରୁତ୍ୱପୂର୍ଣ୍ଣ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ ଇରାନ ଉପରେ ବିମାନ ଆକ୍ରମଣ ବିଷୟରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପୂର୍ବରୁ ସୂଚନା ଦିଆଯାଇ ନଥିଲା। କାରଣ ମୋଦୀଙ୍କ ଇସ୍ରାଏଲ ଗସ୍ତ ଶେଷ ହେବା ପରେ ହିଁ ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରିବାର ନିଷ୍ପତ୍ତି ନିଆଯାଇଥିଲା।

ପ୍ରଧାନମନ୍ତ୍ରୀ ମୋଦୀ ଇସ୍ରାଏଲକୁ ଦୁଇ ଦିନିଆ ଗସ୍ତ କରିଥିଲେ , ଏହି ଯାତ୍ରା ୨୬ ଫେବୃଆରୀ, ୨୦୨୬ ରେ ଶେଷ ହୋଇଥିଲା। ଏହି ଗସ୍ତର ଦୁଇ ଦିନ ପରେ ଫେବୃଆରୀ ୨୮ ତାରିଖରେ ଇସ୍ରାଏଲ ଏବଂ ଆମେରିକା ଇରାନ ବିରୁଦ୍ଧରେ ଏକ ମିଳିତ ସାମରିକ ଆକ୍ରମଣ ଆରମ୍ଭ କରିଥିଲେ। ଏହି ଆକ୍ରମଣରେ ଇରାନର ସର୍ବୋଚ୍ଚ ନେତା ଅୟାତୁଲ୍ଲା ଅଲି ଖାମେନିଙ୍କ ମୃତ୍ୟୁ ଘଟିଥିଲା। ଆମେରିକା ଏବଂ ଇରାନର ଏହି ମିଳିତ ସାମରିକ କାର୍ଯ୍ୟାନୁଷ୍ଠାନ ମଧ୍ୟପ୍ରାଚ୍ୟକୁ ଏକ ବଡ଼ ଯୁଦ୍ଧ ଆଡ଼କୁ ଠେଲି ଦେଇଛି।

ରାୟସିନା ଡାଏଲଗରେ ଭର୍ଚୁଆଲ୍ ଭାବରେ ଅଂଶଗ୍ରହଣ କରି ଗିଦୋନ ସାର କହିଛନ୍ତି ଯେ, ଇସ୍ରାଏଲର ମୋଦୀ ଏବଂ ଭାରତ ସହିତ “ବହୁତ ଭଲ ସମ୍ପର୍କ” ରହିଛି, ଯାହା ଗତ କିଛି ବର୍ଷ ମଧ୍ୟରେ ଆହୁରି ଗଭୀର ହୋଇଛି। ସେ ଆହୁରି ମଧ୍ୟ କହିଛନ୍ତି, “କିନ୍ତୁ ଶନିବାର ସକାଳେ ନିଷ୍ପତ୍ତି ନିଆଯାଇଥିବାରୁ ଆମେ ପ୍ରଧାନମନ୍ତ୍ରୀ ମୋଦୀଙ୍କୁ ଏ ବିଷୟରେ ଜଣାଇପାରିଲୁ ନାହିଁ।”

ସାର ସୂଚିତ କରିଛନ୍ତି ଯେ, ଆକ୍ରମଣ ଆରମ୍ଭ କରିବାର ନିଷ୍ପତ୍ତି ଆମେରିକା ଏବଂ ଇରାନ ମଧ୍ୟରେ ଆଲୋଚନା ବିଫଳ ହେବା ଯୋଗୁଁ ନିଆଯାଇଥିଲା। ସାର କହିଛନ୍ତି ଯେ ଇରାନ ତାର ପରମାଣୁ କାର୍ଯ୍ୟକ୍ରମ ଜାରି ରଖିଛି, ବାଲିଷ୍ଟିକ୍ କ୍ଷେପଣାସ୍ତ୍ର ବିକଶିତ କରୁଛି ଏବଂ ହିଜବୋଲ୍ଲା, ହମାସ ଏବଂ ହୁତିମାନଙ୍କୁ ସମର୍ଥନ କରୁଛି। ସେ କହିଛନ୍ତି ଯେ ହୁଏତ ଆମେ ଇରାନରେ ଶାସନ ପରିବର୍ତ୍ତନ ଦେଖିବୁ।

ଇସ୍ରାଏଲୀ ବୈଦେଶିକ ମନ୍ତ୍ରୀଙ୍କ ଏହି ବୟାନ ଏପରି ଏକ ସମୟରେ ଆସିଛି ଯେତେବେଳେ ଏହି ପ୍ରସଙ୍ଗ ଭାରତରେ ରାଜନୈତିକ ବିତର୍କ ଆରମ୍ଭ କରିଛି। କେତେକ ଲୋକ ପ୍ରଶ୍ନ କରୁଛନ୍ତି ଯେ ମୋଦୀଙ୍କ ଗସ୍ତ ପରେ ଏତେ ଶୀଘ୍ର ଆକ୍ରମଣ କାହିଁକି ହେଲା। ଇସ୍ରାଏଲ ନିଜେ ଏବେ ସ୍ପଷ୍ଟ କରିଛି ଯେ ଗସ୍ତ ପରେ ନିଷ୍ପତ୍ତି ନିଆଯାଇଥିଲା, ତେଣୁ ଭାରତକୁ ପୂର୍ବରୁ କୌଣସି ସୂଚନା ନଥିଲା।

ବ୍ୟାପକ ଅଞ୍ଚଳର ପରିସ୍ଥିତି ବିଷୟରେ ସାର କହିଛନ୍ତି ଯେ, ଇରାନ ସମର୍ଥିତ ଗୋଷ୍ଠୀ ହିଜବୋଲ୍ଲା ଯୁଦ୍ଧରେ ଯୋଗଦେବା ପରଠାରୁ ସଂଘର୍ଷ ବୃଦ୍ଧି ପାଇଛି। ସେ କହିଛନ୍ତି ଯେ ହିଜବୋଲ୍ଲା ପ୍ରାୟ ତିନି ଦିନ ପୂର୍ବେ ଲେବାନନ ଏବଂ ଲେବାନନ ଲୋକଙ୍କ ଇଚ୍ଛା ଏବଂ ସ୍ୱାର୍ଥ ବିରୁଦ୍ଧରେ ଯୁଦ୍ଧରେ ଯୋଗଦେବାକୁ ନିଷ୍ପତ୍ତି ନେଇଥିଲା। କାରଣ ସେମାନେ ସ୍ପଷ୍ଟ ଭାବରେ ତେହେରାନରୁ ନିର୍ଦ୍ଦେଶ ପାଇଥିଲେ ଏବଂ ଲେବାନନର ଲାଭ ପାଇଁ ନୁହେଁ, ବରଂ ଇରାନର ଲାଭ ପାଇଁ କାମ କରୁଥିଲେ।

ସାରଙ୍କ ଅନୁସାରେ, ହିଜବୋଲ୍ଲା ଇସ୍ରାଏଲର ଜନବସତି ଅଞ୍ଚଳରେ, ବିଶେଷକରି ଉତ୍ତର ଇସ୍ରାଏଲରେ କ୍ଷେପଣାସ୍ତ୍ର ଏବଂ ଡ୍ରୋନ ନିକ୍ଷେପ କରୁଥିଲା। ସେ କହିଛନ୍ତି, “ସେମାନେ ଆମର ଜନବସତି ଅଞ୍ଚଳରେ, ବିଶେଷକରି ଆମ ଦେଶର ଉତ୍ତର ଭାଗରେ କ୍ଷେପଣାସ୍ତ୍ର ଏବଂ ଡ୍ରୋନ ନିକ୍ଷେପ କରୁଛନ୍ତି, ଏବଂ ଏହା ସ୍ପଷ୍ଟ ଯେ ଏହା ଏକପାଖିଆ ହେବ ନାହିଁ।”