ନୂଆଦିଲ୍ଲୀ: ପାକିସ୍ତାନ ସାଉଦି ଆରବଠାରୁ ଗୁରୁତ୍ୱପୂର୍ଣ୍ଣ ଆର୍ଥିକ ସହାୟତା ପାଇଁ ଅନୁରୋଧ କରିଛି । ବିଶ୍ୱସ୍ତ ସୂତ୍ର ଅନୁଯାୟୀ, ପାକିସ୍ତାନ ସରକାର ସାଉଦି ଆରବକୁ ୮ଟି ପ୍ରମୁଖ ଅନୁରୋଧ କରିଛନ୍ତି । ଏଥିରେ ମୁଖ୍ୟତଃ ୫ ବିଲିୟନ ଡଲାର ଜମାକୁ ୧୦ ବର୍ଷର ଦୀର୍ଘକାଳୀନ ସୁବିଧାରେ ପରିଣତ କରିବା ଏବଂ ତୈଳ ଯୋଗାଣ ପାଇଁ ବିଳମ୍ବିତ ଦେୟ ସୁବିଧାକୁ ୧.୨ ବିଲିୟନ ଡଲାରରୁ ୫ ବିଲିୟନ ଡଲାରକୁ ବୃଦ୍ଧି କରିବା ଅନ୍ତର୍ଭୁକ୍ତ ।
ପାକିସ୍ତାନ ଚାହୁଁଛି ଯେ ସାଉଦି ଆରବ ଷ୍ଟେଟ୍ ବ୍ୟାଙ୍କ ଅଫ୍ ପାକିସ୍ତାନରେ ଥିବା ଏହାର 5 ବିଲିୟନ ଡଲାର ଜମାକୁ ଏକ କ୍ଷଣସ୍ଥାୟୀ ରୁ 10 ବର୍ଷର ଦୀର୍ଘକାଳୀନ ସୁବିଧାରେ ପରିବର୍ତ୍ତନ କରୁ ଯାହା ଦ୍ଵାରା ବୈଦେଶିକ ମୁଦ୍ରା ଭଣ୍ଡାର ଉପରେ ଚାପ କମ ହେବ ଏବଂ ମହଙ୍ଗା ବିଦେଶୀ ଋଣ ଏଡେଇବ।
ବିଲମ୍ବିତ ଦେୟ ଉପରେ ତୈଳ ସୁବିଧାକୁ ୫ ବିଲିୟନ ଡଲାର ବୃଦ୍ଧି କରିବା ଏବଂ ପରିଶୋଧ ଅବଧିକୁ ଏକ ବର୍ଷରୁ ୩ ବର୍ଷକୁ ବୃଦ୍ଧି କରିବାର ପ୍ରସ୍ତାବ ମଧ୍ୟ ରହିଛି । ପାକିସ୍ତାନ ବିଦେଶୀ ପାକିସ୍ତାନୀମାନଙ୍କ ଠାରୁ ପଠାଯାଇଥିବା ଟଙ୍କା (୧୦ ବିଲିୟନ ଡଲାର ପର୍ଯ୍ୟନ୍ତ) ଏବଂ ଅନ୍ୟାନ୍ୟ କ୍ଷେତ୍ରଗୁଡ଼ିକୁ ସୁରକ୍ଷିତ କରିବାରେ ମଧ୍ୟ ସହଯୋଗ ଲୋଡିଛି ।
ଶାହବାଜ ସରକାର ସାଉଦି ଆରବକୁ ପାକିସ୍ତାନ ସହିତ ଜଡିତ ଆମଦାନୀ କାରବାର ପାଇଁ ବ୍ୟାଙ୍କ ଗ୍ୟାରେଣ୍ଟି ଆବଶ୍ୟକତାକୁ ସହଜ କରିବା ଏବଂ ସାଉଦି ସାର୍ବଭୌମ ସମ୍ପତ୍ତି ପାଣ୍ଠି, ପବ୍ଲିକ୍ ଇନଭେଷ୍ଟମେଣ୍ଟ ଫଣ୍ଡ ମାଧ୍ୟମରେ ନିବେଶ ସୁଯୋଗ ଅନୁସନ୍ଧାନ କରିବାକୁ ମଧ୍ୟ ଅନୁରୋଧ କରିଛନ୍ତି ।
ପାକିସ୍ତାନ ଏବଂ ସାଉଦି ଆରବ ଏକ ବ୍ୟାପକ ଆର୍ଥିକ ସହଭାଗୀତା ପାଇଁ ଆଲୋଚନା କରୁଛନ୍ତି । ସାମ୍ପ୍ରତିକ ଆଞ୍ଚଳିକ ଉତ୍ତେଜନା ଉଚ୍ଚସ୍ତରୀୟ ଆଲୋଚନାକୁ ତ୍ୱରାନ୍ୱିତ କରିଛି । ତଥାପି, ଏହି ପ୍ରସ୍ତାବଗୁଡ଼ିକ ଉପରେ ରିୟାଦରୁ ତୁରନ୍ତ କୌଣସି ସରକାରୀ ପ୍ରତିକ୍ରିୟା ମିଳିନାହିଁ ।
ପାକିସ୍ତାନ ଏହାର ଅର୍ଥନୀତି ଉପରେ ବାହ୍ୟ ଚାପ ମଧ୍ୟରେ ଅତିରିକ୍ତ ଆର୍ଥିକ ସ୍ଥିରତା ହାସଲ କରିବା ପାଇଁ ଏହାର ୭ ବିଲିୟନ ଡଲାରର ବିସ୍ତାରିତ ପାଣ୍ଠି ସୁବିଧା କାର୍ଯ୍ୟକ୍ରମର ତୃତୀୟ ସମୀକ୍ଷା ସମାପ୍ତ କରିବା ପାଇଁ IMF ସହିତ ଆଲୋଚନା କରୁଛି ।