ଆପ୍ ସାଂସଦଙ୍କ ଦଳବଦଳ ପରେ ରାଜ୍ୟସଭାରେ ବଢ଼ିଲା ଏନଡିଏର ଶକ୍ତି: ବହୁମତଠାରୁ କେତେ ଆସନ ଦୂରରେ?
ନୂଆଦିଲ୍ଲୀ: ରାଜ୍ୟସଭାରେ ଆମ ଆଦମୀ ପାର୍ଟି (ଆପ୍)ର ୭ ଜଣ ସାଂସଦ ଦଳ ଛାଡ଼ି ବିଜେପିରେ ଯୋଗଦେବା ପରେ ଶାସକ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ)ର ଶକ୍ତି ରାଜ୍ୟସଭାରେ ଢେର ବୃଦ୍ଧି ପାଇଛି। ଏହି ଦଳବଦଳ ପରେ ଏନଡିଏ ଏବେ ରାଜ୍ୟସଭାରେ ଦୁଇ-ତୃତୀୟାଂଶ ବହୁମତ ହାସଲ କରିବା ଦିଗରେ ଆଉ ପାଦେ ଆଗେଇ ଯାଇଛି। ଏହି ବିଶେଷ ସଂଖ୍ୟାଗରିଷ୍ଠତା ହାସଲ କରିବାଠାରୁ ଶାସକ ମେଣ୍ଟ ଏବେ ମାତ୍ର ୧୭ଟି ଆସନ ଦୂରରେ ରହିଛି।
ସଂସଦର ଉଚ୍ଚ ସଦନ ବା ରାଜ୍ୟସଭାରେ ମୋଟ ଆସନ ସଂଖ୍ୟା ୨୪୪ ରହିଛି। ସରକାର ଗଢ଼ିବା କିମ୍ବା ସାଧାରଣ ବିଲ୍ ପାସ୍ କରିବା ପାଇଁ ଏକ ସାଧାରଣ ବହୁମତ ଯଥେଷ୍ଟ, କିନ୍ତୁ କୌଣସି ଗୁରୁତ୍ୱପୂର୍ଣ୍ଣ ସମ୍ବିଧାନ ସଂଶୋଧନ ବିଲ୍ ପାରିତ କରିବା ପାଇଁ ଦୁଇ-ତୃତୀୟାଂଶ ଅର୍ଥାତ୍ ୧୬୩ ଜଣ ସଦସ୍ୟଙ୍କ ସମର୍ଥନ ଆବଶ୍ୟକ ହୋଇଥାଏ।
ଆପ୍ରୁ ଅଲଗା ହୋଇଥିବା ୭ ଜଣ ସାଂସଦ ଏକାଠି ବିଜେପି ସହ ମିଶିବା ପରେ ଏବେ ରାଜ୍ୟସଭାରେ କେବଳ ବିଜେପିର ନିଜସ୍ୱ ସଦସ୍ୟ ସଂଖ୍ୟା ୧୦୬ ରୁ ୧୧୩କୁ ବୃଦ୍ଧି ପାଇଛି। ସେହିପରି ସହଯୋଗୀ ଦଳ (ଯେପରିକି ଜେଡିୟୁ, ଏଆଇଏଡିଏମକେ) ଏବଂ ମନୋନୀତ ସଦସ୍ୟଙ୍କ ସମର୍ଥନକୁ ମିଶାଇ ଏନଡିଏର ମୋଟ ସଂଖ୍ୟା ପ୍ରାୟ ୧୪୬ ଛୁଇଁଛି। ତେଣୁ ୧୬୩ ଆକଳନ ଛୁଇଁବା ପାଇଁ ଶାସକ ମେଣ୍ଟକୁ ଆଉ ମାତ୍ର ୧୭ଟି ଆସନର ଆବଶ୍ୟକତା ରହିଛି। ଆଗାମୀ ଦିନରେ ଖାଲି ପଡ଼ିବାକୁ ଥିବା ଆସନଗୁଡ଼ିକରୁ ବିଜେପି ଆହୁରି କିଛି ସିଟ୍ ଦଖଲ କରିବାର ସମ୍ଭାବନା ରହିଥିବାରୁ ଏହି ଲକ୍ଷ୍ୟ ପୂରଣ ହେବା ସହଜ ମନେହେଉଛି।
ଏହି ସଂଖ୍ୟା ଶାସକ ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସୂଚନାଯୋଗ୍ୟ ଯେ, ମହିଳା ସଂରକ୍ଷଣ ତଥା ଲୋକସଭା ଆସନ ସଂଖ୍ୟା ବୃଦ୍ଧି କରିବା ପାଇଁ ଉଦ୍ଦିଷ୍ଟ ଡିଲିମିଟେସନ୍ ସମ୍ବନ୍ଧୀୟ ୧୩୧ତମ ସମ୍ବିଧାନ ସଂଶୋଧନ ବିଲ୍ ନିକଟରେ ବିରୋଧୀଙ୍କ ହଟ୍ଟଗୋଳ ଏବଂ ସଂଖ୍ୟାବଳ ଅଭାବରୁ ଲୋକସଭା ପରେ ରାଜ୍ୟସଭାରେ ଅଟକି ରହିବାର ଆଶଙ୍କା ସୃଷ୍ଟି ହୋଇଥିଲା। ତେଣୁ ରାଜ୍ୟସଭାରେ ଏହି ମ୍ୟାଜିକ୍ ନମ୍ବର ଛୁଇଁଲେ ଶାସକ ଦଳ ପାଇଁ ବିନା ବାଧାରେ ଆଇନ ପ୍ରଣୟନ ଅଧିକ ସହଜ ହୋଇଯିବ।
ଉଲ୍ଲେଖଯୋଗ୍ୟ, ରାଘବ ଚଢ଼ାଙ୍କ ନେତୃତ୍ୱରେ ହୋଇଥିବା ଏହି ବିଦ୍ରୋହ ଆମ ଆଦମୀ ପାର୍ଟି ପାଇଁ ଏକ ବଡ଼ ରାଜନୈତିକ ଝଟକା। ରାଜ୍ୟସଭାରେ ଆପ୍ର ୧୦ ଜଣ ସାଂସଦ ଥିବା ବେଳେ ଏବେ ସେଥିରୁ ୭ ଜଣ (ରାଘବ ଚଢ଼ା, ସନ୍ଦୀପ ପାଠକ, ଅଶୋକ ମିତ୍ତଲ, ସ୍ୱାତୀ ମାଲିୱାଲ୍, ହରଭଜନ ସିଂହ ଆଦି) ବିଜେପିରେ ସାମିଲ ହୋଇଛନ୍ତି। ଫଳରେ ଆପ୍ର ସଦସ୍ୟ ସଂଖ୍ୟା ମାତ୍ର ୩କୁ ଖସି ଆସିଛି।
ସମ୍ବିଧାନର ଦଶମ ଅନୁସୂଚୀ ଅନୁଯାୟୀ, ଦଳର ଏକ-ତୃତୀୟାଂଶ ନୁହେଁ ବରଂ ଦୁଇ-ତୃତୀୟାଂଶ ବା ତଦୁର୍ଦ୍ଧ୍ୱ ସଦସ୍ୟ ଏକାଠି ଦଳବଦଳ କରି ଅନ୍ୟ ଦଳରେ ମିଶିଲେ ସେମାନଙ୍କ ଉପରେ ‘ଦଳବଦଳ ନିରୋଧୀ ଆଇନ’ (Anti-Defection Law) ଲାଗୁ ହୁଏନାହିଁ ଏବଂ ସେମାନଙ୍କ ସାଂସଦ ପଦବୀ ରଦ୍ଦ ହୁଏନାହିଁ। ୧୦ ରୁ ୭ ଜଣ ସାଂସଦ ବାହାରିଥିବାରୁ ଏହି ନିୟମର ଫାଇଦା ଉଠାଇ ଆପ୍ ସାଂସଦମାନେ ସୁରକ୍ଷିତ ଭାବେ ବିଜେପିରେ ସାମିଲ ହୋଇପାରିଛନ୍ତି। ଏହି ଘଟଣା ପରେ ଇଣ୍ଡି ମେଣ୍ଟ ତଥା ବିରୋଧୀ ଶିବିରର ସଦସ୍ୟ ସଂଖ୍ୟା ୮୪ ରୁ ଖସି ୭୭ ରେ ପହଞ୍ଚିଛି।
