ବଲିଉଡରେ ଏବେ ବି ଲମ୍ବିଛି ଦାଉଦ୍ର ଦାଦାଗିରି: ମାୟାନଗରୀ ଓ ଅଣ୍ଡରୱାର୍ଲ୍ଡର ଅନ୍ଧାରୀ ସମ୍ପର୍କର ଗୁମର
ମୁମ୍ବାଇ: ମୁମ୍ବାଇର ମାୟାନଗରୀ ବା ବଲିଉଡ୍। ବାହାରକୁ ଏହା ଯେତିକି ଚକାଚକ୍ ଦିଶେ, ଏହା ଭିତରର କାହାଣୀ ସେତିକି ଅନ୍ଧକାର। ଆଉ ଏହି ଅନ୍ଧାର ସାମ୍ରାଜ୍ୟର ସବୁଠାରୁ ବଡ଼ ନାଁ ହେଉଛି ଅଣ୍ଡରୱାର୍ଲ୍ଡ ଡନ୍ ଦାଉଦ୍ ଇବ୍ରାହିମ୍। ଗୋଟିଏ ସମୟ ଥିଲା ଯେତେବେଳେ ବଲିଉଡ୍ରେ ଦାଉଦ୍ର ନାଁ ଶୁଣିଲେ ବଡ଼ ବଡ଼ ସୁପରଷ୍ଟାରଙ୍କ ଝାଳ ବୋହି ଯାଉଥିଲା। ଆଜି ବୋଧହୁଏ ସମୟ ବଦଳିଛି। ଇଣ୍ଡଷ୍ଟ୍ରି କର୍ପୋରେଟ୍ ହୋଇଯାଇଛି। କିନ୍ତୁ ପ୍ରଶ୍ନ ଉଠୁଛି, କ’ଣ ସତରେ ବଲିଉଡ୍ ଉପରୁ ଦାଉଦ୍ର ଦବଦବା ସମ୍ପୂର୍ଣ୍ଣ ହଟିଯାଇଛି? ବିଭିନ୍ନ ରିପୋର୍ଟରୁ ଜଣାପଡୁଛି ଯେ, ଆଜି ବି ବଲିଉଡ୍ ଉପରେ ଦାଉଦ୍ ଏବଂ ତା’ର ଡି-କମ୍ପାନୀର ଛାଇ କେଉଁଠି ନା କେଉଁଠି ରହିଛି।
୮୦ ଏବଂ ୯୦ ଦଶକର କଥା ମନେ ପକାନ୍ତୁ। ସେତେବେଳେ ଫିଲ୍ମ ନିର୍ମାଣ ପାଇଁ ଅଧିକାଂଶ ଅର୍ଥ ଆସୁଥିଲା ଅଣ୍ଡରୱାର୍ଲ୍ଡରୁ। ଦୁବାଇରେ ହେଉଥିବା ଦାଉଦ୍ର ଆଲିସାନ୍ ପାର୍ଟିରେ ବଲିଉଡ୍ ତାରକାମାନଙ୍କ ଭିଡ଼ ଜମୁଥିଲା। ଏହା କୌଣସି ଲୁଚାଛପା କଥା ନଥିଲା। ଷ୍ଟାର୍ମାନେ ଡନ୍ଙ୍କ ସହ ଫଟୋ ଉଠାଇବାକୁ ଗର୍ବ ମନେ କରୁଥିଲେ କିମ୍ବା ଭୟରେ ବାଧ୍ୟ ହେଉଥିଲେ ଯୋଗଦେବାକୁ। ସେତେବେଳେ ଡି-କମ୍ପାନୀ ହିଁ ସ୍ଥିର କରୁଥିଲା କେଉଁ ଫିଲ୍ମରେ କିଏ ହିରୋ ହେବ, କାହାକୁ କେତେ ଟଙ୍କା ମିଳିବ ଏବଂ ଫିଲ୍ମର ରିଲିଜ୍ ଡେଟ୍ କ’ଣ ରହିବ। ନିର୍ଦ୍ଦେଶ ନ ମାନିଲେ ସିଧାସଳଖ ଗୁଳି ଚାଲୁଥିଲା। ଟି-ସିରିଜ୍ ମାଲିକ ଗୁଲଶନ୍ କୁମାରଙ୍କ ହତ୍ୟା ଏହାର ଏକ ଜ୍ୱଳନ୍ତ ଉଦାହରଣ।
ଆଜିର ବଲିଉଡ୍ରେ ବଡ଼ ବଡ଼ ଷ୍ଟୁଡିଓ ଏବଂ ବ୍ୟାଙ୍କ ଫିଲ୍ମରେ ପଇସା ଲଗାଉଛନ୍ତି। ଫିଲ୍ମ ଫାଇନାନ୍ସିଂ ବ୍ୟବସ୍ଥା ସ୍ୱଚ୍ଛ ହୋଇଛି। ତଥାପି, ଅଣ୍ଡରୱାର୍ଲ୍ଡର ନେଟୱର୍କ ସମ୍ପୂର୍ଣ୍ଣ ରୂପେ ଭାଙ୍ଗିଯାଇ ନାହିଁ। ଦାଉଦ୍ ପାକିସ୍ତାନରେ ଲୁଚି ରହିଥିଲେ ମଧ୍ୟ ତା’ର ସ୍ଲିପର୍ ସେଲ୍ ଏବଂ ଗୁଣ୍ଡାମାନେ ଏବେ ବି ସକ୍ରିୟ ଅଛନ୍ତି। ବଲିଉଡ୍ର ଅନେକ ପ୍ରଯୋଜକ ଏବଂ ବିଲ୍ଡରଙ୍କ ସହ ଡି-କମ୍ପାନୀର ବେନାମୀ ଟ୍ରାଞ୍ଜାକ୍ସନ୍ ଚାଲିଥିବା ନେଇ ଗୁଇନ୍ଦା ବିଭାଗ ବାରମ୍ବାର ସତର୍କ କରାଇ ଆସୁଛି। ବିଦେଶରେ ଫିଲ୍ମର ଡିଷ୍ଟ୍ରିବ୍ୟୁସନ ଏବଂ ବେଟିଂ ଆପ୍ ମାଧ୍ୟମରେ ଅଣ୍ଡରୱାର୍ଲ୍ଡର କଳା ଟଙ୍କା ଏବେ ବି ଧଳା ହେଉଥିବାର ସନ୍ଦେହ କରାଯାଉଛି।
ନିକଟ ଅତୀତରେ ସଲମାନ ଖାନଙ୍କୁ ବାରମ୍ବାର ମିଳୁଥିବା ହତ୍ୟା ଧମକ, ଘର ବାହାରେ ଫାୟାରିଂ ଏବଂ ପଞ୍ଜାବୀ ଗାୟକଙ୍କ ହତ୍ୟାକାଣ୍ଡ ଏହି ଆଶଙ୍କାକୁ ଆହୁରି ଦୃଢ଼ କରୁଛି। ବର୍ତ୍ତମାନ ଲରେନ୍ସ ବିଷ୍ଣୋଇ ଭଳି ନୂଆ ଗ୍ୟାଙ୍ଗଷ୍ଟରଙ୍କ ନାଁ ସାମ୍ନାକୁ ଆସୁଛି ସତ, କିନ୍ତୁ ବଲିଉଡ୍କୁ ଧମକାଇ ପ୍ରୋଟେକ୍ସନ୍ ମନି ବା ଚାନ୍ଦା ଆଦାୟ କରିବାର ଏହି ‘ମଡେଲ୍’ ବା ଟ୍ରେଣ୍ଡ୍ ଦାଉଦ୍ ଇବ୍ରାହିମ୍ ହିଁ ଆରମ୍ଭ କରିଥିଲା। ସେହି ସମାନ ଢାଞ୍ଚାରେ ଆଜିର ଅପରାଧୀମାନେ ଫିଲ୍ମ ଷ୍ଟାର୍ଙ୍କୁ ଟାର୍ଗେଟ୍ କରୁଛନ୍ତି।
ପୋଲିସ ଏବଂ ଏଜେନ୍ସିମାନଙ୍କ ପକ୍ଷରୁ ଅନେକ କଠୋର ପଦକ୍ଷେପ ନିଆଯାଇଛି। ମାଫିଆଙ୍କ ଅଣ୍ଟା ଭାଙ୍ଗିବାକୁ ଲଗାତାର ଉଦ୍ୟମ ଜାରି ରହିଛି ଏବଂ ଅନେକାଂଶରେ ସଫଳତା ମଧ୍ୟ ମିଳିଛି। ତଥାପି, ବଲିଉଡ୍ ଏବଂ ଦାଉଦ୍ ମଧ୍ୟରେ ଥିବା ଏହି ଅଦୃଶ୍ୟ ଡୋର ଏବେ ବି କେଉଁଠି ନା କେଉଁଠି ଛନ୍ଦି ହୋଇ ରହିଛି। ଗ୍ଲାମର୍ ପଛର ଏହି ଅନ୍ଧାରୀ କାହାଣୀ ସହଜରେ ଶେଷ ହେବା ଭଳି ଲାଗୁନାହିଁ। ବଲିଉଡ୍ର ରଙ୍ଗୀନ ପରଦା ପଛରେ ସେହି କଳାଛାଇ ଏବେ ବି ଲୁଚି ରହିଛି, ଯାହା ବେଳେବେଳେ ନିଜର ଭୟଙ୍କର ଉପସ୍ଥିତି ଜାହିର କରିବାକୁ ଭୁଲେ ନାହିଁ।
