ଆମଷ୍ଟରଡମ୍: ନେଦରଲ୍ୟାଣ୍ଡରେ ଡଚ୍ ରାଜକୁମାରୀଙ୍କୁ ହତ୍ୟା ଷଡ଼ଯନ୍ତ୍ର ପଣ୍ଡ କରାଯାଇଛି । ଦୁଇ ଡଚ୍ ରାଜକୁମାରୀ, ରାଜକୁମାରୀ କାଥାରିନା-ଆମାଲିଆ ଏବଂ ତାଙ୍କ ସାନ ଭଉଣୀ, ରାଜକୁମାରୀ ଆଲେକ୍ସିଆଙ୍କୁ ହତ୍ୟା କରିବାର ଷଡ଼ଯନ୍ତ୍ରରେ ଜଣେ ୩୩ ବର୍ଷୀୟ ବ୍ୟକ୍ତିଙ୍କୁ ଅଟକ ରଖାଯାଇଛି । ତାଙ୍କୁ ଜଣେ ଅତି ଦକ୍ଷିଣପନ୍ଥୀ ଉଗ୍ରବାଦୀ ବୋଲି ସନ୍ଦେହ କରାଯାଉଛି ।
ସୋମବାର ସକାଳେ ସନ୍ଦିଗ୍ଧ ବ୍ୟକ୍ତିଙ୍କର ପ୍ରାଥମିକ କୋର୍ଟ ଶୁଣାଣି ହେବ । ତାଙ୍କ ନିକଟରୁ ଦୁଇଟି କୁରାଢ଼ି ଉଦ୍ଧାର କରାଯାଇଛି, ଯେଉଁଥିରେ “ଆଲେକ୍ସିଆ,” “ମୋସାଦ” ଏବଂ “ସିଗ୍ ହିଲ୍” (ନାଜିମାନଙ୍କ ଦ୍ୱାରା ବ୍ୟବହୃତ ଏକ ମୌଖିକ ଅଭିବାଦନ) ଲେଖାଯାଇଛି । ନେଦରଲ୍ୟାଣ୍ଡର ଲୋକମାନଙ୍କୁ ଡଚ୍ ଭାବରେ ମଧ୍ୟ ଜଣାଯାଏ ।
କର୍ତ୍ତୃପକ୍ଷ ଏହା ମଧ୍ୟ ପ୍ରକାଶ କରିଛନ୍ତି ଯେ, ଫେବୃଆରୀରେ ହେଗରେ ତାଙ୍କୁ ଗିରଫ କରାଯିବା ସମୟରେ, ସେ “ଅମାଲିଆ,” “ଏଲେକ୍ସିଆ,” ଏବଂ “ବ୍ଲଡବାଥ” ଶବ୍ଦ ସମ୍ବଳିତ ଏକ ହାତଲେଖା ନୋଟ୍ ଧରିଥିଲେ । ତଥାପି, ଯୋଜନା ପଛର ଉଦ୍ଦେଶ୍ୟ ଏପର୍ଯ୍ୟନ୍ତ କର୍ତ୍ତୃପକ୍ଷଙ୍କ ଦ୍ୱାରା ପ୍ରକାଶିତ ହୋଇନାହିଁ । ଏହା ପ୍ରଥମ ଥର ନୁହେଁ ଯେତେବେଳେ ରାଜକୁମାରୀ କେଥରିନା-ଅମାଲିଆଙ୍କ ସୁରକ୍ଷାକୁ ପ୍ରଶ୍ନ କରାଯାଇଛି । ୨୦୨୦ ମସିହାରେ, ଜଣେ ବ୍ୟକ୍ତିଙ୍କଠାରୁ ବଳାତ୍କାର ଏବଂ ହିଂସା ଧମକ ଦେଇ ଅନେକ ବାର୍ତ୍ତା ପାଇବା ପରେ ତାଙ୍କୁ ଲୁଚିବାକୁ ବାଧ୍ୟ କରାଯାଇଥିଲା ।
ଦୁଇ ବର୍ଷ ପରେ, ସୁରକ୍ଷା ଚିନ୍ତା ପାଇଁ ତାଙ୍କୁ ଆମଷ୍ଟରଡମରେ ଥିବା ତାଙ୍କର ଛାତ୍ର ବାସସ୍ଥାନ ଛାଡି ହେଗର ଅତ୍ୟନ୍ତ ସୁରକ୍ଷିତ ରାଜପ୍ରାସାଦରେ ଆଶ୍ରୟ ନେବାକୁ ବାଧ୍ୟ କଲରାଗଲା । ରାଣୀ ମୌକ୍ସିମା ସେତେବେଳେ ତାଙ୍କ ଝିଅ ଉପରେ ଏହାର ପ୍ରଭାବ ବର୍ଣ୍ଣନା କରି କହିଥିଲେ, “ସେ ଆମଷ୍ଟରଡମରେ ରହିପାରିବେ ନାହିଁ ଏବଂ ପ୍ରାସାଦ ଛାଡି ମଧ୍ୟ ଯାଇପାରିବେ ନାହିଁ । ଏହା ତାଙ୍କ ଜୀବନ ଉପରେ ଗଭୀର ପ୍ରଭାବ ପକାଇଛି ।” ଧମକ ସେଠାରେ ଶେଷ ହୋଇନଥିଲା । ସ୍ପାନିଶ ଭାଷାରେ ସ୍ପଷ୍ଟ ଭାବରେ କହିପାରୁଥିବା ରାଜକୁମାରୀ କେଥାରିନା-ଅମାଲିଆ ଭୟ କରୁଥିଲେ ଯେ ତାଙ୍କୁ ଡ୍ରଗ୍ କାର୍ଟେଲ ଦ୍ୱାରା ଅପହରଣ ପାଇଁ ଟାର୍ଗେଟ କରାଯାଇପାରେ, ତେଣୁ ସେ ଶେଷରେ ନେଦରଲାଣ୍ଡରୁ ପଳାଇଗଲେ ଏବଂ ଗୋଟିଏ ବର୍ଷ ପାଇଁ ମାଡ୍ରିଡରେ ରହିଲେ ।