Ranveer Singh gets relief: ରଣଭୀର ସିଂହଙ୍କ ବଡ଼ ବିଜୟ, ପଛଘୁଞ୍ଚା ଦେଲା FWICE, ଶେଷ କଲା ଅସହଯୋଗ ଆନ୍ଦୋଳନ
ନୂଆଦିଲ୍ଲୀ: ଅଭିନେତା ରଣଭୀର ସିଂହଙ୍କୁ ମିଳିଲା ବଡ ବିଜୟ । ‘ଡନ୍ ୩’ ବିବାଦରେ ବଡ ଆଶ୍ବସ୍ତି । ମେ ୨୫ ରେ, FWICE ରଣଭୀର ସିଂହଙ୍କ ବିରୁଦ୍ଧରେ ଏକ ଅସହଯୋଗ ଆନ୍ଦୋଳନ ଆରମ୍ଭ କରିଥିଲା। ଫରହାନ୍ ଅଖତରଙ୍କ ଅଭିଯୋଗ ପରେ ଏହି ନିଷ୍ପତ୍ତି ନିଆଯାଇଥିଲା। ଫରହାନ୍ ଦାବି କରିଥିଲେ ଯେ ରଣଭୀର ସିଂହ ‘ଡନ୍ ୩’ରୁ ଓହରିଯିବା ଯୋଗୁଁ ତାଙ୍କୁ ବହୁତ କ୍ଷତି ସହିବାକୁ ପଡିଛି। ଯାହାପରେ ଫିଲ୍ମ ନିର୍ମାତାମାନଙ୍କୁ ତାଙ୍କ ସହିତ କାମ ନକରିବାକୁ ପରାମର୍ଶ ଦିଆଯାଇଥିଲା, କିନ୍ତୁ ଏବେ FWICE ତାର ନିଷ୍ପତ୍ତି ପରିବର୍ତ୍ତନ କରିଛି । ଏକ ନୂଆ ବୟାନ ଜାରି କରି FWICE ସ୍ପଷ୍ଟ ଭାବରେ କହିଛି ଯେ ରଣଭୀର ସିଂହଙ୍କ ବିରୁଦ୍ଧରେ ଆରମ୍ଭ ହୋଇଥିବା ଅସହଯୋଗ ପଦକ୍ଷେପକୁ ପ୍ରତ୍ୟାହାର କରାଯାଉଛି। ଏହି ମାମଲା ଅନ୍ୟ ପ୍ରଯୋଜକ ସଂଗଠନ ସହିତ ଆଲୋଚନା ଚାଲିଛି। FWICE ଆହୁରି କହିଛି, “ଆମେ ସମ୍ମାନର ସହିତ ରଣଭୀର ସିଂହଙ୍କୁ ଏହି ସମସ୍ୟାର ସମାଧାନରେ ସହଯୋଗ କରିବାକୁ ନିବେଦନ କରୁଛୁ। ଫେଡେରେସନ ଆଇନର ଢାଞ୍ଚାରେ ରଣଭୀର ସିଂହଙ୍କ ଆଇନଗତ ନୋଟିସର ଜବାବ ଦେବ” ।
ଏକ ବିବୃତ୍ତିରେ, FWICE ଶିଳ୍ପ ମଧ୍ୟରେ ସମନ୍ୱୟ ଏବଂ ଏକତା ପାଇଁ ରଣଭୀର ସିଂହଙ୍କ ବିରୁଦ୍ଧରେ ଅସହଯୋଗ ନିର୍ଦ୍ଦେଶନାମା ପ୍ରତ୍ୟାହାର କରିବାର ଘୋଷଣା କରିଛି। ବିବୃତ୍ତିରେ ଲେଖାଯାଇଛି, “ଫେଡେରେସନ ଅଫ୍ ୱେଷ୍ଟର୍ଣ୍ଣ ଇଣ୍ଡିଆ ସିନେ ଏମ୍ପ୍ଲୋଇଜ୍, FWICE ଦଶନ୍ଧି ଧରି ଭାରତୀୟ ମନୋରଞ୍ଜନ ଶିଳ୍ପରେ ଶ୍ରମିକ, ଟେକ୍ନିସିଆନ୍, କଳାକାର ଏବଂ ବିଭିନ୍ନ ଅଂଶୀଦାରଙ୍କ ସବୁଠାରୁ ପ୍ରମୁଖ ଏବଂ ସମ୍ମାନିତ ପ୍ରତିନିଧି ସଂଗଠନ ମଧ୍ୟରୁ ଗୋଟିଏ” । FWICE ଚଳଚ୍ଚିତ୍ର ଏବଂ ଟେଲିଭିଜନ ଶିଳ୍ପର ମେରୁଦଣ୍ଡ ଗଠନ କରୁଥିବା ଅଗଣିତ ବ୍ୟକ୍ତିଙ୍କ ସ୍ୱାର୍ଥ, ମର୍ଯ୍ୟାଦା, କଲ୍ୟାଣ ଏବଂ ଅଧିକାରକୁ ରକ୍ଷା କରିବା ପାଇଁ ନିରନ୍ତର ଭାବରେ କାର୍ଯ୍ୟ କରିଆସୁଛି। ଏକ ସଂଗଠନ ଭାବରେ, FWICE ସର୍ବଦା ଶୃଙ୍ଖଳା, ନ୍ୟାୟ ଏବଂ ଶିଳ୍ପର ସାମୂହିକ ମଙ୍ଗଳ ବଜାୟ ରଖିବା ପାଇଁ ପ୍ରତିବଦ୍ଧ, ଏହା ନିଶ୍ଚିତ କରୁଛି ଯେ ଏହାର ସଦସ୍ୟମାନଙ୍କୁ ଶୁଣାଯିବ ଏବଂ ସମ୍ମାନ କରାଯିବ।
ଏଥିରେ ଆହୁରି କୁହାଯାଇଛି, “ତଥାପି, ପରବର୍ତ୍ତୀ ଆଲୋଚନା ଏବଂ ବିଚାରବିମର୍ଶ ସମୟରେ ଏବଂ ଏକ ସମ୍ମାନିତ ପ୍ରଯୋଜକ ସଂସ୍ଥା, ଇଣ୍ଡିଆନ୍ ମୋସନ୍ ପିକ୍ଚର୍ ପ୍ରଯୋଜକ ସଂଘର ହସ୍ତକ୍ଷେପ ଏବଂ ଆବେଦନକୁ ବିଚାର କରିବା ପରେ, ଏହା ସାମୂହିକ ଭାବରେ ଅନୁଭବ କରାଯାଇଥିଲା ଯେ ଏହି ମାମଲା ଏବେ ମନୋରଞ୍ଜନ ଶିଳ୍ପ ମଧ୍ୟରେ ସଦ୍ଭାବ ଏବଂ ଏକତା ବଜାୟ ରଖିବାର ବୃହତର ସ୍ୱାର୍ଥରେ ଏକ ଗଠନମୂଳକ ଏବଂ ସୌହାର୍ଦ୍ଦପୂର୍ଣ୍ଣ ସମାଧାନ ଆଡ଼କୁ ଅଗ୍ରସର ହେବା ଉଚିତ। ଆମର ସର୍ବଦା ପ୍ରୟାସ ରହିଛି ଯେ ଶିଳ୍ପ ମଧ୍ୟରେ ମତଭେଦ କିମ୍ବା ବିବାଦ ଦୀର୍ଘ ଦ୍ୱନ୍ଦ୍ୱ ବଦଳରେ ଆଲୋଚନା, ପାରସ୍ପରିକ ବୁଝାମଣା ଏବଂ ଦାୟିତ୍ୱପୂର୍ଣ୍ଣ ସହଯୋଗ ମାଧ୍ୟମରେ ସମାଧାନ କରାଯାଏ। ଶିଳ୍ପ ଏବଂ ଏହାର ସଦସ୍ୟମାନଙ୍କ ପ୍ରତି ଦାୟିତ୍ୱବୋଧକୁ ପାଳନ କରି, ଆମେ ଅଭିନେତା ରଣଭୀର ସିଂହଙ୍କ ବିରୁଦ୍ଧରେ ଜାରି କରାଯାଇଥିବା ଅସହଯୋଗ ନିର୍ଦ୍ଦେଶନାମାକୁ ତୁରନ୍ତ ପ୍ରତ୍ୟାହାର କରିବା ଘୋଷଣା କରୁଛୁ”।
ତେବେ ଏହି ବିବାଦ ଭିତରେ ଯଦି ରଣଭୀର ସିଂହଙ୍କ ଚାଲୁଥିବା କାମ ବିଷୟରେ କହିବା ତେବେ, ସେ ଖୁବ୍ ଶୀଘ୍ର ‘ପ୍ରଳୟ’ରେ ଦେଖାଯିବେ। ଆଦିତ୍ୟ ଧରଙ୍କ ସହିତ ରଣଭୀର ସିଂହଙ୍କର ଆଉ ଏକ ଚଳଚ୍ଚିତ୍ର ମଧ୍ୟ ପାଇପଲାଇନରେ ଅଛି। ରଣଭୀର ସିଂହଙ୍କୁ ଶେଷ ଥର ପାଇଁ “ଧୁରନ୍ଧର ୨”ରେ ଦେଖିବାକୁ ମିଳିଥିଲା, ଯାହା ବକ୍ସ ଅଫିସରେ ଝଡ଼ ସୃଷ୍ଟି କରିଥିଲା ଏବଂ ଭାରତରେ ବଲିଉଡର ସର୍ବାଧିକ ଆୟକାରୀ ଚଳଚ୍ଚିତ୍ର ହୋଇଥିଲା। ଏହି ଚଳଚ୍ଚିତ୍ରଟି ଅନେକ ଦକ୍ଷିଣ ଭାରତୀୟ ଚଳଚ୍ଚିତ୍ର ପାଇଁ ରେକର୍ଡ ମଧ୍ୟ ଭାଙ୍ଗି ଦେଇଥିଲା। ଯାହାର କ୍ରେଜ୍ ଏବେ ବି ବଜାୟ ରହିଛି । ଯାହାପରେ ଅଭିନେତା ‘ଡନ୍ ୩’ରେ ନଜର ଆସିବେ ବୋଲି ଚର୍ଚ୍ଚା ହେଉଥିଲା । ହେଲେ ପରେ କୌଣସି ମତଭେଦ ଯୋଗୁଁ ସେ ଏଥିରୁ ଓହରିଯାଇଥିଲେ ।