ମୁସଲମାନଙ୍କ ପାଇଁ ବିପଦ ନୁହେଁ ସିଏଏ: ରଜନୀକାନ୍ତ

ଚେନ୍ନାଇ: ନାଗରିକତା ସଂଶୋଧନ ଆଇନ ବା ସିଏଏକୁ ବିରୋଧ କରୁଥିବା ବିରୋଧୀଙ୍କୁ କଡା ଜବାବ ଦେଇଛନ୍ତି ସାଉଥ ସୁପରଷ୍ଟାର ରଜନୀକାନ୍ତି । ଏହି ଆଇନ ମୁସଲମାନଙ୍କ ପାଇଁ ବିପଦ ନୁହେଁ । ଯଦି କେବେ ବି ଏହି ଆଇନ ମୁସଲମାନଙ୍କୁ କ୍ଷତି ପହଂଚାଇବ ତେବେ ପ୍ରଥମେ ମୁଁ ଆଗକୁ ଆସିବି ବୋଲି ରଜନୀକାନ୍ତ କହିଛନ୍ତି । କେବଳ ସେତିକି ନୁହେଁ ଏନ୍‌ଆର୍‌ପିକୁ ମଧ୍ୟ ସେ ସମର୍ଥନ କରିଛନ୍ତି । ରାଷ୍ଟ୍ରୀୟ ଜନସଂଖ୍ୟା ପଂଜିକା ଦେଶ ପାଇଁ ଜରୁରୀ ବୋଲି ସେ କହିଛନ୍ତି ।
ଅଭିନେତା ରଜନୀକାନ୍ତ କହିଛନ୍ତି ଯେ, କେନ୍ଦ୍ର ସରକାର ଆଶ୍ୱାସନ ଦେଇଛନ୍ତି ଯେ, ଭାରତୀୟ ଲୋକଙ୍କୁ ସିଏଏରୁ କୌଣସି ଅସୁବିଧା ହେବ ନାହିଁ । କିଛି ରାଜନୈତିକ ଦଳ ନିଜର ସ୍ୱର୍ଥ ପାଇଁ ସିଏଏ ବିରୋଧରେ ଲୋକଙ୍କୁ ଉସ୍‌କାଉଥିବା ସେ ଅଭିଯାଗ କରିଛନ୍ତି । ସେ ଏହି ଆଇନ୍ ବିରୋଧରେ ହେଉଥିବା ପ୍ରଦର୍ଶନ ଲାଗି ଧାର୍ମିକ ନେତାମାନଙ୍କୁ ଦାୟୀ କରିଛନ୍ତି ।
ରଜନୀକାନ୍ତ ରାଜନୀତିରେ ପ୍ରବେଶ କରିବା ନେଇ ଚର୍ଚ୍ଚା ହେଉଛି । ତେବେ ଏଯାଏଁ କିନ୍ତୁ ସେ ଏନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି । ୨୦୧୯ ସାଧାରଣ ନିର୍ବାଚନ ବେଳେ ରଜନୀକାନ୍ତ ନିଜର ରାଜନୀତିକ ଦଳ ଘୋଷଣା କରି ନିର୍ବାଚନ ଲଢ଼ିବେ ବୋଲି ଆକଳନ କରାଯାଉଥିଲା । କିନ୍ତୁ ତାମିଲନାଡୁ ବିଧାନସଭା ନିର୍ବାଚନକୁ ଆଖି ଆଗରେ ରଖି ସେ ସାଧାରଣ ନିର୍ବାଚନରେ ସାମିଲ ହୋଇନଥିଲେ ।