PUC ସରିଯାଇଛି କି? ସାବଧାନ! ଏବେ ପେଟ୍ରୋଲ ପମ୍ପରେ ମିଳିବନି ତେଲ, ଲାଗୁ ହେବାକୁ ଯାଉଛି ଏହି କଡ଼ା ନିୟମ

ଭୁବନେଶ୍ୱର: ଯଦି ଆପଣଙ୍କ ଗାଡ଼ିର ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର ସରିଯାଇଛି, ତେବେ ତୁରନ୍ତ ଏହାକୁ ନବୀକରଣ କରନ୍ତୁ। ନଚେତ୍ ଆପଣ କେବଳ ରାସ୍ତାରେ ଜରିମାନା ଦେବେନି, ବରଂ ପେଟ୍ରୋଲ ପମ୍ପରେ ତେଲ ପାଇବାରୁ ମଧ୍ୟ ବଞ୍ଚିତ ହୋଇପାରନ୍ତି। ରାଜ୍ୟରେ ଏବଂ ସାରା ଦେଶରେ ବଢ଼ୁଥିବା ବାୟୁ ପ୍ରଦୂଷଣକୁ ନିୟନ୍ତ୍ରଣ କରିବା ପାଇଁ ସରକାର ଏବେ PUC ସମ୍ବନ୍ଧୀୟ ନିୟମକୁ ଅଧିକ କଡ଼ାକଡ଼ି କରିଛନ୍ତି।

ପ୍ରଦୂଷଣ ପ୍ରମାଣପତ୍ରର ଅବଧିକୁ ନେଇ କେନ୍ଦ୍ର ସରକାର ଏକ ନୂଆ ଯୋଜନା ଉପରେ କାମ କରୁଛନ୍ତି, ଯାହାକୁ ‘PUCC 3.0’ ବୋଲି କୁହାଯାଉଛି। ଏହି ନୂଆ ପ୍ରସ୍ତାବିତ ନିୟମ ଅନୁସାରେ ନୂଆ BS-VI ଗାଡ଼ି ଗୁଡ଼ିକ ପାଇଁ PUCର ବୈଧତା ୩ ବର୍ଷ ପର୍ଯ୍ୟନ୍ତ ରହିପାରେ। ୬ ବର୍ଷ ପର୍ଯ୍ୟନ୍ତ ପୁରୁଣା ହୋଇଥିବା BS-VI ଗାଡ଼ି ମାଲିକଙ୍କୁ ଆଉ ବାରମ୍ବାର PUC କରିବାକୁ ପଡ଼ିବ ନାହିଁ।

୬ରୁ ୧୦ ବର୍ଷ ପୁରୁଣା ଗାଡ଼ି ପାଇଁ ବର୍ଷକୁ ଥରେ ଏବଂ ୧୦ ବର୍ଷରୁ ଅଧିକ ପୁରୁଣା ଗାଡ଼ି ପାଇଁ ପ୍ରତି ୬ ମାସରେ PUC ନବୀକରଣ ବାଧ୍ୟତାମୂଳକ ହେବ। BS-IV ଗାଡ଼ି ପାଇଁ ପ୍ରତି ୬ ମାସରେ ଏବଂ BS-I ରୁ BS-III ଗାଡ଼ି ପାଇଁ ପ୍ରତି ୩ ମାସରେ PUC ନବୀକରଣ ବାଧ୍ୟତାମୂଳକ ହୋଇପାରେ।

ଦିଲ୍ଲୀ-NCR ଭଳି ସହରରେ ସରକାର ‘No PUC, No Fuel’ ନିୟମ ଲାଗୁ କରିସାରିଛନ୍ତି। ଏହି ନିୟମ ଅନୁଯାୟୀ, ଯଦି ଆପଣଙ୍କ ଗାଡ଼ିର PUC ବୈଧ ନୁହେଁ, ତେବେ ପେଟ୍ରୋଲ ପମ୍ପରେ ଆପଣଙ୍କୁ ତେଲ ଦିଆଯିବ ନାହିଁ। ଅତ୍ୟାଧୁନିକ କ୍ୟାମେରା ଜରିଆରେ ଗାଡ଼ିର ନମ୍ବର ପ୍ଲେଟ ସ୍କାନ କରି ସିଷ୍ଟମ୍‌ରେ PUCର ସ୍ଥିତି ଯାଞ୍ଚ କରାଯାଉଛି। ଖୁବ୍‌ଶୀଘ୍ର ଏହି ବ୍ୟବସ୍ଥା ଦେଶର ଅନ୍ୟାନ୍ୟ ସହରରେ ମଧ୍ୟ କଡ଼ାକଡ଼ି ଭାବେ ଲାଗୁ ହୋଇପାରେ।

ମୋଟର ଯାନ ଅଧିନିୟମ (Motor Vehicles Act) ଅନୁସାରେ, ବୈଧ PUC ବିନା ଗାଡ଼ି ଚଳାଇବା ଏକ ଗମ୍ଭୀର ଅପରାଧ: ପ୍ରଥମ ଥର ପାଇଁ ୧,୦୦୦ ଟଙ୍କା ଏବଂ ପରବର୍ତ୍ତୀ ସମୟରେ ୨,୦୦୦ ଟଙ୍କା ପର୍ଯ୍ୟନ୍ତ ଜରିମାନା ହୋଇପାରେ। କିଛି ରାଜ୍ୟରେ ଏହା ୧୦,୦୦୦ ଟଙ୍କା ପର୍ଯ୍ୟନ୍ତ ମଧ୍ୟ ଯାଇପାରେ।

ଜରିମାନା ବ୍ୟତୀତ ୩ ମାସ ପର୍ଯ୍ୟନ୍ତ ଡ୍ରାଇଭିଂ ଲାଇସେନ୍ସ ସସ୍‌ପେଣ୍ଡ ହେବା ସହ କିଛି କ୍ଷେତ୍ରରେ କାରାଦଣ୍ଡର ମଧ୍ୟ ବ୍ୟବସ୍ଥା ରହିଛି। ଯଦି ଆପଣଙ୍କ ଗାଡ଼ିର PUC ସରିଯାଇଛି ଏବଂ ଆପଣ କୌଣସି ଦୁର୍ଘଟଣାର ସମ୍ମୁଖୀନ ହୁଅନ୍ତି, ତେବେ ବୀମା କମ୍ପାନୀଗୁଡ଼ିକ ଆପଣଙ୍କ କ୍ଲେମ୍ ପ୍ରତ୍ୟାଖ୍ୟାନ କରିପାରନ୍ତି।

ଯଦି ଆପଣ ଏ ପର୍ଯ୍ୟନ୍ତ PUC କରିନାହାନ୍ତି, ତେବେ ତୁରନ୍ତ ନିକଟସ୍ଥ ଅନୁମୋଦିତ ପ୍ରଦୂଷଣ ଯାଞ୍ଚ କେନ୍ଦ୍ରକୁ ଯାଇ ଏହାକୁ ନବୀକରଣ କରନ୍ତୁ।