ନୂଆଦିଲ୍ଲୀ: ପ୍ରତିବର୍ଷ ଡେଙ୍ଗୁ ଦ୍ୱାରା ଦେଶରେ ବହୁତ ଲୋକ ଆକ୍ରାନ୍ତ ହେଉଛନ୍ତି। ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁଯାୟୀ, ପ୍ରତିବର୍ଷ ପ୍ରାୟ ୧୦୦-୪୦୦ ମିଲିୟନ ଲୋକ ଏହି ରୋଗରେ ସଂକ୍ରମଣ ହେଉଛନ୍ତି ଏବଂ ଅନେକ ଲୋକ ମୃତ୍ୟୁବରଣ ମଧ୍ୟ କରୁଛନ୍ତି। କିନ୍ତୁ ଏବେ ଏହି ମହାମାରୀକୁ ରୋକିବା ପାଇଁ ସରକାର ଏକ ଟିକାକୁ ଅନୁମୋଦନ କରିଛନ୍ତି। ଔଷଧ ନିୟାମକ ସଂସ୍ଥା, କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (CDSCO), ଜାପାନୀ ଟିକା, QDENGAକୁ ଅନୁମୋଦନ କରିଛି। ଏହା ଜାପାନୀ ଔଷଧ କମ୍ପାନୀ ଟକେଡା ଫାର୍ମାସିଟିକାଲ ଦ୍ୱାରା ବିକଶିତ ହୋଇଛି ।
ଏହି ଟିକା ଟେଟ୍ରାଭାଲେଣ୍ଟ ଲାଇଭ ଆଟେନୁଏଟେଡ ପ୍ରଯୁକ୍ତିବିଦ୍ୟା ବ୍ୟବହାର କରେ। ଯାହାର ଅର୍ଥ ହେଉଛି ଏହା ଡେଙ୍ଗୁ ଭାଇରସର ସମସ୍ତ ୪ଟି ସେରୋଟାଇପ ବିରୋଧରେ ସୁରକ୍ଷା ପ୍ରଦାନ କରିପାରିବ। ଜାପାନୀ କମ୍ପାନୀ ଅନୁଯାୟୀ, ଏହି ଟିକା ସେମାନଙ୍କୁ ମଧ୍ୟ ଦିଆଯାଇପାରିବ ଯେଉଁମାନଙ୍କୁ ପୂର୍ବରୁ ଡେଙ୍ଗୁ ହୋଇସାରିଛି। ଯେଉଁମାନଙ୍କୁ ଏପର୍ଯ୍ୟନ୍ତ ଡେଙ୍ଗୁ ହୋଇନାହିଁ ସେମାନେ ମଧ୍ୟ ଏହାକୁ ନେଇପାରିବେ। ଏହି ଟିକା ଦେବା ପୂର୍ବରୁ ଡେଙ୍ଗୁ ପରୀକ୍ଷାର କୌଣସି ଆବଶ୍ୟକତା ନାହିଁ।
୪ରୁ ୬୦ ବର୍ଷ ଭିତରେ ଆସୁଥିବା ବ୍ୟକ୍ତିବିଶେଷ ଏହି ଟିକା ନେଇ ପାରିବେ। ପୂର୍ବରୁ ଡେଙ୍ଗୁ ହୋଇଥିଲା କି ନାହିଁ ତାହା ଜାଣିବା ଦରକାର ନାହିଁ। ଦୁଇଟି ଡୋଜ୍; ପ୍ରଥମ ଡୋଜ୍ର ୩ ମାସ ପରେ ଦ୍ୱିତୀୟ ଡୋଜ୍ ଦିଆଯିବ। ପୂର୍ବରୁ ‘QDENGA’କୁ ୪୩ଟି ଦେଶ ମଞ୍ଜୁରୀ ଦେଇ ସାରିଛି। ସାରା ବିଶ୍ବରେ ୩୨ ନିୟୁତ ଡୋଜ୍ ‘QDENGA’ ଦିଆସରିଛି। ‘ଟକେଡା ବାୟୋଫାର୍ମାସିଟିକାଲ୍ସ’ ପ୍ରସ୍ତୁତ କରିଛି ‘QDENGA’ ଭ୍ୟାକ୍ସିନ୍।
କମ୍ପାନୀ କହିଛି ଯେ, ଏହି ଅନୁମୋଦନ ଏପରି ଏକ ସମୟରେ ଆସିଛି ଯେତେବେଳେ ଗତ ଦୁଇ ଦଶନ୍ଧି ମଧ୍ୟରେ ଭାରତରେ ଡେଙ୍ଗୁ ମାମଲା ୧୧ ଗୁଣ ବୃଦ୍ଧି ପାଇଛି। ଏହି ଟିକା ବିକଶିତ କରିବା ପାଇଁ ଜାପାନୀ କମ୍ପାନୀ ଟକେଡା ଫାର୍ମାସିଟିକାଲ ୨୦୨୪ରେ ଭାରତୀୟ ଟିକା କମ୍ପାନୀ ବାୟୋଲୋଜିକାଲ E ସହିତ ସହଭାଗୀ ହୋଇଥିଲା। ଏହି ଚୁକ୍ତି ଅନୁଯାୟୀ, ବାୟୋଲୋଜିକାଲ E ବାର୍ଷିକ ୫୦ ନିୟୁତ ଡୋଜ ଉତ୍ପାଦନ କରିବାର କ୍ଷମତା ବିକଶିତ କରିବ। ଏହା ଟାକେଡାକୁ ଦଶନ୍ଧି ଶେଷ ସୁଦ୍ଧା ବିଶ୍ୱବ୍ୟାପୀ ବାର୍ଷିକ ୧୦୦ ନିୟୁତ ଡୋଜ ଉତ୍ପାଦନ କରିବାର ଲକ୍ଷ୍ୟ ହାସଲରେ ସାହାଯ୍ୟ କରିବ। କମ୍ପାନୀ ଏହା ମଧ୍ୟ କହିଛି ଯେ, ଦୀର୍ଘକାଳୀନ ଅଧ୍ୟୟନରେ, QDENGA ଡେଙ୍ଗୁ ସଂକ୍ରମଣ ଏବଂ ଡେଙ୍ଗୁ ପାଇଁ ହସ୍ପିଟାଲରେ ଭର୍ତ୍ତି ହେବାର ବିପଦକୁ ଏଡ଼ାଇ ଦେଇହେବ।