Partition Horrors: ବିଭାଜନର ଯନ୍ତ୍ରଣାକୁ ମନେ ପକାଇଲେ ପ୍ରଧାନମନ୍ତ୍ରୀ ମୋଦି, କହିଲେ ‘ଶୂନ୍ୟରୁ ଜୀବନ ଗଢ଼ିଥିଲେ ଅନେକ ଲୋକ’…
ନୂଆଦିଲ୍ଲୀ: ଅଗଷ୍ଟ ୧୪ ତାରିଖରେ ପାଳିତ ହେଉଥିବା ‘ବିଭାଜନ ବିଭୀଷିକା ସ୍ମୃତି ଦିବସ’ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୧୯୪୭ ମସିହାର ଭାରତ ବିଭାଜନରେ ପ୍ରାଣ ହରାଇଥିବା ଓ ବିସ୍ଥାପିତ ହୋଇଥିବା ଲୋକଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ବିଭାଜନ ସମୟରେ ଅସହ୍ୟ ଯନ୍ତ୍ରଣା ଓ ଦୁର୍ଦ୍ଦଶା ସହି ମଧ୍ୟ ଅନେକ ଲୋକ ନୂଆ କରି ଜୀବନ ଗଢ଼ିଥିବା କଥା ସେ ମନେ ପକାଇଛନ୍ତି।
ସୋସିଆଲ ମିଡିଆ ପୋଷ୍ଟରେ ପ୍ରଧାନମନ୍ତ୍ରୀ କହିଛନ୍ତି, ବିଭାଜନ ଭାରତୀୟ ଇତିହାସର ଏକ ଅତ୍ୟନ୍ତ ଯନ୍ତ୍ରଣାଦାୟକ ଅଧ୍ୟାୟ। ଏହା ଅସଂଖ୍ୟ ଲୋକଙ୍କ ଜୀବନକୁ ଛାରଖାର କରିଦେଇଥିଲା। ଅନେକ ପରିବାର ନିଜ ଘର ଛାଡ଼ିବାକୁ ବାଧ୍ୟ ହୋଇଥିଲେ ଏବଂ ଅନେକ ଲୋକ ନିଜ ପ୍ରିୟଜନଙ୍କୁ ହରାଇଥିଲେ। ତେବେ ଏତେ ବଡ଼ ବିପର୍ଯ୍ୟୟ ପରେ ମଧ୍ୟ ଲୋକଙ୍କ ସାହସ ଓ ମନୋବଳ କମିନଥିଲା ବୋଲି ମୋଦି କହିଛନ୍ତି। ଅନେକ ବିସ୍ଥାପିତ ଲୋକ ଶୂନ୍ୟରୁ ନିଜ ଜୀବନ ଆରମ୍ଭ କରିଥିଲେ। କଠିନ ପରିସ୍ଥିତିକୁ ସାମ୍ନା କରି ସେମାନେ ନିଜ ଭବିଷ୍ୟତ ଗଢ଼ିବା ସହ ଦେଶର ବିକାଶରେ ମଧ୍ୟ ଗୁରୁତ୍ୱପୂର୍ଣ୍ଣ ଅବଦାନ ଦେଇଥିଲେ।
ମୋଦି କହିଛନ୍ତି ଯେ, ବିଭାଜନର ଦୁଃଖଦ ଅନୁଭୂତି ଆମକୁ ମାନବୀୟ ସାହସ ଓ ଦୃଢ଼ ମନୋବଳର ଶିକ୍ଷା ଦିଏ। ଏହି ଦିନ ଦେଶରେ ଭାଇଚାରା, ସାମ୍ପ୍ରଦାୟିକ ସଦ୍ଭାବ ଓ ଏକତାକୁ ଆହୁରି ମଜବୁତ କରିବା ପାଇଁ ଆମ ସଂକଳ୍ପକୁ ଦୃଢ଼ କରୁ ବୋଲି ସେ ଆହ୍ୱାନ ଦେଇଛନ୍ତି।
ସେହିପରି ବିଦେଶ ମନ୍ତ୍ରୀ ଏସ୍. ଜୟଶଙ୍କର ମଧ୍ୟ ବିଭାଜନରେ ପୀଡ଼ିତ ଲୋକଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ବିଭାଜନ ଯୋଗୁଁ ହୋଇଥିବା ବିପୁଳ ମାନବୀୟ କ୍ଷତି ସହ ଏହାର ଦୀର୍ଘମିଆଦୀ ଭୌଗୋଳିକ ଓ ରାଜନୈତିକ ପ୍ରଭାବକୁ ମଧ୍ୟ ମନେ ରଖିବା ଆବଶ୍ୟକ ବୋଲି ସେ କହିଛନ୍ତି। ଜୟଶଙ୍କର କହିଛନ୍ତି, ବିଭାଜନର କଠିନ ସମୟରେ ନିଜ ଜୀବନକୁ ପୁଣିଥରେ ଗଢ଼ିଥିବା ଲୋକଙ୍କ ସାହସ ଓ ସଂଘର୍ଷକୁ ସମ୍ମାନ ଦେବା ଉଚିତ। ଏହି ଘଟଣାରୁ ମିଳିଥିବା ଯନ୍ତ୍ରଣାଦାୟକ ଶିକ୍ଷାକୁ ମଧ୍ୟ ଭୁଲିବା ଉଚିତ ନୁହେଁ।
ପ୍ରତିବର୍ଷ ଅଗଷ୍ଟ ୧୪ରେ ଭାରତରେ ‘ବିଭାଜନ ବିଭୀଷିକା ସ୍ମୃତି ଦିବସ’ ପାଳନ କରାଯାଏ। ୧୯୪୭ରେ ବ୍ରିଟିଶ ଭାରତର ବିଭାଜନ ହୋଇ ଭାରତ ଓ ପାକିସ୍ତାନ ଗଠିତ ହୋଇଥିଲା। ଏହି ବିଭାଜନ ସମୟରେ ବିପୁଳ ସଂଖ୍ୟକ ଲୋକ ନିଜ ଘର ଛାଡ଼ି ଅନ୍ୟତ୍ର ଯିବାକୁ ବାଧ୍ୟ ହୋଇଥିଲେ। ବିଭାଜନ ଯୋଗୁଁ ପ୍ରାୟ ୨ କୋଟି ଲୋକ ବିସ୍ଥାପିତ ହୋଇଥିବା ଆକଳନ କରାଯାଏ। ହିଂସା ଓ ଅଶାନ୍ତିର ଏହି ଦୁଃଖଦ ଅଧ୍ୟାୟର ଗଭୀର ପ୍ରଭାବ ଆଜି ମଧ୍ୟ ଅନେକ ପରିବାର ଓ ପିଢ଼ିର ସ୍ମୃତିରେ ରହିଛି।