ହାଇଦ୍ରାବାଦ: ତେଲେଙ୍ଗାନାର ହାଇଦ୍ରାବାଦରେ ସାଂସଦଙ୍କ ପୁଅ ଗାଡ଼ି ଧକ୍କାରେ ଓଡ଼ିଆ ଯୁବତୀଙ୍କ ମୃତ୍ୟୁ ଖବର ସମସ୍ତଙ୍କୁ ଚକିତ କରିଛି। ରାସ୍ତା ପାର୍ ବେଳେ ସାଂସଦଙ୍କ ପୁଅଙ୍କ ବିଳାସପୂର୍ଣ୍ଣ କାର୍ ଧକ୍କାରେ ଯୁବତୀଙ୍କର ମୃତ୍ୟୁ ଘଟିଛି। ଦୁର୍ଘଟଣା ପରେ ଗୁରୁତର ଅବସ୍ଥାରେ ହସ୍ପିଟାଲ ନେଇଥିଲେ ସାଂସଦଙ୍କ ପୁଅ। ହସ୍ପିଟାଲରେ ଓଡ଼ିଆ ଯୁବତୀଙ୍କୁ ମୃତ୍ୟୁ ଘୋଷଣା କଲେ ଡାକ୍ତର। ହାଇଦ୍ରାବାଦର ଏକ ମଲ୍ରେ କାମ କରୁଥିଲେ ଯୁବତୀ ଭାରତୀ।
ମଲ୍ କର୍ତ୍ତୃପକ୍ଷଙ୍କ ଅଭିଯୋଗ ଆଧାରରେ ମାମଲା ରୁଜୁ ହୋଇଛି। ସେହପରି ଗାଡ଼ି ମଧ୍ୟ ଜବତ ହୋଇଛି। FSLକୁ ଗଲା ଅଭିଯୁକ୍ତଙ୍କ ରକ୍ତ ନମୁନା, ମାତ୍ର ଅଭିଯୁକ୍ତକୁ ଗିରଫ କରିନି ପୋଲିସ। ଦୁର୍ଘଟଣା ଘଟାଇଥିବା ଯୁବକ ଜନସେନା ସାଂସଦଙ୍କ ପୁଅ ବୋଲି ଜଣାପଡିଛି।
ଭାରତୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ଏବଂ ପ୍ରଚୁର ରକ୍ତସ୍ରାବ ହେଉଥିଲା। ପୋଲିସ କହିଛି ଯେ ତାଙ୍କୁ ସେହି କାରରେ ଜୁବଲି ହିଲ୍ସର ଆପୋଲୋ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ତା’ପରେ ତାଙ୍କ ବନ୍ଧୁ ପୂଜା ଷ୍ଟୋର ମ୍ୟାନେଜର ଅଶ୍ୱିନ କୁମାରଙ୍କୁ ଜଣାଇଥିଲେ, ଯିଏ ପରେ ପୋଲିସକୁ ଫୋନ୍ କରିଥିଲେ।
ସାଇବରାବାଦ ପୋଲିସ ଅନୁଯାୟୀ, ସଞ୍ଜୁଷ କାର ଚଳାଉଥିଲେ। ତାଙ୍କ ପିତା ଆନ୍ଧ୍ର ପ୍ରଦେଶର ଉପ-ମୁଖ୍ୟମନ୍ତ୍ରୀ ପବନ କଲ୍ୟାଣଙ୍କ ଜନସେନା ପାର୍ଟିର ରାଜ୍ୟସଭା ସାଂସଦ ଏବଂ ଜଣେ ପ୍ରମୁଖ ବ୍ୟବସାୟୀ। ମାଧପୁର ଏସିପି ପି. ଶ୍ରୀଧର କହିଛନ୍ତି ଯେ ଅଭିଯୁକ୍ତଙ୍କ ଉପରେ ନୋଟିସ ଜାରି କରାଯାଇଛି। ଯେହେତୁ ଏହି ମାମଲାରେ ସର୍ବାଧିକ ଦଣ୍ଡ ସାତ ବର୍ଷରୁ କମ୍ ଏବଂ ଏହା ଏକ ଜାମିନଯୋଗ୍ୟ ଅପରାଧ, ତେଣୁ ଅଭିଯୁକ୍ତଙ୍କୁ ଗିରଫ କରାଯାଇ ନାହିଁ।