ନୂଆଦିଲ୍ଲୀ: କେନ୍ଦ୍ର ସରକାର ଆଜି ସକାଳେ ଜନସାଧାରଣଙ୍କୁ ଗୁରୁତ୍ୱପୂର୍ଣ୍ଣ ଆଶ୍ୱସ୍ତି ପ୍ରଦାନ କରିଛନ୍ତି। ପେଟ୍ରୋଲ, ଡିଜେଲ ଏବଂ ATF ଉପରେ ଅପ୍ରତ୍ୟାଶିତ ଟିକସ ସେପ୍ଟେମ୍ବର ୧୭ ତାରିଖରେ ହ୍ରାସ କରାଯାଇଛି। ପେଟ୍ରୋଲ, ଡିଜେଲ ଏବଂ ATF ରପ୍ତାନି ଉପରେ ଶୁଳ୍କ ୨୭ ମାର୍ଚ୍ଚରେ ଲାଗୁ କରାଯାଇଥିଲା ଏବଂ ଆଜି, ସେପ୍ଟେମ୍ବର ୧୭ ତାରିଖରେ ଏହାକୁ ହ୍ରାସ କରାଯାଇଛି। ଏହା ଫଳରେ ରିଫାଇନ୍ଡ ପେଟ୍ରୋଲିୟମ ଉତ୍ପାଦ ବିଦେଶକୁ ରପ୍ତାନି କରୁଥିବା କମ୍ପାନୀଗୁଡ଼ିକୁ ସିଧାସଳଖ ଲାଭ ମିଳିପାରେ।
ନୂଆ ହାର ଅନୁସାରେ, ଡିଜେଲ ରପ୍ତାନି ଉପରେ ଲାଗୁଥିବା ଲେଭିକୁ ଲିଟର ପିଛା ୨୫ ଟଙ୍କାରୁ ୨୦ ଟଙ୍କାକୁ କମାଯାଇଛି। ସେହିପରି ପେଟ୍ରୋଲ ରପ୍ତାନି ଉପରେ ଲାଗୁଥିବା ଶୁଳ୍କ ଲିଟର ପିଛା ୧.୫୦ ଟଙ୍କାରୁ ହ୍ରାସ ପାଇ ୫୦ ପଇସା ହୋଇଛି। ଏହାଛଡ଼ା ବିମାନ ଇନ୍ଧନ ଭାବେ ବ୍ୟବହୃତ ATF ଉପରେ ୱିଣ୍ଡଫଲ ଟ୍ୟାକ୍ସ ୧୯ ଟଙ୍କାରୁ କମି ୧୫ ଟଙ୍କା ପ୍ରତି ଲିଟର ହୋଇଛି। ୱିଣ୍ଡଫଲ ଟ୍ୟାକ୍ସ ହେଉଛି ଏକ ଅତିରିକ୍ତ କର, ଯାହା କୌଣସି ବିଶେଷ ପରିସ୍ଥିତି କିମ୍ବା ବଜାର ପରିବର୍ତ୍ତନ ଯୋଗୁ କମ୍ପାନୀଗୁଡ଼ିକ ଅସାଧାରଣ ଭାବେ ଅଧିକ ଲାଭ କଲେ ସରକାର ଲାଗୁ କରିପାରନ୍ତି।
ୱିଣ୍ଡଫଲ ଟ୍ୟାକ୍ସ କ’ଣ?
ୱିଣ୍ଡଫଲ ଟ୍ୟାକ୍ସ ହେଉଛି ହଠାତ୍ ଘଟଣା ଯୋଗୁଁ ଗୁରୁତ୍ୱପୂର୍ଣ୍ଣ ଲାଭ କରୁଥିବା କମ୍ପାନୀଗୁଡ଼ିକ ଉପରେ ସରକାରଙ୍କ ଦ୍ୱାରା ଲାଗୁ କରାଯାଇଥିବା ଏକ ଟିକସ। ଉଦାହରଣ ସ୍ୱରୂପ, ମଧ୍ୟପ୍ରାଚ୍ୟ ଉତ୍ତେଜନା ମଧ୍ୟରେ, ପେଟ୍ରୋଲ ଏବଂ ଡିଜେଲ କମ୍ପାନୀଗୁଡ଼ିକ ଲାଭ ପାଇଲେ, ଏବଂ ସେମାନଙ୍କ ଉପରେ ଏକ ଅସ୍ଥାୟୀ ଟିକସ ଲାଗୁ କରାଯାଇଥିଲା। ଏହା ଏବେ ହ୍ରାସ ପାଇଛି। ପେଟ୍ରୋଲିୟମ କ୍ଷେତ୍ରରେ ଅନ୍ତର୍ଜାତୀୟ ବଜାରର ପରିସ୍ଥିତି ଓ ଦରରେ ବଡ଼ ପରିବର୍ତ୍ତନ ହେଲେ ରିଫାଇନରୀ କମ୍ପାନୀଗୁଡ଼ିକ ଅତିରିକ୍ତ ଲାଭ କରିପାରନ୍ତି। ଏପରି ସ୍ଥିତିରେ ସରକାର ସେହି ଅତିରିକ୍ତ ଲାଭ ଉପରେ ୱିଣ୍ଡଫଲ ଟ୍ୟାକ୍ସ ଲାଗୁ କରିଥାଏ।
ପେଟ୍ରୋଲ ଏବଂ ଡିଜେଲ ଶସ୍ତା ହେବ କି?
ୱିଣ୍ଡଫଲ ଟ୍ୟାକ୍ସ କମିବା ପରେ ଗ୍ରାହକଙ୍କ ମନରେ ସବୁଠାରୁ ବଡ଼ ପ୍ରଶ୍ନ ହେଉଛିଏବେ କ’ଣ ପେଟ୍ରୋଲ ଓ ଡିଜେଲ ଶସ୍ତା ହେବ? ତେବେ କେବଳ ୱିଣ୍ଡଫଲ ଟ୍ୟାକ୍ସ ହ୍ରାସ ହେବା ଦ୍ୱାରା ଦେଶର ଘରୋଇ ବଜାରରେ ପେଟ୍ରୋଲ କିମ୍ବା ଡିଜେଲର ଖୁଚୁରା ଦର ସିଧାସଳଖ କମିବା ଆବଶ୍ୟକ ନୁହେଁ। ଏହି ଟ୍ୟାକ୍ସ ମୁଖ୍ୟତଃ ରପ୍ତାନି ହେଉଥିବା ପେଟ୍ରୋଲିୟମ ଉତ୍ପାଦ ସହ ଜଡ଼ିତ। ଅର୍ଥାତ୍ ୱିଣ୍ଡଫଲ ଟ୍ୟାକ୍ସରେ ହ୍ରାସର ମୁଖ୍ୟ ପ୍ରଭାବ ରିଫାଇନ୍ଡ ପେଟ୍ରୋଲିୟମ ଉତ୍ପାଦ ରପ୍ତାନି କରୁଥିବା କମ୍ପାନୀଗୁଡ଼ିକ ଉପରେ ପଡ଼ିବ। ଏହାକୁ ଆଧାର କରି ପେଟ୍ରୋଲ-ଡିଜେଲର ଘରୋଇ ଖୁଚୁରା ମୂଲ୍ୟ କମିବ ବୋଲି ସିଧାସଳଖ ନିଷ୍କର୍ଷ କରାଯାଇପାରିବ ନାହିଁ।