Middle East war: ୭ ଦିନରେ ହର୍ମୁଜ୍ ଖୋଲିବ ଇରାନ୍! ଆମେରିକା ଆଗରେ ରଖିଲା ପ୍ରସ୍ତାବ; ଟ୍ରମ୍ପ-ଜିନପିଙ୍ଗ୍ ଆଲୋଚନାରେ ମଧ୍ୟପ୍ରାଚ୍ୟ ଯୁଦ୍ଧ
ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଜାରି ଯୁଦ୍ଧ ମଧ୍ୟରେ ଶାନ୍ତି ପାଇଁ ବଡ଼ ପ୍ରସ୍ତାବ ଦେଇଛି ଇରାନ୍। ଆମେରିକାକୁ ୭ ଦିନର ଏକ ଠୋସ୍ ଯୋଜନା ପଠାଇଛି ତେହରାନ୍। ଇରାନ୍ କହିଛି, ଆମେରିକା ଆବଶ୍ୟକ ସର୍ତ୍ତ ମାନିଲେ ୭ ଦିନ ମଧ୍ୟରେ ଷ୍ଟ୍ରେଟ୍ ଅଫ୍ ହର୍ମୁଜ୍ରେ ଜାହାଜ ଚଳାଚଳ ସ୍ୱାଭାବିକ କରାଯିବ ଏବଂ ଅଞ୍ଚଳରେ ଆକ୍ରମଣ ବନ୍ଦ କରାଯିବ।
ଇରାନ୍ର ବୈଦେଶିକ ମନ୍ତ୍ରୀ ଅବାସ୍ ଆରାଘଚି କହିଛନ୍ତି, କତାର ମାଧ୍ୟମରେ ଆମେରିକାକୁ ଏହି ପ୍ରସ୍ତାବ ଦିଆଯାଇଛି। ଆମେରିକା ପ୍ରସ୍ତାବ ଗ୍ରହଣ କରିବା ପରେ ହିଁ ୭ ଦିନର ସମୟସୀମା ଆରମ୍ଭ ହେବ। ଇରାନ୍ର ସର୍ତ୍ତ ଅନୁସାରେ, ତେହରାନ୍ ହର୍ମୁଜ୍ ଜଳପଥ ଖୋଲିବ ଏବଂ ଲେବାନନ୍ ସମେତ ଅଞ୍ଚଳରେ ଆକ୍ରମଣ ବନ୍ଦ କରିବ। ବଦଳରେ ଆମେରିକାକୁ ଇରାନ୍ର ବନ୍ଦର ଉପରେ ନାକାବନ୍ଦୀ ହଟାଇବା, ବିଦେଶରେ ଅଟକିଥିବା ଇରାନ୍ର ଟଙ୍କା ମୁକ୍ତ କରିବା ଏବଂ ତେଲ ରପ୍ତାନି ଉପରେ ଥିବା କଟକଣାରେ ଛାଡ଼ ଦେବାକୁ ପଡ଼ିବ।
ଏହି ସମୟରେ ଟ୍ରମ୍ପ ଓ ଚୀନ୍ ରାଷ୍ଟ୍ରପତି ସି ଜିନପିଙ୍ଗ୍ ମଧ୍ୟ ମଧ୍ୟପ୍ରାଚ୍ୟ ଯୁଦ୍ଧକୁ ନେଇ ଆଲୋଚନା କରିଛନ୍ତି। ଜିନପିଙ୍ଗ୍ ଆମେରିକା ଓ ଇରାନ୍କୁ ଜୁନ୍ରେ ହୋଇଥିବା ବୁଝାମଣାକୁ ଫେରିବା ଏବଂ ବ୍ୟାପକ ଶାନ୍ତି ପାଇଁ ଆଲୋଚନା ଆରମ୍ଭ କରିବାକୁ କହିଛନ୍ତି। ତେବେ ଟ୍ରମ୍ପ ଚୀନ୍କୁ ଇରାନ୍କୁ ସମର୍ଥନ ନକରିବାକୁ ସତର୍କ କରିଥିବା ଆମେରିକାର ଚୀନ୍ସ୍ଥିତ ରାଷ୍ଟ୍ରଦୂତ ଡେଭିଡ୍ ପର୍ଡ୍ୟୁ କହିଛନ୍ତି।
ଅନ୍ୟପଟେ, ପରମାଣୁ ପ୍ରସଙ୍ଗରେ ଇରାନ୍ ନିଜ ଆଭିମୁଖ୍ୟରେ ଅଟଳ ରହିଛି। ଜଣେ ବରିଷ୍ଠ ଇରାନୀ ଅଧିକାରୀଙ୍କ ଅନୁସାରେ, ଆମେରିକା ପ୍ରସ୍ତାବ ମାନିଲେ ମଧ୍ୟ ଇରାନ୍ ୟୁରାନିୟମ୍ ସମୃଦ୍ଧିକରଣକୁ ନିଜର ଅଧିକାର ବୋଲି ଦେଖିବ ଏବଂ ଅଧିକ ସମୃଦ୍ଧ ୟୁରାନିୟମ୍ ଦେଶ ବାହାରକୁ ପଠାଇବାକୁ ରାଜି ନୁହେଁ। ଟ୍ରମ୍ପ କିନ୍ତୁ ଇରାନ୍କୁ ପରମାଣୁ ଅସ୍ତ୍ର ବିକଶିତ କରିବାକୁ ଦିଆଯିବ ନାହିଁ ବୋଲି ସ୍ପଷ୍ଟ ଭାବେ କହିଛନ୍ତି।
ଫେବ୍ରୁଆରୀ ୨୮ରେ ଆମେରିକା ଓ ଇସ୍ରାଏଲ୍ର ଆକ୍ରମଣରୁ ଆରମ୍ଭ ହୋଇଥିବା ଯୁଦ୍ଧର ପ୍ରଭାବ ଏବେ ଅନେକ ଦେଶକୁ ବ୍ୟାପିଛି। ଇରାନ୍ର ମିସାଇଲ୍ ଓ ଡ୍ରୋନ୍ ଆକ୍ରମଣ, ୟେମେନ୍ରେ ଇରାନ୍ ସମର୍ଥିତ ହୁଥିଙ୍କ ଆକ୍ରମଣ ଏବଂ ଲେବାନନ୍ରେ ହିଜବୁଲ୍ଲା-ଇସ୍ରାଏଲ୍ ଲଢ଼େଇ ଜାରି ରହିଛି। ଏହା ସହ ଇରାକ୍ରେ ଏକ ପାଇପଲାଇନ୍ ଆକ୍ରମଣ ପାଇଁ ଇରାନ୍ ସମର୍ଥିତ ମିଲିସିଆ ଉପରେ ଅଭିଯୋଗ ହୋଇଛି।
ଯୁଦ୍ଧ ମଧ୍ୟରେ ସାଉଦି ଆରବ ନିଜ ପ୍ରତିରକ୍ଷା ବ୍ୟବସ୍ଥା ମଜବୁତ କରୁଛି। ରିୟାଦ୍ରେ ତୁର୍କୀ, ପାକିସ୍ତାନ ଓ ସାଉଦିର ପ୍ରତିରକ୍ଷା ଅଧିକାରୀମାନେ ଗୁଇନ୍ଦା ସୂଚନା ବାଣ୍ଟିବା ଓ ସାମରିକ ସମନ୍ୱୟ ନେଇ ଆଲୋଚନା କରିଛନ୍ତି। ସେପଟେ ୟେମେନ୍ରେ ଯୁଦ୍ଧ ଯୋଗୁଁ ଶିଶୁଙ୍କ ମଧ୍ୟରେ ତୀବ୍ର ପୌଷ୍ଟିକ ଅଭାବ ବଢ଼ୁଥିବା UNICEF କହିଛି।
ସବୁଠାରୁ ବଡ଼ ପ୍ରସଙ୍ଗ ହେଉଛି, ହର୍ମୁଜ୍ ଜଳପଥରେ ତେଲ ଯୋଗାଣ ବାଧାପ୍ରାପ୍ତ ହେବାରୁ ଏହାର ପ୍ରଭାବ କେବଳ ମଧ୍ୟପ୍ରାଚ୍ୟରେ ସୀମିତ ରହୁନାହିଁ। ବିଶ୍ୱର ଶକ୍ତି ଯୋଗାଣ ଉପରେ ମଧ୍ୟ ଏହାର ପ୍ରଭାବ ପଡ଼ିବା ଆଶଙ୍କା ରହିଛି। ତେଣୁ ଇରାନ୍ର ୭ ଦିନର ପ୍ରସ୍ତାବ ଉପରେ ଏବେ ଆମେରିକାର ପ୍ରତିକ୍ରିୟା ଉପରେ ନଜର ରହିଛି।