ଅଷ୍ଟ୍ରେଲିଆ ବିପକ୍ଷରେ ଦମଦାର ୧୭୯ ରନ୍ ପରେ ଟେମ୍ବା ବାଭୁମାଙ୍କ ବଡ଼ ବୟାନ: ସଚିନ୍ ଙ୍କୁ କଲେ ପ୍ରଶଂସା
ଗକେବେରହା : ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଦକ୍ଷିଣ ଆଫ୍ରିକାର ଅଧିନାୟକ ତଥା ଅଭିଜ୍ଞ ଷ୍ଟାର୍ ବ୍ୟାଟ୍ସର ଟେମ୍ବା ବାଭୁମା ଏକ ଚମତ୍କାର ଓ ଐତିହାସିକ ଇନିଂସ ଖେଳି ସମସ୍ତ କ୍ରିକେଟ ପ୍ରେମୀଙ୍କର ଦୃଷ୍ଟି ଆକର୍ଷଣ କରିଛନ୍ତି। ମ୍ୟାଚ୍ ଆରମ୍ଭରେ ଦଳୀୟ ସ୍କୋର୍ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇ ମାତ୍ର ୧୧୦ ରନ୍ରେ ୬ଟି ମୂଲ୍ୟବାନ ୱିକେଟ୍ ହରାଇ ସଙ୍କଟରେ ପଡ଼ିଥିବାବେଳେ ଅଧିନାୟକ ବାଭୁମା ଦଳର ମଙ୍ଗ ଧରି ସ୍ଥିତିକୁ ସଫଳତାର ସହ ସମ୍ଭାଳିଥିଲେ। ସେ ଅତ୍ୟନ୍ତ ଧୈର୍ଯ୍ୟ, ଦୃଢ଼ତା ଓ ଦାୟିତ୍ୱପୂର୍ଣ୍ଣ ବ୍ୟାଟିଂ ପ୍ରଦର୍ଶନ କରି ୩୩୪ଟି ବଲ୍ର ସମ୍ମୁଖୀନ ହୋଇ ୧୮ଟି ଚୌକା ଏବଂ ଗୋଟିଏ ଛକା ସହାୟତାରେ ଜବରଦସ୍ତ ୧୭୯ ରନ୍ର ଏକ ମ୍ୟାଚ୍-ବିଜୟୀ ତଥା ରେକର୍ଡ-ସୃଷ୍ଟିକାରୀ ପାଳି ଖେଳି ସମସ୍ତଙ୍କୁ ଚକିତ କରିଦେଇଥିଲେ।
ଇନିଙ୍ଗସ ପରେ ଗଣମାଧ୍ୟମ ସହ ସ୍ୱତନ୍ତ୍ର କଥାବାର୍ତ୍ତା ସମୟରେ ବାଭୁମା ନିଜର ଏହି ଅସାଧାରଣ ସଫଳତାର ସମସ୍ତ ଶ୍ରେୟ ଭାରତୀୟ କ୍ରିକେଟ୍ ଜଗତର କିମ୍ବଦନ୍ତୀ ତଥା ମାଷ୍ଟର ବ୍ଲାଷ୍ଟର୍ ସଚିନ ତେନ୍ଦୁଲକରଙ୍କୁ ପ୍ରଦାନ କରିଛନ୍ତି । ବାଭୂମା କହିଛନ୍ତି ଯେ ନିଜର ଶରୀରର ଉଚ୍ଚତା ଓ ଗଠନକୁ ଦୃଷ୍ଟିରେ ରଖି ସେ ସର୍ବଦା ସଚିନଙ୍କ ବ୍ୟାଟିଂ କୌଶଳକୁ ଅନୁସରଣ କରିବାକୁ ଚେଷ୍ଟା କରିଥାନ୍ତି । ନିଜର କମ୍ ଉଚ୍ଚତା କାରଣରୁ ଆଗକୁ ଯାଇ ଖେଳିବାରେ ଅସୁବିଧାରେ ପଡ଼ନ୍ତି, ତେଣୁ ଶରୀରକୁ ବଲ୍ ସହିତ ସଠିକ୍ ଭାବେ ସମନ୍ୱୟ ରକ୍ଷା କରି ମୁଭ୍ କରିବା ଏବଂ ବଲ୍କୁ ଶରୀରର ଯେତେ ସମ୍ଭବ ନିକଟରୁ ସଫଳତାର ସହ ଖେଳିବା କଳା ସେ ସଚିନଙ୍କଠାରୁ ହିଁ ଶିଖିଛନ୍ତି।
ଏହି ଚମତ୍କାର ପ୍ରତ୍ୟାବର୍ତ୍ତନ ବଳରେ ଦକ୍ଷିଣ ଆଫ୍ରିକା ଦଳ ପ୍ରଥମ ପାଳିରେ ଏକ ବିଶାଳ ସ୍କୋର୍ ଠିଆ କରିବାରେ ସଫଳ ହୋଇଛି, ଯାହା ଏହି ମ୍ୟାଚ୍ର ସମ୍ପୂର୍ଣ୍ଣ ଗତିପଥକୁ ବଦଳାଇ ଦେଇଛି। ବାଭୁମାଙ୍କ ଏହି ବୟାନ ଏବଂ ତାଙ୍କର ଅତୁଳନୀୟ ବ୍ୟାଟିଂ ପ୍ରଦର୍ଶନ ଏବେ ସାରା ବିଶ୍ୱର କ୍ରିକେଟ୍ ଜଗତରେ ଚର୍ଚ୍ଚାର ମୁଖ୍ୟ କେନ୍ଦ୍ରବିନ୍ଦୁ ପାଲଟିଛି।