ୱାସିଂଟନ: ଇରାନର ଗୋପନୀୟ ପରମାଣୁ କାର୍ଯ୍ୟକ୍ରମ ସମ୍ପର୍କିତ ସଠିକ୍ ଓ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିବା ପାଇଁ ଆମେରିକା ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ଆମେରିକୀୟ ସେନାର ସେଣ୍ଟ୍ରାଲ କମାଣ୍ଡ (CENTCOM) ପକ୍ଷରୁ ସ୍ପଷ୍ଟ କରାଯାଇଛି ଯେ, ଇରାନର ପରମାଣୁ ଠିକଣା, ଗୁପ୍ତ ପରୀକ୍ଷାଗାର, ଯନ୍ତ୍ରପାତି ଏବଂ ଏହି ପ୍ରକଳ୍ପ ସହ ଜଡ଼ିତ ବୈଜ୍ଞାନିକ ଓ ବୈଷୟିକ କର୍ମଚାରୀଙ୍କ ବିଷୟରେ ନିର୍ଭରଯୋଗ୍ୟ ସୂଚନା ଦେଲେ ପ୍ରାୟ ୨ କୋଟି ଡଲାର (୨୦ ନିୟୁତ ଡଲାର) ପର୍ଯ୍ୟନ୍ତ ନଗଦ ପୁରସ୍କାର ଦିଆଯିବ। ଏହା ସହିତ ସୂଚନାଦାତା ଏବଂ ତାଙ୍କ ପରିବାରର ସମ୍ପୂର୍ଣ୍ଣ ସୁରକ୍ଷା ନିମନ୍ତେ ଆମେରିକା ସରକାରଙ୍କ ପକ୍ଷରୁ ‘ସ୍ଥାନାନ୍ତରଣ’ ସୁବିଧା ମଧ୍ୟ ଯୋଗାଇ ଦିଆଯିବ ବୋଲି ଘୋଷଣା କରାଯାଇଛି।
ଆମେରିକା ବୈଦେଶିକ ମନ୍ତ୍ରଣାଳୟର ପ୍ରମୁଖ ଗୁପ୍ତଚର ପୁରସ୍କାର ଯୋଜନା ‘ରିୱାର୍ଡସ୍ ଫର ଜଷ୍ଟିସ୍’ ଅଧୀନରେ ଏହି ଘୋଷଣା କରାଯାଇଛି। ସୂଚନାଯୋଗ୍ୟ ଯେ, ଆନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି ର ସମସ୍ତ ନିୟମ ଏବଂ ସୁରକ୍ଷା ମାନଦଣ୍ଡକୁ ଇରାନ କ୍ରମାଗତ ଭାବେ ଅମାନ୍ୟ କରିଆସୁଛି। ଯାହାଫଳରେ ଇରାନର ୟୁରାନିୟମ୍ ସମୃଦ୍ଧିକରଣ, ପରମାଣୁ ଉପକରଣ ଏବଂ ଅତ୍ୟାଧୁନିକ ସେଣ୍ଟ୍ରିଫ୍ୟୁଜ୍ ନିର୍ମାଣ ନେଇ ସଠିକ୍ ତଥ୍ୟ ହାତେଇବାରେ ଆନ୍ତର୍ଜାତୀୟ ଏଜେନ୍ସି ବାଧାପ୍ରାପ୍ତ ହେଉଛି।
ତେଣୁ ଇରାନର ପରମାଣୁ ଅସ୍ତ୍ର ନିର୍ମାଣ ଉଦ୍ୟମକୁ ରୋକିବା ଏବଂ ମଧ୍ୟପ୍ରାଚ୍ୟରେ ଶାନ୍ତି ବଜାୟ ରଖିବା ଉଦ୍ଦେଶ୍ୟରେ ଆମେରିକା ପ୍ରଶାସନ ଗୁପ୍ତଚର ସୂଚନା ସଂଗ୍ରହ କରିବାକୁ ଏହି ପ୍ରୋତ୍ସାହନମୂଳକ ପଦକ୍ଷେପ ହାତକୁ ନେଇଛି। କୌଣସି ବ୍ୟକ୍ତି ସୁରକ୍ଷିତ ମାଧ୍ୟମରେ ସିଧାସଳଖ ଆମେରିକୀୟ ଅଧିକାରୀଙ୍କ ସହ ଯୋଗାଯୋଗ କରି ଏହି ତଥ୍ୟ ପ୍ରଦାନ କରିପାରିବେ।