ଧୋକା ଦେଇଛନ୍ତି ସିନ୍ଧିଆ: ଅଧୀର ରଂଜନ

ନୂଆଦିଲ୍ଲୀ: ବରିଷ୍ଠ କଂଗ୍ରେସ ନେତା ଜ୍ୟୋତିରାଦିତ୍ୟ ସିନ୍ଧିଆ ଆଜି ଦଳରୁ ଇସ୍ତଫା ଦେଇଛନ୍ତି । ଯାହାକୁ ନେଇ କଂଗ୍ରେସକୁ ଶକ୍ତ ଝଟ୍‌କା ଲାଗିଛି । ସିନ୍ଧିଆଙ୍କ ଇସ୍ତଫା ନେଇ କଂଗ୍ରେସ ସଂସଦୀୟ ଦଳ ନେତା ଅଧୀର ରଂଜନ୍ ଚୌଧୁରୀ ପ୍ରତିକ୍ରିୟା ପ୍ରକାଶ କରିଛନ୍ତି । ସେ କହିଛନ୍ତି ଯେ, ଦଳ ତାଙ୍କୁ ସର୍ବାଧିକ ଗୁରୁତ୍ୱ ଦେଇଥିଲା । ସେ କିନ୍ତୁ ଦଳ ପ୍ରତି ପ୍ରତାରଣା କରିଛନ୍ତି । କଂଗ୍ରେସ ଦଳକୁ ସିନ୍ଧିଆ ଧୋକା ଦେଇଥିବା କହିଛନ୍ତି ଅଧୀର ।
ସେ ଆହୁରି କହିଛନ୍ତି ଯେ, କଂଗ୍ରେସରେ ସିନ୍ଧିଆ ରାଜା ଭଳି ଥିଲେ । କିନ୍ତୁ ବିଜେପିରେ ସେ ପ୍ରଜା ଭଳି ରହିବେ । ଅନ୍ୟପଟେ ଜ୍ୟୋତିରାଦିତ୍ୟ ସିନ୍ଧିଆ କହିଛନ୍ତି ଯେ, ଲୋକଙ୍କ ସେବା ପାଇଁ ସେ ରାଜନୀତିକୁ ଆସିଥିଲେ । କିନ୍ତୁ କଂଗ୍ରେସରେ ରହି ସେ ଲୋକଙ୍କ ସେବା କରି ପାରୁନଥିଲେ ।