ମୁମ୍ବାଇ: ବଲିଉଡ୍ ଅଭିନେତ୍ରୀ ରଶ୍ମିକା ମନ୍ଦାନାଙ୍କ ଡିପ୍ ଫେକ୍ ଭିଡିଓ ସୋସିଆଲ ମିଡିଆରେ ଭାଇରାଲ କରିବା ଅଭିଯୋଗରେ ଦିଲ୍ଲୀ ପୁଲିସ ଆନ୍ଧ୍ରପ୍ରଦେଶର ଜଣେ ଇଞ୍ଜିନିୟରଙ୍କୁ ଗିରଫ କରିଛି। ଇମାନି ନବୀନ ନାମକ ଏହି ଅଭିଯୁକ୍ତ ସ୍ୱୀକାର କରିଛି ଯେ ଅଭିନେତ୍ରୀଙ୍କୁ ଦେଖାଇ ତାଙ୍କ ଇନଷ୍ଟାଗ୍ରାମ ଫ୍ୟାନ୍ ପେଜର ଫଲୋଅର୍ସ ବଢ଼ାଇବା ପାଇଁ ସେ ଏହି ଭିଡିଓ ତିଆରି କରିଛନ୍ତି।
ବ୍ରିଟିଶ-ଭାରତୀୟ ଇନଫ୍ଲୁଏନସର ଜାରା ପଟେଲଙ୍କ ଭିଡିଓରେ ରଶ୍ମିକା ମନ୍ଦାନାଙ୍କ ମୁହଁ ଲଗାଇ ଥିବା ଏହି ଡିପ୍ ଫେକ୍ ଭିଡିଓ ଅକ୍ଟୋବର ୨୦୨୩ରେ ଭାଇରାଲ୍ ହୋଇଥିଲା ଏବଂ ଟେକ୍ନୋଲୋଜିର ଅପବ୍ୟବହାରକୁ ନେଇ ବିତର୍କ ଆରମ୍ଭ ହୋଇଥିଲା। ଅନେକ ସେଲିବ୍ରିଟି ଏବଂ ସାମାଜିକ କର୍ମୀ ଅଭିନେତାଙ୍କ ଗୋପନୀୟତା ଏବଂ ମର୍ଯ୍ୟାଦା ଉଲ୍ଲଂଘନ କୁ ନେଇ ଚିନ୍ତା ପ୍ରକଟ କରିଛନ୍ତି।
ଦିଲ୍ଲୀ ପୋଲିସ ଭାରତୀୟ ଦଣ୍ଡବିଧି ଏବଂ ସୂଚନା ପ୍ରଯୁକ୍ତି ବିଦ୍ୟା ଆଇନର ବିଭିନ୍ନ ଧାରା ଅନୁଯାୟୀ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ଭିଡିଓ ସହ ଜଡିତ ୫୦୦ରୁ ଅଧିକ ସୋସିଆଲ ମିଡିଆ ଆକାଉଣ୍ଟ ଯାଞ୍ଚ କରିବା ପରେ ତଦନ୍ତ ଅଧିକାରୀ ନବୀନଙ୍କୁ ଠାବ କରି ଗୁଣ୍ଟୁର ଜିଲ୍ଲାର ତାଙ୍କ ଗାଁରୁ ଗିରଫ କରିଛନ୍ତି।
ପଚରାଉଚରା ବେଳେ ନବୀନ ପ୍ରକାଶ କରିଛନ୍ତି ଯେ ସେ ରଶ୍ମିକା ମନ୍ଦାନାଙ୍କ ପ୍ରଶଂସକ ଏବଂ ଅନ୍ୟ ତିନି ଜଣ ସେଲିବ୍ରିଟିଙ୍କ ଫ୍ୟାନ୍ ପେଜ ତିଆରି କରି ପରିଚାଳନା କରୁଥିଲେ । ସେ କହିଛନ୍ତି ଯେ ସେ ଏକ ଅନଲାଇନ୍ ଟୁଲ୍ ବ୍ୟବହାର କରି ଡିପ୍ ଫେକ୍ ଭିଡିଓ ତିଆରି କରିଛନ୍ତି ଏବଂ ଅଧିକ ଅନୁଗାମୀଙ୍କୁ ଆକୃଷ୍ଟ କରିବା ପାଇଁ ଏହାକୁ ତାଙ୍କ ଫ୍ୟାନ୍ ପେଜ୍ ରେ ପୋଷ୍ଟ କରିଥିଲେ। ଭିଡିଓ ଅପଲୋଡ କରିବାର ଦୁଇ ସପ୍ତାହ ମଧ୍ୟରେ ତାଙ୍କର ଫ୍ୟାନ୍ ପେଜ୍ ୯୦,୦୦୦ରୁ ୧ ଲକ୍ଷ ୮ ହଜାରକୁ ବୃଦ୍ଧି ପାଇଛି ବୋଲି ସେ ଦାବି କରିଛନ୍ତି।
ତେବେ ଏହି ଭିଡିଓ ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିବା ପରେ ନବୀନ ଭୟଭୀତ ହୋଇ ନିଜ ଫ୍ୟାନ୍ ପେଜରୁ ଏହି ଭିଡିଓକୁ ଡିଲିଟ୍ କରିଦେଇଥିଲେ। ସେ ତାଙ୍କ ଫ୍ୟାନ୍ ପେଜର ନାମ ମଧ୍ୟ ପରିବର୍ତ୍ତନ କରିଥିଲେ ଏବଂ ତାଙ୍କ ଡିଭାଇସରୁ ସମ୍ପୃକ୍ତ ଡିଜିଟାଲ୍ ଡାଟା ଡିଲିଟ୍ କରିଥିଲେ।
ନବୀନ ଇଲେକ୍ଟ୍ରୋନିକ୍ସ ଆଣ୍ଡ କମ୍ୟୁନିକେସନରେ ବିଟେକ୍ ଗ୍ରାଜୁଏଟ ହୋଇଥିବା ବେଳେ ଗୁଗଲ ଗ୍ୟାରେଜରୁ ଡିଜିଟାଲ ମାର୍କେଟିଂରେ ସାର୍ଟିଫିକେଟ ହାସଲ କରିଛନ୍ତି । ୱେବସାଇଟ୍ ଡେଭଲପମେଣ୍ଟ, ଫଟୋସପ୍, ଭିଡିଓ ଏଡିଟିଂ ଏବଂ ସର୍ଚ୍ଚ ଇଞ୍ଜିନ୍ ଅପ୍ଟିମାଇଜେସନ୍ ରେ ମଧ୍ୟ ତାଙ୍କର ଦକ୍ଷତା ରହିଛି। ସେ ନିଜ ଘରୁ ଏହି ସବୁ କାମ କରୁଥିଲେ।
ଦିଲ୍ଲୀ ପୁଲିସ ଏହି ଘଟଣାର ଅଧିକ ତଦନ୍ତ କରିବା ସହ ନବୀନଙ୍କ ଅନ୍ୟ କୌଣସି ସହଯୋଗୀଙ୍କୁ ଖୋଜୁଛି। ସେମାନେ ଭିଡିଓ ତିଆରି କରିବା ପଛର ଉଦ୍ଦେଶ୍ୟ ଜାଣିବାକୁ ଚେଷ୍ଟା କରୁଛନ୍ତି।
ଡିପଫେକ୍ ଅଭିଯୋଗ ପରେ ଇଣ୍ଟେଲିଜେନ୍ସ ଫ୍ୟୁଜନ ଆଣ୍ଡ ଷ୍ଟ୍ରାଟେଜିକ୍ ଅପରେସନ (ଆଇଏଫଏସଓ) ୟୁନିଟ୍ ତଦନ୍ତ ଆରମ୍ଭ କରି ଡିପଫେକ୍ ଭିଡିଓ ସହ ଜଡିତ ୫୦୦ରୁ ଅଧିକ ସୋସିଆଲ ମିଡିଆ ଆକାଉଣ୍ଟକୁ ଯାଞ୍ଚ କରିଥିଲା।
ଏହାପରେ ସାଇବର ଲ୍ୟାବ୍ ଏହି ଭିଡିଓଗୁଡ଼ିକୁ ଅତି ନିକଟରୁ ବିଶ୍ଳେଷଣ କରିଥିଲା, ଯାହା ଦ୍ୱାରା ସମଗ୍ର ଭାରତରେ ଅନେକ ସୋସିଆଲ ମିଡିଆ ଆକାଉଣ୍ଟଧାରୀଙ୍କୁ ପଚରାଉଚରା କରାଯାଇଥିଲା।
ବ୍ୟାପକ ବିଶ୍ଳେଷଣ ଏବଂ ପଚରାଉଚରା ପରେ ଆଇଏଫଏସଓ ୟୁନିଟ ଅଭିଯୁକ୍ତଙ୍କ ଇନଷ୍ଟାଗ୍ରାମ ଆକାଉଣ୍ଟକୁ ଆନ୍ଧ୍ରପ୍ରଦେଶର ଗୁଣ୍ଟୁରରୁ ଠାବ କରିଛି। ଗିରଫ ପରେ ଇମାନୀ ନବୀନଙ୍କୁ ଦିଲ୍ଲୀ ଅଣାଯାଇଥିଲା। ପଚରାଉଚରା ବେଳେ ସେ ଅପରାଧ କରିଥିବା ସ୍ୱୀକାର କରିଛି।