ମହାକାଳପଡ଼ା: ଜଣେ ମାଛ ଧରାଳିଙ୍କୁ କୁମ୍ଭୀର ଟାଣି ନେଇଥିବା ଅଭିଯୋଗ ହୋଇଛି । ନିଖୋଜ ମାଛ ଧରାଳି ହେଲେ ବରକନ୍ଧା ଗ୍ରାମର ଚକ୍ରଧର ବେହେରା(୬୯)। ମହାକାଳପଡ଼ା ବ୍ଲକ ଦେଇ ପ୍ରବାହିତ ମହାନଦୀ ଶାଖା ଗୁପ୍ତଗିରୀ ନାଳରେ ଜଣେ ମାଛ ଧରାଳିଙ୍କୁ କୁମ୍ଭୀର ଟାଣି ନେଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ଗୁରୁବାର ପୂର୍ବାହ୍ନରେ ଚକ୍ରଧର ଜାଲ ପକାଇବାକୁ ନାଳକୁ ଯାଇ ଘରକୁ ଫେରି ନଥିଲେ। ପରିବାର ଲୋକେ ସନ୍ଦେହ କରି ଗାଁ ନିକଟ ଗୁପ୍ତଗିରି ନାଳକୁ ଯାଇ ଖୋଜାଖୋଜି କରିଥିଲେ।
ସୂଚନାଥାଉକି, ଗୁପ୍ତଗିରି ନାଳ ସେତୁ ନିକଟ ଏକ ଗଛରେ ଭଉଁରୀ ଜାଲ ବନ୍ଧା ଯାଇଥିବା ଦେଖିବାକୁ ମିଳିଥିଲା। ନିକଟରେ ଚକ୍ରଧରଙ୍କ ସାଇକେଲ ଓ ଚପଲ ରହିଥିଲା। ନାଳରେ ଜାଲ ଲାଗିବା ପରେ ସେ ପାଣିରେ ପଶି ଛଡ଼ାଇବା ପାଇଁ ଉଦ୍ୟମ କରୁଥିବା ବେଳେ କୁମ୍ଭୀର ଟାଣି ନେଇଥିବା ଅନୁମାନ କରାଯାଉଛି।
ଖବର ପାଇ ସ୍ଥାନୀୟ ଲୋକେ ମହାକାଳପଡ଼ା ଅଗ୍ନିଶମ ବାହିନୀକୁ ଖବର ଦେଇଥିଲେ। ଗୁରୁବାର ସନ୍ଧ୍ୟା ସୁଦ୍ଧା କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନିଖୋଜ ମାଛ ଧରାଳିଙ୍କୁ ଖୋଜାଖୋଜି କରିଥିଲେ କିନ୍ତୁ ଠାବ କରି ପାରି ନାହାନ୍ତି। ଚକ୍ରଧର ଗୋଜାବନ୍ଧ ଗାନ୍ଧିଜୀ ବିଦ୍ୟାପୀଠରୁ ଚତୁର୍ଥ ଶ୍ରେଣୀ କର୍ମଚାରୀଭାବେ କାର୍ଯ୍ୟକରି ଅବସର ଗ୍ରହଣ କରିଥିଲେ।
ମହାନଦୀରେ ବନ୍ୟା ଯୋଗୁ ଏହି ଗୁପ୍ତଗିରି ନାଳରେ ବଉଳା କୁମ୍ଭୀର ବୁଲୁଥିବାର ସ୍ଥାନୀୟ ଲୋକେ କହିଛନ୍ତି। ପରିବାରର ଏକମାତ୍ର ରୋଗଜରିଆ ବ୍ୟକ୍ତିଙ୍କ ନିଖୋଜ ପରେ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି।