ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ବିଲ୍ ଗେଟ୍ସଙ୍କ ମଧ୍ୟରେ ଆଲୋଚନା ହୋଇଛି । ମାଇକ୍ରୋସଫ୍ଟ ପ୍ରତିଷ୍ଠାତା ବିଲ୍ ଗେଟ୍ସଙ୍କ ସହ ଏଆଇ ଠୁ ଆରମ୍ଭ କରି ସ୍ବାସ୍ଥ୍ୟ ଏବଂ ଜଳବାୟୁ ଉପରେ ମଧ୍ୟ ଚର୍ଚ୍ଚା କରିଛନ୍ତି ପ୍ରଧାନମନ୍ତ୍ରୀ ମୋଦୀ । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଯେତେବେଳେ ବିଶ୍ୱ କରୋନା ଟିକା ଯୋଗାଇବାରେ ସକ୍ଷମ ହୋଇନଥିଲା, ସେତେବେଳେ ଭାରତ କୋ-ୱିନ ଆପ୍ ମାଧ୍ୟମରେ ଲୋକଙ୍କୁ ଟିକା ପ୍ରଦାନ କରିଥିଲା । ଏହି ଆପରୁ କେଉଁ ଟିକା କେଉଁ ସମୟରେ ଗ୍ରହଣ କରାଯିବ ସେ ନେଇ ସବିଶେଷ ତଥ୍ୟ ମିଳିପାରୁଥିଲା । ଏପରିକି ଭାରତ ଅନଲାଇନରେ କରୋନା ଟିକା ନେଉଥିବା ପ୍ରମାଣପତ୍ର ମଧ୍ୟ ଦେଉଥିଲା ।
ଦେଶରେ ଏଆଇ ଟେକ୍ନୋଲୋଜିର ବ୍ୟବହାର ସମ୍ପର୍କରେ ପିଏମ ମୋଦୀ ବିଲ ଗେଟ୍ସଙ୍କ ସହ ଆଲୋଚନା କରିଛନ୍ତି । ମୋଦୀ କହିଛନ୍ତି ଯେ, ଏଆଇ ମାଧ୍ୟମରେ ଭାଷା ସମ୍ବନ୍ଧୀୟ ସମସ୍ୟାର ସମାଧାନ ହୋଇପାରିବ। କାଶୀରେ ଆୟୋଜିତ ତାମିଲ କାର୍ଯ୍ୟକ୍ରମ ସମୟରେ ସେଠାରେ ଥିବା ତାମିଲ ଲୋକଙ୍କ ସହ କଥା ହେବା ପାଇଁ ସେ ଏଆଇ ବ୍ୟବହାର କରିଥିଲେ। ସେ ହିନ୍ଦୀରେ କଥା ହୋଇଥିଲେ କିନ୍ତୁ ତାଙ୍କ କଥା ତାମିଲନାଡୁର ଲୋକଙ୍କୁ ତାମିଲ ଭାଷାରେ AI ମାଧ୍ୟମରେ କୁହାଯାଇଥିଲା । ଏହି ଉପକରଣକୁ କିପରି ବ୍ୟବହାର କରାଯିବ ତାହା ଆମେ ଜାଣିବା ଉଚିତ୍। ପିଏମ ମୋଦୀ କହିଛନ୍ତି, “ଯଦି ଆମେ AI କୁ ମ୍ୟାଜିକ ଟୁଲ ଭାବରେ ବ୍ୟବହାର କରୁ ତେବେ ଏହା ଏକ ବଡ ଅନ୍ୟାୟ ହେବ। ମୋତେ ତ ChatGPT ସହିତ ପ୍ରତିଦ୍ୱନ୍ଦ୍ୱିତା କରିବା ଉଚିତ୍। ମୁଁ AI ଠାରୁ ଆଗକୁ ଯିବାକୁ ନିଶ୍ଚୟ ଚେଷ୍ଟା କରିବି ।
ପ୍ରଧାନମନ୍ତ୍ରୀ ମୋଦୀ ଏବଂ ବିଲ୍ ଗେଟ୍ସଙ୍କ ମଧ୍ୟରେ ସ୍ୱାସ୍ଥ୍ୟ, କୃଷି ଏବଂ ଶିକ୍ଷା କ୍ଷେତ୍ର ଉପରେ ମଧ୍ୟ ଆଲୋଚନା ହୋଇଛି । ବିଲ୍ ଗେଟ୍ସ କହିଛନ୍ତି ଯେ, ଭାରତ କେବଳ ଟେକ୍ନୋଲୋଜିକୁ ଆପଣେଇନାହିଁ ବରଂ ଏହାକୁ ବ୍ୟବହାର କରି ଅଗ୍ରଗତି ମଧ୍ୟ କରୁଛି । ମୋଦୀ ଆହୁରି ମଧ୍ୟ କହିଛନ୍ତି ଯେ, ଭାରତ ସରକାରଙ୍କ ଉଦ୍ଦେଶ୍ୟ ହେଉଛି ପ୍ରତ୍ୟେକ ପିଲାଙ୍କୁ, ପ୍ରତ୍ୟେକ ଗାଁକୁ ଡିଜିଟାଲ ଶିକ୍ଷା ପ୍ରଦାନ କରିବା। ସେ ନିଷ୍ପତ୍ତି ନେଇଛନ୍ତି ଯେ ସେ ଭାରତରେ ଡିଜିଟାଲ ବିଭାଜନ ହେବାକୁ ଦେବେ ନାହିଁ ଏବଂ ପ୍ରତ୍ୟକ ଗାଁକୁ ଡିଜିଟାଲ ଭିତ୍ତିଭୂମି ଯୋଗାଇଦେବେ । ପ୍ରଧାନମନ୍ତ୍ରୀ ମୋଦୀ ବିଲ ଗେଟ୍ସଙ୍କୁ ତାଙ୍କର ଲକ୍ଷ୍ୟ ବିଷୟରେ ମଧ୍ୟ କହିଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ସେ ଦେଶର ୩ କୋଟି ମହିଳାଙ୍କୁ ଲକ୍ଷପତି ଦିଦି କରିବାକୁ ଚାହୁଁଛନ୍ତି । ସେ ଦେଶର କୃଷି କ୍ଷେତ୍ରକୁ ଆଧୁନିକ କୃଷି କ୍ଷେତ୍ର କରିବାକୁ ଚାହୁଁଛନ୍ତି ।
ବିଲ୍ ଗେଟ୍ସ ପ୍ରଧାନମନ୍ତ୍ରୀ ମୋଦୀଙ୍କୁ ପଚାରିଥିଲେ ଯେ ଟେକ୍ନୋଲୋଜି କ୍ଷେତ୍ରରେ ଭାରତର ଥିମ୍ ହେଉଛି ଏହା ସମସ୍ତଙ୍କ ପାଇଁ ହେବା ଉଚିତ୍। ଏହି ପ୍ରଶ୍ନର ଉତ୍ତରରେ ପିଏମ ମୋଦୀ କହିଛନ୍ତି ଯେ, ସେ ଟେକ୍ନୋଲୋଜିରେ ମହିଳାଙ୍କ ପାଇଁ ଅନୁକୂଳ ଜିନିଷ ଯୋଡିବାକୁ ଚାହୁଁଛନ୍ତି, କାରଣ ମହିଳାମାନେ ଏସବୁକୁ ଶୀଘ୍ର ଗ୍ରହଣ କରନ୍ତି। ସେ ‘ନମୋ ଡ୍ରୋନ୍ ଦିଦି’ ଏବଂ ‘୩କୋଟି ମହିଳାଙ୍କୁ ଲକ୍ଷପତି ଦିଦି’ କରିବାକୁ କାର୍ଯ୍ୟକ୍ରମ ଗ୍ରହଣ କରିଛନ୍ତି। ସେ ସେମାନଙ୍କ ମାଧ୍ୟମରେ ମାନସିକ ପରିବର୍ତ୍ତନ ଆଣିବାକୁ ଚାହୁଁଛନ୍ତି । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଗାଁ ମହିଳାମାନେ ଆଉ ଗାଇ ଏବଂ ମେଣ୍ଢା ଚରାଇବେ ନାହିଁ। ସେ ସେମାନଙ୍କ ହାତରେ ଟେକ୍ନୋଲୋଜି ଦେବାକୁ ଚାହୁଁଛନ୍ତି।