ଭୁବନେଶ୍ୱର: ଦୁଇଟି ବାତ୍ୟା ଗଲାଣି । ଆସୁଛି ଆଉ ଗୋଟେ ବାତ୍ୟା । ସତ ହେଉଛି ପାଞ୍ଜି ଗଣନା। ନଭେମ୍ବର ୧୫ ଆଡକୁ ଆସିପାରେ ନୂଆ ବାତ୍ୟା। କିଛି ଆଞ୍ଚଳିକ ଗଣମାଧ୍ୟମ ଏବଂ ଖଦିରତ୍ନ ପାଞ୍ଜିର ଆକଳନ ଅନୁଯାୟୀ ନଭେମ୍ବର ୧୫ ଆଡ଼କୁ ଆଉ ଏକ ବାତ୍ୟା ଆସିବାର ଆଶଙ୍କା ଥିବା ନେଇ ଚର୍ଚ୍ଚା ହେଉଛି, ଯାହା କୌଣସି ବୈଜ୍ଞାନିକ ତଥ୍ୟ ଆଧାରିତ ନୁହେଁ। ଭାରତୀୟ ପାଣିପାଗ ବିଭାଗ (IMD) ର ନଭେମ୍ବର ୫ ର ରିପୋର୍ଟ ଅନୁଯାୟୀ, ଓଡ଼ିଶାରେ ଆଗାମୀ କିଛି ଦିନ ପର୍ଯ୍ୟନ୍ତ କୌଣସି ବଡ଼ ବାତ୍ୟାର ସତର୍କ ସୂଚନା ନାହିଁ। ରାଜ୍ୟରେ ଏବେ ପାଗ ସ୍ବାଭାବିକ ରହିବ।
ବଙ୍ଗୋପସାଗରରେ ଗୋଟିଏ ପରେ ଗୋଟିଏ ବାତ୍ୟା ସୃଷ୍ଟି ହେଉଥିବାରୁ ଏବେ ଓଡ଼ିଆ ପାଞ୍ଜିର ବାତ୍ୟା ଗଣନା ସତ ପ୍ରମାଣିତ ହେଉଥିବା ନେଇ ସାରା ରାଜ୍ୟରେ ଚର୍ଚ୍ଚା ଜୋର୍ ଧରିଛି । ଅକ୍ଟୋବର ଶେଷ ସପ୍ତାହରେ ଆସିଥିବା ବାତ୍ୟା ‘ଅର୍ଣ୍ଣବ’ (Cyclone Arnab) ଏବଂ ତା’ ପଛକୁ ନଭେମ୍ବର ପ୍ରଥମ ସପ୍ତାହରେ ସୃଷ୍ଟି ହୋଇଥିବା ବାତ୍ୟା ‘ମୁରାସୁ’ (Cyclone Murasu) କୁ ନେଇ ଜ୍ୟୋତିଷୀୟ ଆକଳନ ସତ ହୋଇଥିବାରୁ ସାଧାରଣ ଲୋକ ଓ ବୈଜ୍ଞାନିକ ମଧ୍ୟ ଆଶ୍ଚର୍ଯ୍ୟ ପ୍ରକଟ କରିଛନ୍ତି ।
ଓଡ଼ିଶାର ପାରମ୍ପରିକ ପାଞ୍ଜି (ଯେପରିକି ଅସଲି ଖଦିରତ୍ନ ପାଞ୍ଜି) ଏବଂ ଜ୍ୟୋତିର୍ବିଦମାନେ ଗ୍ରହମାନଙ୍କର ଚଳନ, ବିଶେଷ କରି ରବିଙ୍କର କନ୍ୟା ରାଶିରୁ ତୁଳା ରାଶିକୁ ସଂକ୍ରମଣ ଏବଂ ଅନ୍ୟାନ୍ୟ ଗ୍ରହ ସ୍ଥିତିକୁ ଆଧାର କରି ବର୍ଷକ ପୂର୍ବରୁ ଏହି ସମୟରେ ବଡ଼ ବାତ୍ୟା ଓ ପ୍ରବଳ ବର୍ଷା ହେବାର ଆକଳନ କରିଥିଲେ । ବାତ୍ୟା ‘ଅର୍ଣ୍ଣବ’ର ପ୍ରଭାବରେ ଦକ୍ଷିଣ ଓଡ଼ିଶାର ଗଞ୍ଜାମ, ଗଜପତି ଓ କନ୍ଧମାଳ ଜିଲ୍ଲାରେ ପ୍ରବଳ ବନ୍ୟା ଏବଂ କ୍ଷୟକ୍ଷତି ଘଟିଛି । ଗଞ୍ଜାମର ପାତ୍ରପୁରଠାରେ ୨୪ ଘଣ୍ଟାରେ ସର୍ବାଧିକ ୫୪୬ ମିମି ବର୍ଷା ରେକର୍ଡ କରାଯାଇଥିଲା ।
ଅର୍ଣ୍ଣବର କ୍ଷତ ନଶୁଖୁଣୁ ବଙ୍ଗୋପସାଗରରେ ସୃଷ୍ଟି ହୋଇଥିବା ଦ୍ୱିତୀୟ ବାତ୍ୟା ‘ମୁରାସୁ’ ମୁଖ୍ୟତଃ ଆନ୍ଧ୍ରପ୍ରଦେଶ ଉପକୂଳମୁହାଁ ହୋଇଥିଲା, ଯାହାଫଳରେ ଓଡ଼ିଶା ବଡ଼ ବିପଦରୁ ରକ୍ଷା ପାଇଥିଲେ ମଧ୍ୟ ଦକ୍ଷିଣ ଓଡ଼ିଶାରେ ଆଗୁଆ ସତର୍କତା ସ୍ୱରୂପ ବ୍ୟାପକ ସ୍ଥାନାନ୍ତରଣ କରାଯାଇଥିଲା ।