ରିୟାଦ/ନୂଆଦିଲ୍ଲୀ: ସବୁକିଛି ଠିକ୍ଠାକ୍ ଚାଲିଥିଲା। ଆକାଶ ମାର୍ଗରେ ନିଜ ଗନ୍ତବ୍ୟ ସ୍ଥଳ ଆଡ଼କୁ ଆଗେଇ ଚାଲିଥିଲା ବିଶ୍ୱର ଅନ୍ୟତମ ପ୍ରତିଷ୍ଠିତ ତେଲ କମ୍ପାନୀ ‘ସାଉଦି ଆରାମକୋ’ର ଏକ ହେଲିକପ୍ଟର । କିନ୍ତୁ କେହି ଜାଣିନଥିଲେ ଯେ ସେହି ଉଡ଼ାଣ ହିଁ ସେମାନଙ୍କ ଜୀବନର ଶେଷ ଉଡ଼ାଣ ହେବାକୁ ଯାଉଛି। ସାଉଦି ଆରବର ‘ରାସ୍ ତନୁରା’ ଅଞ୍ଚଳରୁ ଆସିଛି ଏକ ହୃଦୟ ବିଦାରକ ଖବର।
ସେଠାରେ ଆରାମକୋ କମ୍ପାନୀର ଏକ ହେଲିକପ୍ଟର ଭୟଙ୍କର ଦୁର୍ଘଟଣାର ଶିକାର ହୋଇଛି, ଯେଉଁଥିରେ ହେଲିକପ୍ଟରରେ ଥିବା ସମସ୍ତ ୧୪ ଜଣ ଯାତ୍ରୀଙ୍କର ଦାରୁଣ ମୃତ୍ୟୁ ଘଟିଛି। ଏହି ବଡ଼ ବିପର୍ଯ୍ୟୟ ପରେ ସାଉଦି ଆରବ ସମେତ ସାରା ବିଶ୍ୱର ଶକ୍ତି କ୍ଷେତ୍ରରେ ଶୋକର ଛାୟା ଖେଳିଯାଇଛି।
ପ୍ରାଥମିକ ସୂଚନା ଅନୁଯାୟୀ, ହେଲିକପ୍ଟରଟି କମ୍ପାନୀର କର୍ମଚାରୀ ଓ କିଛି ବୈଷୟିକ ବିଶେଷଜ୍ଞଙ୍କୁ ନେଇ ଉଡ଼ାଣ ଭରିଥିଲା। ତେବେ ରାସ୍ ତନୁରା ଅଞ୍ଚଳରେ ପହଞ୍ଚିବା ପରେ ହଠାତ୍ ଏଥିରେ ଯାନ୍ତ୍ରିକ ତ୍ରୁଟି ଦେଖାଦେଇଥିଲା କିମ୍ବା ଖରାପ ପାଗ ଯୋଗୁଁ ଏହା ନିୟନ୍ତ୍ରଣ ହରାଇଥିଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଦେଖୁ ଦେଖୁ ହେଲିକପ୍ଟରଟି ଆକାଶରୁ ସିଧା ତଳକୁ ଖସିପଡ଼ିଥିଲା ଏବଂ ଭୂମିରେ ପିଟି ହେବା ମାତ୍ରେ ସେଥିରେ ନିଆଁ ଲାଗିଯାଇଥିଲା। ବିସ୍ଫୋରଣ ଏତେ ଭୟଙ୍କର ଥିଲା ଯେ ଭିତରେ ଥିବା କୌଣସି ଯାତ୍ରୀଙ୍କୁ ବଞ୍ଚିବାର ସାମାନ୍ୟତମ ସୁଯୋଗ ମଧ୍ୟ ମିଳିନଥିଲା।
ବିଶ୍ୱର ସବୁଠୁ ଧନୀ ତେଲ କମ୍ପାନୀ ହୋଇଥିବାରୁ ଆରାମକୋ ନିଜର ବିମାନ ଓ ହେଲିକପ୍ଟରଗୁଡ଼ିକର ସୁରକ୍ଷା ଏବଂ ରକ୍ଷଣାବେକ୍ଷଣ ଉପରେ ସର୍ବାଧିକ ଗୁରୁତ୍ୱ ଦେଇଥାଏ। ଏଭଳି ସ୍ଥିତିରେ ଏହି ହାଇପ୍ରୋଫାଇଲ୍ ହେଲିକପ୍ଟରଟି କେମିତି କ୍ରାଶ୍ ହେଲା, ତାହାକୁ ନେଇ ଅନେକ ପ୍ରଶ୍ନ ଉଠୁଛି। ଏହା ପଛରେ କୌଣସି ବେପରୁଆ ମନୋଭାବ ଥିଲା ନା ଏହା ଏକ ଦୈବୀ ଦୁର୍ଘଟଣା, ତାହାର ଉଚ୍ଚସ୍ତରୀୟ ତଦନ୍ତ ପାଇଁ ସାଉଦି ସରକାର ନିର୍ଦ୍ଦେଶ ଦେଇଛନ୍ତି।
ଘଟଣାସ୍ଥଳରେ ସାଉଦି ଆରବର ଜରୁରୀକାଳୀନ ସେବା ସଂସ୍ଥା ଏବଂ ଆରାମକୋର ସୁରକ୍ଷା ଦଳ ପହଞ୍ଚି ମୃତଦେହଗୁଡ଼ିକୁ ଉଦ୍ଧାର କରିଛନ୍ତି। ମୃତକଙ୍କ ମଧ୍ୟରେ କେଉଁ କେଉଁ ଦେଶର ନାଗରିକ ଥିଲେ, ସେ ନେଇ ସମ୍ପୂର୍ଣ୍ଣ ତାଲିକା ଏପର୍ଯ୍ୟନ୍ତ ସାର୍ବଜନୀନ କରାଯାଇନାହିଁ। ବ୍ଲାକ୍ ବକ୍ସ ମିଳିବା ପରେ ହିଁ ଦୁର୍ଘଟଣାର ପ୍ରକୃତ କାରଣ ଏବଂ ସେହି ଶେଷ ମୁହୂର୍ତ୍ତରେ କଣ ଘଟିଥିଲା, ତାହା ଉପରୁ ପରଦା ହଟିବ।
