ନୂଆଦିଲ୍ଲୀ: ଦିଲ୍ଲୀ ମ୍ୟୁନିସିପାଲ କର୍ପୋରେସନର ସଫେଇ କର୍ମଚାରୀଙ୍କ ପାଇଁ ଏକ ଖୁସି ଖବର । ମ୍ୟୁନିସିପାଲିଟି କର୍ପୋରେସନର ପ୍ରାୟ ୫ ହଜାର କର୍ମଚାରୀଙ୍କ ଚାକିରି ନିଶ୍ଚିତ କରିବା ନେଇ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ମୁଖ୍ୟମନ୍ତ୍ରୀ କେଜ୍ରିଓ୍ୱାଲ କହିଛନ୍ତି ଯେ, ବର୍ତ୍ତମାନ ପର୍ଯ୍ୟନ୍ତ ତାଙ୍କ ସରକାର ୬ ହଜାରରୁ ଅଧିକ ସୁରକ୍ଷା କର୍ମଚାରୀଙ୍କ ଚାକିରି ନିଶ୍ଚିତ କରିଛନ୍ତି । ଏହି ଘୋଷଣା ପରେ ସେ ବିଜେପିକୁ ଟାର୍ଗେଟ କରିଛନ୍ତି ।
ସିଏମ୍ ଅରବିନ୍ଦ କେଜ୍ରିୱାଲ କହିଛନ୍ତି ଯେ, ‘ଗତକାଲି ମ୍ୟୁନିସିପାଲିଟି କର୍ପୋରେସନ ସଦନର ଏକ ବୈଠକ ଅନୁଷ୍ଠିତ ହୋଇଥିଲା । ଉକ୍ତ ବୈଠକରେ ଏକ ପ୍ରସ୍ତାବ ଉପସ୍ଥାପନ କରୁଥିବାବେଳେ ମ୍ୟୁନିସିପାଲିଟି କର୍ପୋରେସନର ପ୍ରାୟ ୫ ହଜାର କର୍ମଚାରୀଙ୍କ ନିଯୁକ୍ତି ନିଶ୍ଚିତ ହେବ ବୋଲି ଅନୁମୋଦନ କରାଯାଇଛି । ଜାନୁଆରୀରେ ମ୍ୟୁନିସିପାଲିଟି କର୍ପୋରେସନରେ ଆମ ସରକାର ଗଠନ ହୋଇଥିବାରୁ ଆମେ ବର୍ତ୍ତମାନ ପର୍ଯ୍ୟନ୍ତ ୬ ହଜାର ୪୯୪ ଜଣ ସଫେଇ କର୍ମଚାରୀଙ୍କ ଚାକିରି ନିଶ୍ଚିତ କରିଛୁ।’
ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ବିଜେପି ଉପରେ କଡା ଆରୋପ ଲଗାଇ କହିଛନ୍ତି ଯେ, ମ୍ୟୁନିସିପାଲିଟି କର୍ପୋରେସନରେ ୧୫ ବର୍ଷ ଧରି ବିଜେପି ସରକାର ସଫେଇ କର୍ମଚାରୀଙ୍କୁ ଶୋଷଣ କରିବାରେ ଲାଗିଥିଲା । ପୂର୍ବରୁ ମ୍ୟୁନିସିପାଲିଟି କର୍ପୋରେସନରେ ବହୁ ଦୁର୍ନୀତି ହୋଇଆସୁଥିଲା । ଖାଲି ସେତିକି ନୁହେଁ ସଫେଇ କର୍ମଚାରୀମାନଙ୍କର ୩-୪ ମାସ ଦରମା ମଧ୍ୟ ମିଳୁନଥିଲା । ଯେଉଁଥିପାଇଁ କର୍ମଚାରୀଙ୍କୁ ବିରୋଧ କରିବାକୁ ପଡିଥିଲା । କିନ୍ତୁ ଗତ ୧୦ ମାସ ମଧ୍ୟରେ, ଆମେ ଅନେକ ଭୁଲ ଜିନିଷ ବନ୍ଦ କରିଛୁ, ଯାହା ପରେ ସଫେଇ କର୍ମଚାରୀମାନେ ଠିକ୍ ସମୟରେ ସେମାନଙ୍କ ଦରମା ପାଉଛନ୍ତି ।
ସେ ଆହୁରି କହିଛନ୍ତି ଯେ, ସେମାନଙ୍କୁ ସ୍ଥାୟୀ କରାଯାଉ ବୋଲି ସଫେଇ କର୍ମଚାରୀମାନେ ଦାବି କରିଥିଲେ । ଆମେ ଏହି ପ୍ରକ୍ରିୟାକୁ ଆଗକୁ ନେଇଛୁ । ଆମେ ଯାହା ପ୍ରତିଜ୍ଞା କରିଥିଲୁ ତାହା ପାଳନ କରିଛୁ । ଆମେ ଧୀରେ ଧୀରେ ଏହି ଖରାପ ବ୍ୟବସ୍ଥାକୁ ସମାପ୍ତ କରିବୁ ।
Comments are closed.