ନୂଆଦିଲ୍ଲୀ: ଉଜବେକିସ୍ତାନର ଏସସିଓ ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଏବେର ସମୟ ଯୁଦ୍ଧର ସମୟ ନୁହେଁ ବୋଲି କହିଥିଲେ। ୟୁକ୍ରେନ ସହ ଚାଲିଥିବା ଘଟଣାବଳୀକୁ ଦେଖି ମୋଦୀ ଏହା କହିଥିଲେ। ଯାହା ଶାନ୍ତି ପାଇଁ ଏକ ବଡ଼ ବାର୍ତ୍ତା ଥିଲା। ମୋଦୀଙ୍କୁ ଏହି ବାର୍ତ୍ତାକୁ ସାରା ବିଶ୍ୱରେ ପ୍ରଶଂସା କରାଯାଉଛି।
ମିଳିତ ଜାତିସଂଘର ସାଧାରଣ ସଭାର ୭୭ ତମ ଅଧିବେଶନରେ ଫ୍ରାନ୍ସର ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିଛନ୍ତି। ମାକ୍ରୋନ୍ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଠିକ୍ କହିଛନ୍ତି ଯେ ଏବେର ସମୟ ଯୁଦ୍ଧ କରିବାର ସମୟ ନୁହେଁ। ତେବେ ଏହା ପୂର୍ବରୁ ଆମେରିକା ମଧ୍ୟ ପ୍ରଧାନମନ୍ତ୍ରୀ ମୋଦୀଙ୍କ ବିବୃତ୍ତିକୁ ସମର୍ଥନ କରିଥିଲା । ଆଉ ଆମେରିକା ଗଣମାଧ୍ୟମ ମଧ୍ୟ ମୋଦୀଙ୍କ ଏହି ବାର୍ତ୍ତାକୁ ପ୍ରଶଂସା କରିଥିଲା।
ସେହିପରି ଆମେରିକାର ଜାତୀୟ ସୁରକ୍ଷା ପରାମର୍ଶଦାତା (ଏନଏସଏ) ଜେକେ ସଲିଭାନ ମଙ୍ଗଳବାର କହିଛନ୍ତି ଯେ ୟୁକ୍ରେନ ଯୁଦ୍ଧ ପ୍ରସଙ୍ଗରେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାର୍ତ୍ତାକୁ ଆମେରିକା ସ୍ୱାଗତ କରିଛି।
ମାକ୍ରୋନ୍ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯାହା କହିଛନ୍ତି ଠିକ୍ କହିଛନ୍ତି। ଏବେର ସମୟ ଯୁଦ୍ଧର ସମୟ ନୁହେଁ। ପାଶ୍ଚାତ୍ୟ ଦେଶର ପ୍ରତିଶୋଧ ନେବା କିମ୍ବା ପାଶ୍ଚାତ୍ୟକୁ ପୂର୍ବ ବିରୁଦ୍ଧରେ ବିରୋଧ କରିବାର ଏହା ସମୟ ନୁହେଁ। ଏହା ଆମର ସମୟ। ସାକ୍ଷାତ କରିବା ଆଗାମୀ ଆହ୍ୱାନକୁ ସାମ୍ନା କରିବାର ସମୟ।
ଋଷ ରାଷ୍ଟ୍ରପତିଙ୍କୁ ମୋଦୀ ଯୁଦ୍ଧ ନକରିବାକୁ ଆହ୍ୱାନ କରିବା ପରେ ଜବାବ ରଖିଥିଲେ ଭ୍ଲାଦିମିର ପୁଟିନ। ସେ କହିଛନ୍ତି, ୟୁକ୍ରେନ ବିବାଦ ଉପରେ ଭାରତର ସ୍ଥିତି ବିଷୟରେ ଅବଗତ ରହିଛି। ଦୁଇ ଦେଶ ମଧ୍ୟରେ ଚାଲିଥିବା ବିବାଦ ଶୀଘ୍ର ଶେଷ ହେଉ ବୋଲି ଋଷ ଚାହେଁ। ୟୁକ୍ରେନର ନେତୃତ୍ୱ ବୁଝାମଣା ପ୍ରକ୍ରିୟାରେ ଭାଗ ନେବାକୁ ମନା କରି ଦେଇଛନ୍ତି। ତେଣୁ ଯୁଦ୍ଧ କ୍ଷେତ୍ରରେ ସେମାନେ ସେମାନଙ୍କର ଲକ୍ଷ୍ୟ ହାସଲ କରିବାକୁ ଚାହୁଁଛନ୍ତି।