ନୂଆଦିଲ୍ଲୀ: ରାଜଧାନୀ ଦିଲ୍ଲୀ ବାୟୁର ଗୁଣବତ୍ତାରେ ସାମାନ୍ୟ ଉନ୍ନତି ହୋଇଛି। ପୂର୍ବରୁ ଯେଉଁଭଳି ଋତୁକାଳୀନ ପ୍ରଦୂଷଣରେ ଦିଲ୍ଲା ଘାଣ୍ଟି ହେଉଥିଲା ସେଥିରୁ ଟିକିଏ ଉନ୍ନତି ହୋଇଛି। କିନ୍ତୁ ଅନ୍ୟ ଅଧିକାଂଶ ମେଟ୍ରୋ ସହରରେ ପ୍ରଦୂଷଣ ବୃଦ୍ଧି ପାଉଛି। ଯାହାକି ଚିନ୍ତାଜନକ। କାରଣ ଏହି ମେଟ୍ରୋ ସହରକୁ ଦେଶର ଅନେକ ରାଜ୍ୟର ଯୁବପିଢୀ ବିଭିନ୍ନ ସୁବିଧା ସୁଯୋଗ ସାଙ୍ଗକୁ ଚାକିରି ପାଇଁ ଦୌଡା ଆସନ୍ତି। ତେଣୁ ଅଧିକାଂଶ ଲୋକ ପ୍ରଦୂଷଣର ଶିକାର ହୋଇ ବିଭିନ୍ନ ରୋଗରେ ପଡ଼ନ୍ତି।
ଚଳିତଥର ଶୀତ ସମୟରେ ରାଜଧାନୀ ଦିଲ୍ଲୀ ପରେ କୋଲକାତା ଓ ମୁମ୍ବାଇ ସର୍ବାଧିକ ପ୍ରଦୂଷିତ ହୋଇଥିବା ବେଳେ ବେଙ୍ଗାଲୁରୁ ଓ ଚେନ୍ନାଇରେ ପ୍ରଦୂଷଣର ମାତ୍ରା ଦ୍ରୁତ ଗତିରେ ବଢ଼ିବାରେ ଲାଗିଛି। ସେଣ୍ଟର ଫର ସାଇନ୍ସ ଆଣ୍ଡ ଏନଭାୟରନମେଣ୍ଟ ଅକ୍ଟୋବର-ଫେବୃଆରୀ ଅବଧି ପାଇଁ ୬ଟି ସହରର ରିୟଲ ଟାଇମ ପାର୍ଟିକୁଲେଟ ମ୍ୟାଟର (ପିଏମ୨.୫) ତଥ୍ୟର ବିଶ୍ଳେଷଣ କରି ଏହା କହିଛି।
ମଙ୍ଗଳବାର ପ୍ରକାଶ ପାଇଥିବା ସିଏସ୍ଇ ରିପୋର୍ଟରେ କୁହାଯାଇଛି ଯେ, ବିଭିନ୍ନ ଜିଓ-କ୍ଲାଇମେଟିକ୍ ଜୋନର ସ୍ଥାନ ନିର୍ବିଶେଷରେ ସମସ୍ତ ମେଟ୍ରୋ ସହର ଶୀତ ଋତୁରେ ପିଏମ୨.୫ ସ୍ତର ଖରାପ ହେବାର ଆହ୍ୱାନର ସମ୍ମୁଖୀନ ହୋଇଥିଲେ। ଦିଲ୍ଲୀରେ ପ୍ରଦୂଷଣର ମାତ୍ରା ସବୁଠାରୁ ଅଧିକ ରହିଥିବା ବେଳେ ବାକି ସହରଗୁଡ଼ିକରେ ସ୍ଥିତି ଅତ୍ୟନ୍ତ ଖରାପ ରହିଛି।
ଯଦି ଦିଲ୍ଲୀକୁ ବାଦ ଦିଆଯାଏ, ତେବେ କୋଲକାତାରେ ସବୁଠାରୁ ଅଧିକ ‘ବହୁତ ଖରାପ’ ଥିଲା ଏବଂ ମୁମ୍ବାଇରେ ଶୀତରେ ସବୁଠାରୁ କମ୍ ‘ଭଲ’ ଥିଲା। ବେଙ୍ଗାଲୁରୁ ଓ ହାଇଦ୍ରାବାଦରେ ଗତ ୪ ବର୍ଷ ମଧ୍ୟରେ ସବୁଠାରୁ ଅଧିକ ବାୟୁ ପ୍ରଦୂଷଣ ହୋଇଛି।
ଦିଲ୍ଲୀରେ ପିଏମ୨.୫ ତଥ୍ୟର ବିଶ୍ଳେଷଣ, କୋଲକାତା-ହାଓ୍ୱଡା, ମୁମ୍ବାଇ, ହାଇଦ୍ରାବାଦ, ବେଙ୍ଗାଲୁର ଏବଂ ଚେନ୍ନାଇ ଶୀତକାଳୀନ ସମୟ ପାଇଁ (ଅକ୍ଟୋବର ୧-ଫେବୃଆରୀ ୨୮) ପାଞ୍ଚଟି ମେଟ୍ରୋ ସିଟିରେ ପୂର୍ବ ତୁଳନାରେ ଚଳିତ ବର୍ଷ ଅଧିକ ପିଏମ୨.୫ ହାରାହାରି ଋତୁ ପଞ୍ଜିକୃତ ହୋଇଛି। ଏହା ପୂର୍ବ ୪ଟି ଶୀତ ତୁଳନାରେ ଦିଲ୍ଲୀ ତୁଳନାରେ କମ୍ ପ୍ରଦୂଷିତ ଶୀତ ରେକର୍ଡ କରିଛି।
ମେଟ୍ରୋ ସହରରେ ବୃଦ୍ଧି ପାଉଥିବା ଶୀତକାଳୀନ ବାୟୁ ପ୍ରଦୂଷଣ ପ୍ରତି ପର୍ଯ୍ୟାପ୍ତ ଧ୍ୟାନ ଦିଆଯାଉନାହିଁ। ଉତ୍ତର ସମତଳ ଅଞ୍ଚଳ ବାହାରେ ଅବସ୍ଥିତ ଏହି ସହରଗୁଡିକରେ ଅଧିକ ଅନୁକୂଳ ପାଣିପାଗ ପରିସ୍ଥିତି ଥାଇପାରେ ଯାହା ଶୀତଦିନେ ପ୍ରଦୂଷଣର ଶିଖରକୁ ନିୟନ୍ତ୍ରଣ କରିପାରିବ ବୋଲି ସିଏସଇର କାର୍ଯ୍ୟନିର୍ବାହୀ ନିର୍ଦ୍ଦେଶକ ଅନୁମିତା ରାୟଚୌଧୁରୀ କହିଛନ୍ତି।