ନୂଆଦିଲ୍ଲୀ: ଭାରତୀୟ କ୍ରିକେଟ ଦଳରେ ସ୍ଥାନ ପାଇଥିବା ୧୫ ବର୍ଷୀୟ ବ୍ୟାଟସମ୍ୟାନ୍ ବୈଭବ ସୂର୍ଯ୍ୟବଂଶୀଙ୍କ ପିତାମାତାଙ୍କୁ ବିସିସିଆଇ ଏକ ଖାସ୍ ନିବେଦନ କରିଛି। ବୈଭବଙ୍କୁ ଆୟର୍ଲାଣ୍ଡ-ଇଂଲଣ୍ଡ ଗସ୍ତ ଏବଂ ଏସୀୟ କ୍ରୀଡା ପାଇଁ ଭାରତର ଟି-୨୦ ଦଳରେ ମନୋନୀତ କରାଯାଇଛି। ସେ ଶ୍ରୀଲଙ୍କା ଗସ୍ତ କରିବାକୁ ଥିବା ଭାରତ ଏ ଦଳର ମଧ୍ୟ ଅଂଶ ହୋଇଛନ୍ତି।
ଚୟନକର୍ତ୍ତାମାନେ ଗତ ଦୁଇ ବର୍ଷ ମଧ୍ୟରେ ବୈଭବଙ୍କ ବ୍ୟାଟିଂ ପ୍ରଦର୍ଶନକୁ ଆଧାର କରି ତାଙ୍କୁ ଏହି ସୁଯୋଗ ଦେଇଛନ୍ତି। ନିକଟରେ ଶେଷ ହୋଇଥିବା ଆଇପିଏଲ୍ ୨୦୨୬ରେ ବୈଭବ ୧୬ ମ୍ୟାଚ୍ ରେ ୭୭୬ ରନ୍ କରିଥିଲେ ଏବଂ ସିଜିନର ସର୍ବାଧିକ ରନ୍ ସ୍କୋରର୍ ବନିଥିଲେ।
ବୈଭବ ବର୍ତ୍ତମାନ ନାବାଳକ ହୋଇଥିବାରୁ ଶ୍ରୀଲଙ୍କା ଗସ୍ତ ବ୍ୟତୀତ ଇଂଲଣ୍ଡ ଏବଂ ଆୟର୍ଲାଣ୍ଡରେ ତାଙ୍କ ସହିତ ଯିବାକୁ ବିସିସିଆଇ ବୈଭବଙ୍କ ପିତାମାତାଙ୍କୁ ନିବେଦନ କରିଛି।
ବିସିସିଆଇ ସଚିବ ଦେବଜିତ ସାକେୟା କହିଛନ୍ତି, “ବୈଭବଙ୍କୁ ଶ୍ରୀଲଙ୍କା ଯାଉଥିବା ଭାରତ ଏ ଦଳ ପାଇଁ ମଧ୍ୟ ମନୋନୀତ କରାଯାଇଛି। ବର୍ତ୍ତମାନ ସେ ଜଣେ ନାବାଳକ। ସେ ପୁରୁଷ ଦଳ ସହିତ ଯାତ୍ରା କରିବେ, ଯେଉଁମାନେ ସମସ୍ତେ ବୟସ୍କ। ତେଣୁ ଆମେ ତାଙ୍କ ପିତାମାତା କିମ୍ବା ପରିବାର ସଦସ୍ୟଙ୍କୁ ତାଙ୍କ ସହିତ ଶ୍ରୀଲଙ୍କା ଯିବାକୁ ଅନୁରୋଧ କରିଛୁ।”
“ଆମେ ସାଧାରଣତଃ ପିତାମାତାଙ୍କୁ ପଠାଉନାହୁଁ, କିନ୍ତୁ ତାଙ୍କ ବୟସ ମାତ୍ର ୧୫ ବର୍ଷ, ତେଣୁ ଆମେ ଚାହୁଁଛୁ ଯେ ସେ ସହଜ ଅନୁଭବ କରନ୍ତୁ” ବୋଲି ସଚିବ କହିଛନ୍ତି।
