ବେଙ୍ଗାଲୁରୁ: କର୍ଣ୍ଣାଟକର ରାଜଧାନୀ ବେଙ୍ଗାଲୁରୁ ବୈଷୟିକ ଶିଳ୍ପ ଏବଂ ଭିଡ଼ ପାଇଁ ବେଶ୍ ଜଣାଶୁଣା। ଏଠାରେ ଟ୍ରାଫିକ ସମସ୍ୟା ମଧ୍ୟ ବହୁତ ଅଧିକ। ଏହି ଟ୍ରାଫିକ ସମ୍ପର୍କରେ ଏକ ଆଶ୍ଚର୍ଯ୍ୟଜନକ ରିପୋର୍ଟ ଆସିଛି। ରିପୋର୍ଟରେ କୁହାଯାଇଛି, ଟ୍ରାଫିକ ଜାମ୍ ଯୋଗୁଁ ପ୍ରତିବର୍ଷ ସହରକୁ ପ୍ରାୟ ୨୦ ହଜାର କୋଟି କ୍ଷତି ସହିବାକୁ ପଡୁଛି।
ଲୋକମାନେ ଘଣ୍ଟା ଘଣ୍ଟା ଧରି ଟ୍ରାଫିକ୍ ଜାମରେ ଅଟକି ରହୁଛନ୍ତି। ଏପରି ପରିସ୍ଥିତିରେ ସମୟ କେବଳ ନଷ୍ଟ ହୁଏ ନାହିଁ ବରଂ ଇନ୍ଧନ ମଧ୍ୟ ଖର୍ଚ୍ଚ ହୁଏ। ଟ୍ରାଫିକ ବିଶେଷଜ୍ଞ ଏମ.ଏନ ଶ୍ରୀହରି ଏବଂ ତାଙ୍କ ଟିମ ଦ୍ୱାରା ଏକ ଅଧ୍ୟୟନ କରାଯାଇଛି। ଏହି ଅଧ୍ୟୟନରେ ସଡକ ଯୋଜନା, ଫ୍ଲାଏଓଭର, ଟ୍ରାଫିକ ପରିଚାଳନା ଏବଂ ଭିତ୍ତିଭୂମି ଅଭାବ ସହ ଜଡିତ ସମସ୍ୟାଗୁଡିକ ଉପରେ ଦୃଷ୍ଟି ଦିଆଯାଇଥିଲା। ଅଧ୍ୟୟନରେ କୁହାଯାଇଛି ସହରରେ ୬୦ଟି ଫ୍ଲାଏଓଭର ଥାଇ ମଧ୍ୟ ପଥଚାରୀଙ୍କ ପାଇଁ ରାସ୍ତାରେ ଚାଲିବାକୁ ସ୍ଥାନ ଅଭାବ ରହୁଛି। ସିଗନାଲରେ ଯାନବାହନ ଚଳାଚଳ ବନ୍ଦ ହେବା, ଦ୍ରୁତ ଗତିରେ ଯାନବାହନ ଚଳାଚଳ କରିବା ଦ୍ୱାରା, ୧୯୭୨୫ କୋଟି ଟଙ୍କା କ୍ଷତିଗ୍ରସ୍ତ ହୋଇଛି। ଅଯଥା ଇନ୍ଧନ ଏବଂ ସମୟର ଅପଚୟ ହେଉଛି।
ଆଇଟି କ୍ଷେତ୍ରରେ ନିଯୁକ୍ତି ବୃଦ୍ଧି ଯୋଗୁଁ ଘର ଏବଂ ଶିକ୍ଷା ଭଳି ସମସ୍ତ ଆନୁଷଙ୍ଗିକ ସୁବିଧା ଏଠାରେ ବିକଶିତ ହୋଇଛି। ଏହା ସହିତ ଜନସଂଖ୍ୟାରେ ୧.୪୫ କୋଟି ବୃଦ୍ଧି ଘଟିଛି। କେବଳ ଏତିକି ନୁହେଁ ବେଙ୍ଗାଲୁରୁରେ ପ୍ରାୟ ୧.୫ କୋଟି ଯାନ ବ୍ୟବହାର କରାଯାଉଛି। ଏହା ସହିତ ସହରର ସମ୍ପ୍ରସାରଣ ଚଳିତ ବର୍ଷ ୮୮ ବର୍ଗ କିଲୋମିଟରରୁ ୯୮୬ ବର୍ଗ କିଲୋମିଟରକୁ ବୃଦ୍ଧି ପାଇଛି। ସହରର ସମ୍ପ୍ରସାରଣ ୧୧୦୦ ବର୍ଗ କିଲୋମିଟର ପର୍ଯ୍ୟନ୍ତ ହେବା ଉଚିତ ବୋଲି ଅନୁସନ୍ଧାନକାରୀଙ୍କ ଦ୍ୱାରା ପ୍ରସ୍ତାବ ଦିଆଯାଇଛି।
ଶ୍ରୀହରି ଏବଂ ତାଙ୍କ ଟିମ୍ କହିଛନ୍ତି ଯେ ଜନସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି। ଜନସଂଖ୍ୟା ବୃଦ୍ଧି ସହିତ ଏଠାରେ ରୋଜଗାର ମଧ୍ୟ ବୃଦ୍ଧି ପାଉଛି। ଏଭଳି ପରିସ୍ଥିତିରେ ଜନସଂଖ୍ୟା ଏବଂ ରୋଜଗାରର ଆଶା କରାଯାଉଥିବା ଗତି ବିଦ୍ୟମାନ ଭିତ୍ତିଭୂମି ବିକାଶ ସହିତ ମେଳ ଖାଉ ନାହିଁ। ଏହି କାରଣରୁ ସହର ପ୍ରତିବର୍ଷ କୋଟି କୋଟି କ୍ଷତି ସହିବାକୁ ପଡୁଛି। ସହରରେ ରିଙ୍ଗ ରୋଡର ଆବଶ୍ୟକତା ରହିଛି। ଏଥିସହ, ପ୍ରତି ପାଞ୍ଚ କିଲୋମିଟର ପାଇଁ ଏକ ବୃତ୍ତାକାର ମାର୍ଗ ମଧ୍ୟ ରହିବା ଉଚିତ ଯାହା ପରବର୍ତ୍ତୀ ସମୟରେ ରେଡିଆଲ୍ ସଡ଼କ ସହିତ ସଂଯୁକ୍ତ ହେବ।