ଭୁବନେଶ୍ୱର: ରାଜଧାନୀ ଉପକଣ୍ଠ ଚିନ୍ତାମଣେଶ୍ୱରୀ ଅଞ୍ଚଳର ପ୍ରମୋଦ ସାହୁ ନାମକ ଜଣେ ବ୍ୟକ୍ତି ସାଇବର ଠକେଇର ଶିକାର ହୋଇ ୧୪ ଲକ୍ଷ ୫୩ ହଜାର ଟଙ୍କାର କ୍ଷତି ସହିଛନ୍ତି। ପ୍ରମୋଦ ଏନେଇ ଅଭିଯୋଗ କରିବା ପରେ ସାଇବର ଥାନା ପକ୍ଷରୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଏହି ଠକେଇରେ ସମ୍ପୃକ୍ତ ୪ ଜଣଙ୍କୁ ଗିରଫ କରାଯାଇଛି। ପ୍ରଥମ ଅଭିଯୁକ୍ତ ବାଲେଶ୍ୱରର ବିଜନ ପଣ୍ଡା, ତା’ର ସହଯୋଗୀ ଭଦ୍ରକର ବିବେକାନନ୍ଦ ମଲ୍ଲିକ, ବାଲେଶ୍ୱରର ସାହାନା ଦଳେଇ ଓ ସୁନୀଲ ଦାସଙ୍କୁ ପୁଲିସ ଗିରଫ କରିଛି।
ମିଳିଥିବା ସୂଚନା ଅନୁସାରେ, ପ୍ରମୋଦଙ୍କୁ ଲୋଭନୀୟ ଅଫର ଦେଖାଇଥିଲେ ଯେଉଁଥିରେ କୁହାଯାଇଥିଲା ଘରେ ବସି ନିବେଶ କଲେ ଲାଭଜନକ ରିଟର୍ନର ପ୍ରତିଶ୍ରୁତି ଥିଲା। ଏହି ପ୍ରସ୍ତାବ ପ୍ରତି ଆକୃଷ୍ଟ ହୋଇ ସେ ପ୍ରଥମେ ୧୦୦୦ ଟଙ୍କା ବିନିଯୋଗ କରି ପ୍ରତିଶ୍ରୁତି ମୁତାବକ ରିଟର୍ଣ୍ଣ ପାଇଥିଲେ। ଏହି ସଫଳତାରେ ଉତ୍ସାହିତ ହୋଇ ସେ ୫୦ ହଜାର ଟଙ୍କା ବିନିଯୋଗ କରିବାକୁ ଅଗ୍ରସର ହେଲେ ଏବଂ ତାଙ୍କ ଆକାଉଣ୍ଟରେ ୬୦ ହଜାର ଟଙ୍କା ଆସିଲା।
ପ୍ରମୋଦଙ୍କ ଦୁର୍ବଳତାକୁ ଦୂର କରି ଠକେଇକାରୀମାନେ ତାଙ୍କୁ ଯଥେଷ୍ଟ ଲାଭର ପ୍ରତିଶ୍ରୁତି ଦେଇ ବିଟକଏନରେ ବିନିଯୋଗ କରିବାକୁ ରାଜି କରାଇଥିଲେ। ସମ୍ଭାବନାକୁ ବିଶ୍ୱାସ କରି ପ୍ରମୋଦ ଠକେଇକାରୀଙ୍କୁ ନିଜର ଆଧାର ଓ ପାନ୍ ତଥ୍ୟ ସମେତ ବ୍ୟକ୍ତିଗତ ତଥ୍ୟ ପ୍ରଦାନ କରିଥିଲା। ଏହାପରେ ଏହି ତଥ୍ୟକୁ ବ୍ୟବହାର କରି ପ୍ରମୋଦଙ୍କ ନାମରେ ବିଟକଏନରେ ଆକାଉଣ୍ଟ ଖୋଲି ୫ ଲକ୍ଷ ଟଙ୍କା ନିବେଶ କରିବାକୁ ପ୍ରବର୍ତ୍ତାଇ ଥିଲେ ଠକମାନେ।
ପ୍ରମୋଦଙ୍କ ବିଶ୍ୱାସଭାଜନ ହେବା ପାଇଁ ଠକେଇକାରୀମାନେ ତାଙ୍କୁ ଏକ ସ୍କ୍ରିନ୍ ସଟ୍ ଦେଖାଇଥିଲେ। ଯେଉଁଥିରେ ଦେଖାଯାଉଛି ଯେ ପ୍ରମୋଦଙ୍କ ନିବେଶ ପ୍ରତିବଦଳରେ ତାଙ୍କୁ ୨ ଲକ୍ଷ ଟଙ୍କା ଫେରସ୍ତ ମିଳିଛି। ଟଙ୍କା ଉଠାଇବା ପାଇଁ ଉତ୍କଣ୍ଠା ପ୍ରକାଶ କରିବାରୁ ପ୍ରମୋଦଙ୍କ ଉଦ୍ୟମ ବିଫଳ ହୋଇଥିଲା। ସେ ଠକେଇକାରୀଙ୍କ ନିକଟରେ ପହଞ୍ଚିବା ପରେ ଜିଏସଟି ଆବଶ୍ୟକତା ଦର୍ଶାଇ ଅଧିକ ଟଙ୍କା ମାଗିଥିଲେ। ପରେ ଠକଙ୍କ ଜାଲରେ ଫସିଯିବାରୁ ପ୍ରମୋଦ ଟଙ୍କା ହରାଇ ବସିଥିଲେ। ଶେଷରେ ଜାଲିଆତିକାରୀମାନେ ତାଙ୍କ ନମ୍ବରକୁ ବ୍ଲକ୍ କରିଦେଇଥିଲେ, ଯାହାଫଳରେ କୌଣସି ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ପରେ ମୁଣ୍ଡ ଆଉଁସି ସାଇବର ଥାନାରେ ନିଜେ ପଇସା ଲୋଭର ବଶବର୍ତ୍ତୀ ହୋଇ ଯେଉଁସବୁ କାମ କରିଥିଲେ ତାହା କହିଥିଲେ। ପରେ ପୋଲିସ ଅଭିଯୋଗ ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି।