ନୂଆଦିଲ୍ଲୀ: ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ସଂସଦରେ ମୋଦି ସରକାରଙ୍କ ୨ୟ ପାଳିର ବଜେଟ ଉପସ୍ଥାପନ କରିଛନ୍ତି । ବଜେଟରେ ଅର୍ଥମନ୍ତ୍ରୀ ଆୟକରକୁ ନେଇ ବଡ ଘୋଷଣା କରିଛନ୍ତି । ଅର୍ଥମନ୍ତ୍ରୀଙ୍କ ଘୋଷଣା ଅନୁଯାୟୀ, ବାର୍ଷିକ ଆୟକର ସୀମା ସ୍ଲାବ ୫ ଲକ୍ଷରୁ ୭ ଲକ୍ଷକୁ ବୃଦ୍ଧି କରାଯାଇଛି । ଅର୍ଥାତ ୭ ଲକ୍ଷ ଯାଏ ଛାଡ ହେଲା ଆୟକର ।
ଅନ୍ୟପକ୍ଷେ ନିଜସ୍ୱ କର ବ୍ୟବସ୍ଥା ଘୋଷଣା କରିଛନ୍ତି । ଏହି କର ବ୍ୟବସ୍ଥା ଅନୁଯାୟୀ ୩ ଲକ୍ଷ ପର୍ଯ୍ୟନ୍ତ ବାର୍ଷିକ ଆୟକର ଶୂନ୍ୟ ରହିଛି ।
-୬ରୁ ୯ ଲକ୍ଷ ଆୟ ପାଇଁ କର ୧୦% ରହିଛି ।
– ୯ରୁ ୧୨ ଲକ୍ଷ ପାଇଁ ଆୟକର ୧୫% ରହିଛି ।
-୧୨ରୁ ୧୫ ଲକ୍ଷ ପାଇଁ ଆୟକର ୨୦%
– ୧୫ ଲକ୍ଷରୁ ଅଧିକ ଆୟ ପାଇଁ ୩୦% ଆୟକର ରହିଛି ।
ତେବେ ଯେଉଁମାନେ ନୂଆ କର ବ୍ୟବସ୍ଥାକୁ ବାଛିବେ ସେମାନଙ୍କୁ ହିଁ ଏହି ସୁବିଧା ମିଳି ପାରିବ । ହେଲେ ଯେଉଁମାନେ ପୁରୁଣା ବ୍ୟବସ୍ଥାକୁ ବାଛିବେ ସେମାନଙ୍କୁ ଏହି ସୁବିଧା ମିଳିବ ନାହିଁ ।
ଏହି ବଜେଟ ଅନୁଯାୟୀ, ବାର୍ଷିକ ୯ ଲକ୍ଷ ଆୟ ଉପରେ ରହିବ ୪୫ ହଜାର ଆୟକର । ଏହି ଅଂଶ ରୋଜଗାରର ୫ ପ୍ରତିଶତ ରହିବ । ଏହା ପୂର୍ବରୁ ୯ ଲକ୍ଷ ଆୟ ପାଇଁ ୬୦ ହଜାର ଟାକ୍ସ ଦେବାକୁ ପଡୁଥିଲା ।
ସେହିପରି ୧୫ ଲକ୍ଷ ଆୟ ଉପରେ ବାର୍ଷିକ ଦେଢଲକ୍ଷ ଟାକ୍ସ ରହିବ । ପୂର୍ବରୁ ଏହାର ପରିମାଣ ୧, ୮୭, ୫୦୦ ଥିଲା । ସେହିପରି ଷ୍ଟାଣ୍ଡାର୍ଡ ଡିଡକ୍ସନ ସୀମାକୁ ବଢାଇ ଦିଆଯାଇଛି । ଏବେ ସାଢେ ୧୫ ଲକ୍ଷ ଆୟ ଉପରେ ଷ୍ଟାଣ୍ଡାର୍ଡ ଡିଡକ୍ସନ ୫୨, ୫୦୦ ଟଙ୍କା ରହିବ ।
ସେହିପରି ଅବସର ନେବା ପରେ ବଳିଥିବା ଛୁଟିର ଟଙ୍କା କର୍ମଚାରୀଙ୍କୁ ମିଳିଥାଏ । ଏଥିରେ ୩ ଲକ୍ଷ ପର୍ଯ୍ୟନ୍ତ ଟାକ୍ସ ପଡୁ ନ ଥିଲା । ୩ ଲକ୍ଷରୁ ଅଧିକ ଟଙ୍କା ଉପରେ ଟାକ୍ସ ପଡୁଥିଲା । ଏବେ ଏହି ଲିମିଟେଶନକୁ ୨୫ ଲକ୍ଷ ପର୍ଯ୍ୟନ୍ତ ବଢାଇ ଦିଆଯାଇଛି ।
