ଗ୍ରୀନଜୋନରେ ଗଡିବନି ବସ୍

ଭୁବନେଶ୍ୱର: ଆସନ୍ତାକାଲିଠାରୁ ଗ୍ରୀନ ଜୋନରେ ବସ ଚଳାଚଳ ପାଇଁ କେନ୍ଦ୍ର ଅନୁମତି ଦେଇଛି । ତେବେ ୫୦ ପ୍ରତିଶତ ଯାତ୍ରୀଙ୍କୁ ନେଇ ବସ୍ ଚଲାଇବାକୁ ମନା କରିଦେଇଛି ରାଜ୍ୟ ଘରୋଇ ବସ୍ ମାଲିକ ସଂଘ ।
ରାଜ୍ୟ ଘରୋଇ ବସ ମାଲିକ ସଂଘ ସ୍ପଷ୍ଟ ଭାବେ ଜଣାଇଦେଇଛି ଯେ, ୫୦ ପ୍ରତିଶତ ଯାତ୍ରୀଙ୍କୁ ନେଇ ବସ ଚଳାଇବା ସମ୍ଭବ ନୁହେଁ । ଏହାଦ୍ୱାରା ବସ ମାଲିକଙ୍କୁ ବଡ ଧରଣର କ୍ଷତି ହେବ । ତେଣୁ ବସ୍ ଚଳାଇହେବ ନାହିଁ ।
ଦେଶରେ ସୋମବାରଠାରୁ ତୃତୀୟ ପର୍ଯ୍ୟାୟ ଲକଡାଉନ୍ ଆରମ୍ଭ ହେଉଛି । ଏହି ସମୟରେ ଗ୍ରୀନ ଜୋନରେ ଥିବା ଜିଲ୍ଲା ଗୁଡିକ ଚାହିଁଲେ ବସ୍ ଚଳାଚଳ କରିପାରିବେ ବୋଲି କେନ୍ଦ୍ର ଗାଇଡଲାଇନ ଜାରି କରିଛି ।
ତେବେ ଘରୋଇ ବସ୍ ଗୁଡିକ ୫୦ ପ୍ରତିଶତ ଯାତ୍ରୀ ନେଇପାରିବେ, ସାମାଜିକ ଦୂରତା ବଜାୟ ରଖିବେ ଓ ବସ୍ ସାନିଟାଇଜ୍ କରିବେ ବୋଲି ଗାଇଡଲାଇନରେ ଦର୍ଶାଯାଇଛି । ଏଭଳି ସ୍ଥିତିରେ ବସ ଚଳାଇବା ସମ୍ଭବ ନୁହେଁ ବୋଲି ଆଜି ଘରୋଇ ବସ ମାଲିକ ସଂଘ ନିଷ୍ପତି ନେଇଛି ।