ରାୟପୁର: ବିଧାନସଭା ନିର୍ବାଚନ-୨୦୨୩ ପାଇଁ ଛତିଶଗଡରେ ବିଭିନ୍ନ ଦଳ ପକ୍ଷରୁ ଆରମ୍ଭ ହୋଇଯାଇଛି ଜୋରଦାର ନିର୍ବାଚନୀ ପ୍ରଚାର । ଏଭଳି ପରିସ୍ଥିତିରେ ଛତିଶଗଡରେ ଜିତିବା ପାଇଁ କଂଗ୍ରେସ ନିଜର ସମସ୍ତ ଶକ୍ତି ଲଗାଉଥିବା ଦେଖିବାକୁ ମିଳିଛି । ଦଳ ପକ୍ଷରୁ ପ୍ରଥମ ଦିନରେ ଦୁଇ ଦିନିଆ ଛତିଶଗଡ ଗସ୍ତରେ ରାହୁଲ ଗାନ୍ଧୀ କାଂକେର ଜିଲ୍ଲାର ଭାନୁପ୍ରତାପପୁରରେ ବିଶାଳ ସଭାକୁ ସମ୍ବୋଧିତ କରିଥିବାବେଳେ, ଆଜି ପ୍ରିୟଙ୍କା ଗାନ୍ଧୀ ଖୈରାଗଡରେ ପହଞ୍ଚି ୮ଟି ବଡ ନିର୍ବାଚନ ପ୍ରତିଶୃତି ଦେଇଛନ୍ତି ।
ତେବେ ପ୍ରିୟଙ୍କା ଗାନ୍ଧୀ କହିଛନ୍ତି ଯେ, ଯଦି ଛତିଶଗଡରେ କଂଗ୍ରେସ ସରକାର ଅକ୍ଷୁର୍ଣ୍ଣ ରହେ ତେବେ ସିଲିଣ୍ଡର ଭରିବା ପାଇଁ ପ୍ରତି ସିଲିଣ୍ଡର ପିଛା ୫୦୦ ଟଙ୍କା ସବସିଡି ଦିଆଯିବ ।
ରାଜ୍ୟରେ ୨୦୦ ୟୁନିଟ୍ ପର୍ଯ୍ୟନ୍ତ ବିଦ୍ୟୁତ୍ ମଧ୍ୟ ମାଗଣାରେ ଯୋଗାଇ ଦିଆଯିବ।
ମହିଳା ସ୍ବୟଂ ସହାୟକ ଗୋଷ୍ଠୀ ଏବଂ ସକ୍ଷମ ଯୋଜନା ଅଧୀନରେ ନିଆଯାଇଥିବା ଋଣ ଛାଡ ।
ଆଗାମୀ ବର୍ଷରେ ୭୦୦ ନୂତନ ଗ୍ରାମୀଣ ଶିଳ୍ପ ଉଦ୍ୟାନ ପ୍ରତିଷ୍ଠା ।
ରାଜ୍ୟର ସମସ୍ତ ସରକାରୀ ବିଦ୍ୟାଳୟକୁ ସ୍ବାମୀ ଆତ୍ମାନନ୍ଦ ଇଂରାଜୀ ଏବଂ ହିନ୍ଦୀ ମିଡିୟମରେ ନବୀକରଣ କରାଯିବ ।
ମୁଖ୍ୟମନ୍ତ୍ରୀଙ୍କ ସ୍ବାସ୍ଥ୍ୟ ସହାୟତା ଯୋଜନା ଅଧୀନରେ ସଡକ ଦୁର୍ଘଟଣା ଏବଂ ଅନ୍ୟାନ୍ୟ ଦୁର୍ଘଟଣାରେ ଛତିଶଗଡ ବାସିନ୍ଦାଙ୍କ ପାଇଁ ମାଗଣା ଚିକିତ୍ସା ।
ପରିବହନ ବ୍ୟବସାୟ ସହିତ ଜଡିତ ୬ ହଜାର ୬୦୦ରୁ ଉର୍ଦ୍ଧ୍ବ ଗାଡି ମାଲିକଙ୍କ ୨୦୧୮ ପର୍ଯ୍ୟନ୍ତ ୭୨୬ କୋଟି ଟଙ୍କାର ବକେୟା ମୋଟର ଯାନ ଟିକସ, ପେନାଲ୍ଟି ବା ତଣ୍ଡ ଏବଂ ଋଣର ସୁଧ ଛାଡ ।
ଖାଲି ସେତିକି ନୁହେଁ ରାଜ୍ୟର ଚାଷୀଙ୍କଠାରୁ ‘ତିବରା’କୁ ମଧ୍ୟ ସହାୟତା ମୂଲ୍ୟରେ କିଣାଯିବ ।
ତେବେ କଂଗ୍ରେସ ୨୦୧୮ ନିର୍ବାଚନରେ ୯୦ ସଦସ୍ୟ ବିଶିଷ୍ଟ ବିଧାନସଭାରେ ୬୮ଟି ସିଟ୍ ଜିତି ସରକାର ଗଠନ କରିଥିଲା ।