ଭୁବନେଶ୍ୱର: ୨୦୨୧-୨୨ ଆର୍ଥିକ ବର୍ଷରେ ଆଇସିଆଇସିଆଇ ବ୍ୟାଙ୍କର ଢେଙ୍କାନାଳ ଶାଖାରୁ ୧.୦୪ କୋଟି ଟଙ୍କା ଦୁର୍ନୀତି ହୋଇଥିବା ନେଇ ଓଡ଼ିଶା କ୍ରାଇମବ୍ରାଞ୍ଚର ସାଇବର କ୍ରାଇମ୍ ୟୁନିଟ୍ ପର୍ଦ୍ଦାଫାସ କରିଛି।
ଏହି ଘଟଣାରେ ଜଣେ ଦମ୍ପତିଙ୍କ ସମେତ ୩ ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତମାନେ ହେଲେ ସ୍ୱାଗତିକା ସ୍ୱାଇଁ (୨୮), ତାଙ୍କ ପତି ମନୋଜ କୁମାର ସାହୁ (୨୯) ଓ ସେମାନଙ୍କ ସହଯୋଗୀ ପ୍ରଶାନ୍ତ କୁମାର ସାହୁ।
ସ୍ୱାଗତିକା ଆଇସିଆଇସିଆଇ ବ୍ୟାଙ୍କର ଢେଙ୍କାନାଳ ଶାଖାରେ ରିଲେସନସିପ୍ ମ୍ୟାନେଜର ଭାବେ କାର୍ଯ୍ୟ କରୁଥିବା ବେଳେ ପ୍ରଶାନ୍ତ ଡେପୁଟି ବ୍ୟାଙ୍କ ମ୍ୟାନେଜର ଭାବେ କାର୍ଯ୍ୟ କରୁଥିଲେ।
ଢେଙ୍କାନାଳ ଶାଖାର ଅନେକ ଗ୍ରାହକଙ୍କ ଆଇସିଆଇସିଆଇ ବ୍ୟାଙ୍କ ଆକାଉଣ୍ଟରୁ ସନ୍ଦେହଜନକ ଅନଧିକୃତ କାରବାର ହୋଇଥିବା ଜଣାପଡ଼ିବା ପରେ ଏହି ଠକେଇର ପର୍ଦ୍ଦାଫାସ ହୋଇଛି। ଏହି ଅଭିଯୋଗ ପରେ ଆଇସିଆଇସିଆଇ ବ୍ୟାଙ୍କର ଫାଇନାନ୍ସିଆଲ କ୍ରାଇମ ପ୍ରିଭେନସନ୍ ଗ୍ରୁପର ଆଞ୍ଚଳିକ ମୁଖ୍ୟ କ୍ରାଇମବ୍ରାଞ୍ଚରେ ଅଭିଯୋଗ କରିଥିଲେ।
ବ୍ୟାଙ୍କର ଆଭ୍ୟନ୍ତରୀଣ ଅନୁସନ୍ଧାନରୁ ଜଣାପଡିଛି ଯେ ଏହି ଠକେଇ କାରବାର ଫିକ୍ସଡ ଡିପୋଜିଟ୍ ବିରୋଧରେ ଅନଧିକୃତ ଓଭରଡ୍ରାଫ୍ଟ ଭାବରେ କରାଯାଇଥିଲା ।
ଢେଙ୍କାନାଳ ଟାଉନ ଥାନାରେ ସ୍ୱାଗତିକା ସ୍ୱାଇଁ ଓ ତାଙ୍କ ସହଯୋଗୀଙ୍କ ବିରୋଧରେ ୩ଟି ସମାନ ମାମଲା ରୁଜୁ ହୋଇଛି। ଅନ୍ୟାନ୍ୟ ଅପରାଧରେ ସମ୍ଭାବ୍ୟ ସମ୍ପୃକ୍ତି ନେଇ ଅଧିକ ଅନୁସନ୍ଧାନ ଜାରି ରହିଛି।