ମଧ୍ୟପ୍ରଦେଶ: ଲୋକଙ୍କୁ ଖାଦ୍ୟ ଯୋଗାଇବା ପାଇଁ ମୁମ୍ବାଇରେ ଅନେକ ଡବାବାଲା ଅଛନ୍ତି । କିନ୍ତୁ ମଧ୍ୟପ୍ରଦେଶର ବୁରହାନପୁରରେ ଜଣେ ବ୍ୟକ୍ତି ଅଛନ୍ତି ଯିଏ ପ୍ରତ୍ୟେକ ଦିନ ଠିକ୍ ସମୟରେ ୧୫୦ ରୁ ଅଧିକ ଟିଫିନ୍ ଯୋଗାଇଥାନ୍ତି । ସବୁଠୁ ଆଶ୍ଚର୍ଯ୍ୟର କଥା, ଏହି ବ୍ୟକ୍ତି ଜଣକ ଆଜି ପର୍ଯ୍ୟନ୍ତ ଟିଫିନ୍ ବିତରଣରେ କୌଣସି ଭୁଲ କରିନାହାଁନ୍ତି । ଏହି କାରଣରୁ ସେ ଚର୍ଚ୍ଚାରେ ରହିବା ସହ ସହରର ଲୋକମାନେ ତାଙ୍କୁ ବୁରହାନପୁରର ଡବାବାଲା ବୋଲି ଡାକନ୍ତି ।
ସିନ୍ଧି ବସ୍ତି ଅଞ୍ଚଳରେ ରୁହନ୍ତି ରାମ କୁମାର । ସେ ଏକ ଦଶନ୍ଧି ଧରି ସାଇକେଲ ଯୋଗେ ଲୋକଙ୍କୁ ଟିଫିନ୍ ଯୋଗାଇ ଆସୁଛନ୍ତି । ଏହି କାମ ପାଇଁ ସେ ତାଙ୍କ ମାମୁଁଙ୍କଠାରୁ ପ୍ରେରଣା ପାଇଥିଲେ । ସକାଳରୁୁ ଅପରାହ୍ନ ଯାଏଁ ରାମକୁମାର ଲୋକଙ୍କ ଘରେ, ଦୋକାନ, ଅଫିସ୍ କିମ୍ବା କାରଖାନାକୁ ୧୫୦ ରୁ ଅଧିକ ଟିଫିନ୍ ବିତରଣ କରିଥାନ୍ତି । ଆଜି ପର୍ଯ୍ୟନ୍ତ ଏକ ଦଶନ୍ଧି ମଧ୍ୟରେ ସେ ଠିକଣା ଗ୍ରାହକଙ୍କ ପାଖରେ ଟିଫିନ୍୍ ପହଞ୍ଚାଇବା ଭୁଲ୍ କରିନାହାଁନ୍ତି । ପ୍ରାୟତଃ ଘରର ମହିଳାମାନେ ଟିଫିନ୍ କିମ୍ବା ବ୍ୟାଗ୍ ବିନିମୟ କରନ୍ତି ।
ଯେତେବେଳେ ରାମକୁମାର ଟିଫିନ୍ ସଂଗ୍ରହ କରିବା ପାଇଁ ଲୋକଙ୍କ ଘରେ ପହଞ୍ଚନ୍ତି, ସେତେବେଳେ ସେ ପାଇଥିବା ବ୍ୟାଗ୍ କିମ୍ବା ଟିଫିନ୍ ମନେ ରଖନ୍ତି । ଏହା କରି ସେମାନେ ଦୈନିକ ୧୫୦ ରୁ ଅଧିକ ଘରୁ ଟିଫିନ୍ ସଂଗ୍ରହ କରନ୍ତି । ପରେ ସମୟ ଅନୁଯାୟୀ ନିଜ ସାଇକେଲରେ ଏତେଗୁଡ଼ିଏ ଟିଫିନ୍ ଲଦି ବିତରଣ କରିବାକୁ ବାହାରି ଯାଆନ୍ତି ।
ରାମକୁମାର କହିଛନ୍ତି ଯେ, ମୁଁ ଅଶିକ୍ଷିତ । ମୋର ମାମୁଁଙ୍କଠାରୁ ପ୍ରେରଣା ପାଇ ମୁଁ ଏହି କାମ ଆରମ୍ଭ କଲି । ମୁଁ ମଧ୍ୟ ଏଥିରେ ସଫଳ ହୋଇଛି । ମୁଁ ଲୋକଙ୍କ ଘରୁ ସେମାନଙ୍କ ଦୋକାନ, ପ୍ରତିଷ୍ଠାନ ଏବଂ କାରଖାନାକୁ ଟିଫିନ୍ ବିତରଣ କରେ । ସେମାନେ ମୋତେ ଯାହା ଦିଅନ୍ତି ସେଥିରେ ମୁଁ ସନ୍ତୁଷ୍ଟ । ମୋର ଲକ୍ଷ୍ୟ ହେଉଛି ଯେ ଲୋକମାନେ ଠିକ୍ ସମୟରେ ତାଜା ଖାଦ୍ୟ ଖାଇବା ଉଚିତ୍ । ସାଇକେଲରେ ୧୫୦ ରୁ ଅଧିକ ଟିଫିନ୍ ଲଦି ନେଇଥାଏ । ଆଜି ପର୍ଯ୍ୟନ୍ତ ଟିଫିନ୍ ଦେବାରେ ମୁଁ ଭୁଲ କରି ନାହିଁ । ସେଥିଲାଗି ଲୋକେ ମୋ ଉପରେ ଭରସା କରନ୍ତି ଓ ଭଲପାଇବା ଦିଅନ୍ତି ।
