ନୂଆଦିଲ୍ଲୀ: ନିର୍ଭୟାକୁ ନ୍ୟାୟ ମିଳିବାରେ ଗଡୁଛି ତାରିଖ ପରେ ତାରିଖ । ଦୋଷୀଙ୍କ ଘୁଂଚି ଘୁଂଚି ଯାଉଛି ଫାଶୀ । ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲାରେ ୪ ଦୋଷୀଙ୍କ ଫାଶୀ ଦଣ୍ଡାଦେଶ ଉପରେ ସ୍ଥଗିତାଦେଶକୁ ଚ୍ୟାଲେଂଜ କରି କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ଦିଲ୍ଲୀ ହାଇକୋର୍ଟରେ ରୁଜୁ ହୋଇଥିବା ମାମଲାର ରାୟକୁ ସଂରକ୍ଷିତ ରଖିଛନ୍ତି କୋର୍ଟ । 
ଆଜି ଏହି ମାମଲାରେ ଦିଲ୍ଲୀ ହାଇକୋର୍ଟରେ ଶୁଣାଣି ହୋଇଥିଲା । ଏହି ଆବେଦନରେ କେନ୍ଦ୍ର ସରକାର ଦର୍ଶାଇଥିଲେ ଯେ, ଦୋଷୀମାନେ ଫାଶୀ ସମୟକୁ ଗଡାଇବା ପାଇଁ ଆଇନର ଗଳା ବାଟ ଦେଇ ପ୍ରାୟସ ଚଳାଇଛନ୍ତି । ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେତା କହିଛନ୍ତି, ଦୋଷୀମାନେ ଆଇନ୍ ଅନୁସାରେ ମିଳିଥିବା ସଜାର କାର୍ଯ୍ୟକାରିତାକୁ ବିଳମ୍ବିତ କରିବା ପାଇଁ ଷଡଯନ୍ତ୍ର କରିଥିବା ସେ ଅଭିଯୋଗ କରିଛନ୍ତି ।
ସେପଟେ ଆଡଭୋକେଟ ଏପି ସିଂ ଦୋଷୀ ଅକ୍ଷୟ ସିଂହ, ବିନୟ ଶର୍ମା ଓ ପବନ ପକ୍ଷରୁ ଦଲିଲ ରଖିଥିଲେ । ଅନ୍ୟପଟେ ମୁକେଶ ପକ୍ଷରୁ ଓକିଲ ରେବେକା ଜନ୍ କହିଛନ୍ତି, ସମ୍ପ୍ରତି ମାମଲାରେ ନିମ୍ନ ଅଦାଲତରୁ ଜାରି ନିର୍ଦ୍ଦେଶକୁ ହାଇକୋର୍ଟରେ ଚ୍ୟାଲେଂଚ କରାଯାଇପାରିବ ନାହିଁ । ଏଥିପାଇଁ ଦୋଷୀଙ୍କୁ ସୁପ୍ରିମକୋର୍ଟ ଯିବାକୁ ପଡିବ, ଏହି ନିୟମ କେନ୍ଦ୍ର ଉପରେ ମଧ୍ୟ ଲାଗୁ ହେବା ଉଚିତ । ତେବେ ଉଭୟ ପକ୍ଷରୁ ଦଲିଲକୁ ଶୁଣିବା ପରେ ଦିଲ୍ଲୀ ହାଇକୋର୍ଟ ଏହି ମାମଲାର ରାୟକୁ ଆଜି ସଂରକ୍ଷିତ ରଖିଛନ୍ତି ।
Comments are closed.