ନୂଆଦିଲ୍ଲୀ: ପତ୍ନୀଙ୍କ ସହ କଳି କଲେ, କୁନି ପୁଅ ଉପରେ ରାଗ ସୁଝାଇଲା ରାକ୍ଷସ ବାପ । ୨ ବର୍ଷର ପୁଅକୁ ବାଲକୋନରୁ ତଳକୁ ଫିଙ୍ଗି ଦେଲା । ତା ସହ ନିଜେ ବି ଡେଇ ପଡ଼ିଲା । ଉଭୟଙ୍କୁ ଗୁରୁତର ଅବସ୍ଥାରେ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଛି । ଏମିତି ଏକ ଘଟଣା ଦେଖିବାକୁ ମିଳିଛି ରାଜଧାନୀରେ ନୂଆଦିଲ୍ଲୀରେ ।
ଘଟଣା ଘଟିଛି ଗତକାଲି ରାତିରେ ନୂଆଦିଲ୍ଲୀର କାଲକାଜୀ ସ୍ଥିତ ଏକ ବସ୍ତିରେ । ମନ ସିଂ ଏବଂ ତାଙ୍କ ପତ୍ନୀ ପୂଜାଙ୍କ ମଧ୍ୟରେ ପଡୁ ନ ଥିଲା । ଉଭୟେ ଅଲଗା ରହୁଥିଲେ। ପୂଜା ନିଜର ଦୁଇ ପିଲାଙ୍କ ସହ କଲକାଜୀରେ ଜେଜେମା’ଙ୍କ ଘରେ ରହୁଥିଲେ।
ପୋଲିସର କହିବା ଅନୁଯାୟୀ, ଗତକାଲି ରାତିରେ ମନ ସିଂ ପତ୍ନୀ ପୂଜାଙ୍କୁ ଭେଟିବାକୁ ଆସିଥିଲେ। ସେ ମଦ୍ୟପାନ କରିଥିବା ଅଭିଯୋଗ ହୋଇଛି । କୌଣସି କଥାକୁ ନେଇ ସ୍ୱାମୀ-ସ୍ତ୍ରୀ ମଧ୍ୟରେ ଗଣ୍ଡଗୋଳ ହୋଇଥିଲା। ଗଣ୍ଡଗୋଳ ଉଗ୍ର ରୂପ ନେବା ପରେ ଉତ୍ତ୍ୟକ୍ତ ହୋଇ ମନ ସିଂହ ୨ ବର୍ଷର ପୁଅକୁ ୩ ମହଲା ବାଲକୋନୀରୁ ୨୧ ଫୁଟ ତଳକୁ ଫିଙ୍ଗି ଦେଇଥିଲଲେ । ଏହା ପରେ ସେ ନିଜେ ମଧ୍ୟ ଛାତ ତଳକୁ ଡେଇଁପଡିଥିଲେ। ମନ ସିଂଙ୍କ ବିରୋଧରେ ହତ୍ୟା ଉଦ୍ୟମ ମାମଲା ରୁଜୁ କରିଛି ପୁଲିସ ।
