ନିର୍ଭୟା ମାମଲା: ଆସନ୍ତାକାଲି ଫାଶୀ ଖୁଂଟରେ ଝୁଲିବେ ୪ ଦୋଷୀ

ନୂଆଦିଲ୍ଲୀ: ଫେଲ୍ ମାରିଲା ଶେଷ ଚାଲ । ଅଟକିବନି ‘ଡେଥ ୱାରେଂଟ’ । ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲାର ୪ ଦୋଷୀଙ୍କ ପାଇଁ କାଲି ହେବ ଶେଷ ସୂର୍ଯ୍ୟୋଦୟ । ଆସନ୍ତାକାଲି ଫାଶୀ ଖୁଂଟରେ ଝୁଲିବେ ୪ ସଇତାନ । ଫାଶୀ ଉପରେ ରହିତାଦେଶ ପାଇଁ ହୋଇଥିବା ଆବେଦନକୁ ଗୁରୁବାର ଦିଲ୍ଲୀ ପଟିଆଲା ହାଉସ କୋର୍ଟ ଖାରଜ କରିଦେଇଛନ୍ତି ।
ପୂର୍ବ ନିର୍ଦ୍ଧାରିତ ସମୟ ଅନୁସାରେ ଆସନ୍ତାକାଲି ସକାଳ ୫ଟା ୩୦ରେ ତିହାସ ଜେଲ୍ ପରିସରର ୪ ଅଭିଯୁକ୍ତଙ୍କୁ ଫାଶି ଖୁଂଟରେ ଝୁଲାଯିବ । ଦିଲ୍ଲୀ ପଟିଆଲା ହାଉସ କୋର୍ଟ ଏନେଇ ପୂର୍ବରୁ ଡେଥ ୱାରେଂଟ ଜାରି କରିଥିଲେ । ତେବେ ଡେଥ ୱାରେଂଟ ଉପରେ ରୋକ ଲଗାଇବା ପାଇଁ ଆଜି ଶେଷ ପ୍ରାୟସ କରିଥିଲେ ଅଭିଯୁକ୍ତ । ହେଲେ କୋର୍ଟ ତାଙ୍କ ଆବେଦନ ଖାରଜ କରି ଫାଶୀ ଦଣ୍ଡାଦେଶକୁ କାଏମ ରଖିଛନ୍ତି।
ଏହାପୂର୍ବରୁ ମାମଲାର ଅନ୍ୟତମ ଦୋଷୀ ଅକ୍ଷୟ ସିଂହର ଦ୍ୱିତୀୟ ଥର ରାଜକ୍ଷମା ନିବେଦନକୁ ରାଷ୍ଟ୍ରପତି ଖାରଜ କରିଥିବା ବେଳେ ପବନ ଗୁପ୍ତାର କ୍ୟୁରେଟିଭ ପିଟିନସକୁ ମଧ୍ୟ ସୁପ୍ରିମକୋର୍ଟ ଅଗ୍ରାହ୍ୟ କରିଦେଇଛନ୍ତି।