ଆଜିକାଲି ସ୍ମାର୍ଟଫୋନ୍ ଆମ ଦୈନନ୍ଦିନ ଜୀବନର ସବୁଠୁ ଜରୁରୀ ଜିନିଷ ହୋଇଯାଇଛି। ସକାଳର ଆଲାର୍ମରୁ ଆରମ୍ଭ କରି ରାତିର ଶେଷ ଚାଟ୍ ପର୍ଯ୍ୟନ୍ତ, ପ୍ରାୟ ସବୁ କାମ ଫୋନ୍ରେ ହେଉଛି।
କିନ୍ତୁ ଲଗାତାର ବ୍ୟବହାର ଯୋଗୁଁ ଫୋନ୍ ଧୀରେ ଚାଲିବା, ହ୍ୟାଙ୍ଗ୍ ହେବା, ଆପ୍ ଖୋଲିବାରେ ସମୟ ନେବା ଏବଂ ବ୍ୟାଟେରୀ ଶୀଘ୍ର ଶେଷ ହେବା ଭଳି ସମସ୍ୟା ବଢ଼ିଥାଏ। ଏଭଳି ସ୍ଥିତିରେ ଫୋନ୍କୁ ରିଷ୍ଟାର୍ଟ କରିବା ଏକ ସହଜ ଉପାୟ ହୋଇପାରେ।
ଅନେକ ସମୟରେ ଆମେ ଅନେକ ଆପ୍ ବ୍ୟବହାର କରିଥାଉ। ଆପ୍ ବନ୍ଦ କରିଦେଲେ ମଧ୍ୟ କିଛି ପ୍ରୋସେସ୍ ବ୍ୟାକଗ୍ରାଉଣ୍ଡରେ ଚାଲୁ ରହିଥାଏ। ଏହାର ପ୍ରଭାବ ଫୋନ୍ର ରାମ୍ ଓ ପ୍ରୋସେସର୍ ଉପରେ ପଡ଼େ।
ଫୋନ୍ ରିଷ୍ଟାର୍ଟ କଲେ ଏହି ଅନାବଶ୍ୟକ ବ୍ୟାକଗ୍ରାଉଣ୍ଡ କାମଗୁଡ଼ିକ ବନ୍ଦ ହୋଇଯାଏ। ସିଷ୍ଟମ୍ ନୂଆ ଭାବେ ଆରମ୍ଭ ହୁଏ। ଫଳରେ ଫୋନ୍ ପୁଣି ଅପେକ୍ଷାକୃତ ସ୍ମୁଥ୍ ଭାବେ ଚାଲିପାରେ।
ଯଦି ଆପଣଙ୍କ ଫୋନ୍ ବାରମ୍ବାର ହ୍ୟାଙ୍ଗ୍ ହେଉଛି କିମ୍ବା ଆପ୍ ଖୋଲିବାକୁ ବେଶି ସମୟ ନେଉଛି, ତେବେ ରିଷ୍ଟାର୍ଟ କରିବା ଫାଇଦା ଦେଇପାରେ। ବିଶେଷକରି ଗେମିଂ କରୁଥିବା ୟୁଜର୍ ଏବଂ ହେଭି ଆପ୍ ବ୍ୟବହାର କରୁଥିବା ଲୋକଙ୍କ ପାଇଁ ଏହା ଭଲ ଅଭ୍ୟାସ।
ବ୍ୟାଟେରୀ ଉପରେ ମଧ୍ୟ ଏହାର ପ୍ରଭାବ ପଡ଼ିପାରେ। କିଛି ଆପ୍ ଚୁପଚାପ୍ ବ୍ୟାକଗ୍ରାଉଣ୍ଡରେ ବ୍ୟାଟେରୀ ଖର୍ଚ୍ଚ କରିଥାଏ। ୟୁଜର୍ ତାହା ଜାଣିପାରନ୍ତି ନାହିଁ। ରିଷ୍ଟାର୍ଟ କଲେ ଏଭଳି ଆକ୍ଟିଭିଟି ବନ୍ଦ ହୁଏ ଏବଂ ବ୍ୟାଟେରୀ ବ୍ୟାକଅପ୍ କିଛି ଭଲ ହୋଇପାରେ।
ଗରମ ଦିନରେ ଫୋନ୍ ଅଧିକ ଗରମ ହେବା ମଧ୍ୟ ସାଧାରଣ କଥା। ଲମ୍ବା ସମୟ ଭିଡିଓ ଦେଖିବା କିମ୍ବା ଗେମ୍ ଖେଳିବା ପରେ ହିଟିଂ ବଢ଼ିଯାଏ। କିନ୍ତୁ ଫୋନ୍ ଲଗାତାର ଗରମ ରହିଲେ ହାର୍ଡୱେୟାର୍ ପାଇଁ ଏହା ଭଲ ନୁହେଁ।
ରିଷ୍ଟାର୍ଟ କରିବା ପରେ ପ୍ରୋସେସର୍ କିଛି ରିଲିଫ୍ ପାଏ। ଅନାବଶ୍ୟକ ପ୍ରୋସେସ୍ ବନ୍ଦ ହୋଇଯାଏ। ଏହା ଫୋନ୍ର ହିଟିଂ କମାଇବାରେ ସହାୟକ ହୋଇପାରେ।
ସେଫଟି ଅପଡେଟ୍ ଏବଂ ସିଷ୍ଟମ୍ ପରିବର୍ତ୍ତନ ପାଇଁ ମଧ୍ୟ ରିଷ୍ଟାର୍ଟ ଦରକାର ହୋଇଥାଏ। କିଛି ସଫ୍ଟୱେୟାର୍ ବଗ୍ କିମ୍ବା ଛୋଟ ଗ୍ଲିଚ୍ ରିଷ୍ଟାର୍ଟ ପରେ ଆପେଆପେ ଠିକ୍ ହୋଇଯାଇପାରେ। ଅନେକ ସ୍ମାର୍ଟଫୋନ୍ କମ୍ପାନୀ ମଧ୍ୟ ସମୟ ସମୟରେ ଫୋନ୍ ରିଷ୍ଟାର୍ଟ କରିବାକୁ ପରାମର୍ଶ ଦେଇଥାନ୍ତି।
ତେବେ ଦିନକୁ ବାରମ୍ବାର ଫୋନ୍ ରିଷ୍ଟାର୍ଟ କରିବା ଆବଶ୍ୟକ ନୁହେଁ। ଦିନକୁ ଥରେ କିମ୍ବା କମ୍ ସେ କମ୍ ସପ୍ତାହକୁ ଦୁଇରୁ ତିନି ଥର ଫୋନ୍ ରିଷ୍ଟାର୍ଟ କରିବା ଭଲ ଅଭ୍ୟାସ ବୋଲି ମନାଯାଏ। ରାତିରେ ଶୋଇବା ପୂର୍ବରୁ ଏହା କରିବା ସବୁଠୁ ସହଜ ଉପାୟ ହୋଇପାରେ।
Comments are closed.