ଟ୍ରମ୍ପଙ୍କ ମୁହଁରେ ମୋଦୀ ଓ ଭାରତର ପ୍ରଶଂସା

ଅହମ୍ମଦାବାଦ: ଟ୍ରମ୍ପଙ୍କ ମୁହଁରେ ଭାରତ ଓ ମୋଦୀଙ୍କ ଭୁରି ଭୁରି ପ୍ରଶଂସା । ମୋଦୀ ତାଙ୍କର ଜଣେ ଭଲ ବନ୍ଧୁ । ଭାରତ ଆସିବା ତାଙ୍କ ପାଇଁ ଏକ ଗର୍ବର କଥା । ଅହମ୍ମଦାବାର ମୋଟେରା ଷ୍ଟାଡିୟମରେ ଆୟୋଜିତ ‘ନମସ୍ତେ ଟ୍ରମ୍ପ’ କାର୍ଯ୍ୟକ୍ରମରେ ଯୋଗ ଦେଇ ଏଭଳି କହିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ।
ଖାଲି ଏତିକି ନୁହେଁ ଟ୍ରମ୍ପ ଆହୁରି କହିଛନ୍ତି ଯେ, ନରେନ୍ଦ୍ର ମୋଦୀ ହେଉଛନ୍ତି ଜଣେ ଚାମ୍ପିଅନ । ଯିଏକି ଭାରତକୁ ବିକାଶ ଦିଗରେ ଆଗେଇ ନେଉଛନ୍ତି । ମୋଦୀ ହେଉଛନ୍ତି ମହାନ, ତାଙ୍କର ନୀତି ଓ ଆଦର୍ଶ ବି ମହାନ । ସେଥିପାଇଁ ତାଙ୍କୁ ଲୋକେ ଭଳ ପାଉଛନ୍ତି । ଆଉ ଶାସନ ଗାଦିରେ ବସାଇଛନ୍ତି ।
ଆମେରିକା ହେଉଛି ଭାରତର ବନ୍ଧୁ । ଆମେରିକା ଭାରତର ସମ୍ମାନ କରେ । ଟ୍ରମ୍ପ ନିଜ ଅଭିଭାଷଣରେ କହିଛନ୍ତି ଯେ, ୫ ମାସ ତଳେ ଆମରିକା ପ୍ରଧାନମନ୍ତ୍ରୀ ମୋଦୀଙ୍କର ସ୍ୱାଗତ କରିଥିଲା ଆଉ ଆଜି ଭାରତ ଆମର ସ୍ୱାଗତ କରିଛି । ଏଥିପାଇଁ ଆମେ ବେଶ୍ ଖୁସି । ଆଜି ଆମେ ବିଶ୍ୱର ସବୁଠୁ ବଡ କ୍ରିକେଟ ଷ୍ଟାଡିୟମରେ ଅଛୁ । ପ୍ରଧାନମନ୍ତ୍ରୀ ଆମର ଭବ୍ୟ ସ୍ୱାଗତ କରିଛନ୍ତି । ଆଜିଠୁ ଭାରତ ଆମ ପାଇଁ ସବୁଠାରୁ ଖାସ୍ ବନ୍ଧୁ ବୋଲି କହିଛନ୍ତି ଟ୍ରମ୍ପ ।
ସେ ଆହୁରି କହିଛନ୍ତି ଯେ, ପ୍ରଧନମନ୍ତ୍ରୀ ନିଜ ଜୀବନରେ ବହୁତ ପାରିଶ୍ରମ କରିଛନ୍ତି । ନିଜ ଜୀବନର ଆରମ୍ଭ ଜଣେ ଚା’ ବାଲାରୁ କରିଛନ୍ତି । ସେ ନିଜ ବାପାଙ୍କ ଚା’ ଦୋକନରେ କାମ କରିଥିଲେ । ମୋଦିଙ୍କୁ ଆଜି ପ୍ରତିଟି ବ୍ୟକ୍ତି ଭଲ ପାଉଛନ୍ତି । ସେ ଭାରତର ସବୁଠୁ ପ୍ରମୁଖ ନେତା ବୋଲି ନିଜ ଅଭିଭାଷଣରେ କହିଛନ୍ତି ଟ୍ରମ୍ପ ।
ଦୁଇ ଦିନିଆ ଭାରତ ଗସ୍ତରେ ଆସଥିବା ଆମେରିକା ରାଷ୍ଟ୍ରପତି ଆଜି ସକାଳେ ଗୁଜୁରାଟର ଅହମ୍ମଦାବାଦରେ ପହଂଚିଛନ୍ତି । ଆଉ ବିମାନ ବନ୍ଦରରେ ପହଂଚିବା ପରେ ଖୋଦ୍ ଦେଶର ପ୍ରଧାନମନ୍ତ୍ରୀ ତାଙ୍କୁ ଆଲିଙ୍ଗନ କରି ସ୍ୱାଗତ ଜଣାଇଥିଲେ । ଏହି ଅବସରରେ ଟ୍ରମ୍ପଙ୍କ ସହ ଫାଷ୍ଟ ଲେଡି ମେଲାନିଆ ଟ୍ରମ୍ପ ଏବଂ ଝିଅ ଇଭାଙ୍କା ଟ୍ରମ୍ପ ମଧ୍ୟ ଭାରତ ଗସ୍ତରେ ଆସିଛନ୍ତି । ଡୋନାଲ୍ଡ ଟ୍ରମ୍ପ ଅହମ୍ମଦାବାଦର ସାବରମତି ଆଶ୍ରମ ବୁଲିବା ସହ ଏଠାରେ ଥିବା ରାଷ୍ଟ୍ରପିତା ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ଉପରେ ପୁଷ୍ପମାଳ ଅର୍ପଣ କରିଥିଲେ । ଏବଂ ଏହାପରେ ମୋଟେରା ଷ୍ଟାଡିୟମରେ ଆୟୋଜିତ ନମସ୍ତେ ଟ୍ରମ୍ପ କାର‌୍ୟ୍ୟକ୍ରମରେ ସାମିଲ ହୋଇଥିଲେ ।