ଇଷ୍ଟକୋଷ୍ଟ ରେଲୱେରେ ଯାତ୍ରୀଙ୍କ ସୁରକ୍ଷା ପାଇଁ ଆସିଲା ‘ଡିଏସସି ଅର୍ଜୁନ’

ଭୁବନେଶ୍ୱର: ଇଷ୍ଟକୋଷ୍ଟ ରେଲୱେରେ ରେଳ ଷ୍ଟେସନ ଓ ଯାତ୍ରୀଙ୍କୁ ସୁରକ୍ଷା ଦେବ ଏଆଇ ସଞ୍ଚାଳିତ ରୋବୋଟ୍‌ । ଏହାର ନାମ ‘ଡିଏସସି ଅର୍ଜୁନ’ ରଖାଯାଇଛି । ଏହା ଅପରାଧୀଙ୍କୁ ଚିହ୍ନଟ କରିବ ୨୪ଘଣ୍ଟିଆ ଷ୍ଟେସନରେ ପାଟ୍ରୋଲିଂ କରିବ । AI ଦ୍ୱାରା ଭିଡ଼ ଉପରେ ନଜର ରଖାଯିବ । ଆଜି ମହାପ୍ରବନ୍ଧକ ପରମେଶ୍ୱର ଫଙ୍କୱାଲ ଏହାକୁ ଆନୁଷ୍ଠାନିକ ଭାବରେ ଉଦ୍‌ଘାଟନ କରିଛନ୍ତି ।

ବିଶାଖାପାଟଣା ପରେ ଏବେ ଓଡ଼ିଶାରେ ବି ରେଳ ଷ୍ଟେସନ ଓ ଯାତ୍ରୀଙ୍କୁ ସୁରକ୍ଷା ଦେବ ଏଆଇ ସଞ୍ଚାଳିତ ରୋବୋଟ୍‌ । ପ୍ରଥମ ପର୍ଯ୍ୟାୟରେ ଏହି ସ୍ମାର୍ଟ ହ୍ୟୁମାନଏଡ୍ ରୋବଟକୁ ବାହୁଡ଼ା ଯାତ୍ରା ପର୍ଯ୍ୟନ୍ତ ପୁରୀ ରେଲୱେ ଷ୍ଟେସନରେ ନିୟୋଜିତ କରାଯିବ । ପରବର୍ତ୍ତୀ ସମୟରେ ଏହାକୁ ଭୁବନେଶ୍ଵର ରେଲୱେ ଷ୍ଟେସନରେ ମୁତୟନ କରାଯିବ ।

ସୁରକ୍ଷା ଓ ନିରୀକ୍ଷଣ ପ୍ରକ୍ରିୟାକୁ ସୁଦୃଢ କରିବା ପାଇଁ ଆରପିଏଫ୍‌ ଦ୍ୱାରା ଏହି ହ୍ୟୁମାନୋଏଡ୍‌ ରୋବୋର୍ଟକୁ ବିକଶିତ କରାଯାଇଛି । ଏହା ଇଂରାଜୀ, ହିନ୍ଦୀ ଓ ତେଲୁଗୁ ଭାଷାରେ ସ୍ୱୟଂଚାଳିତ ଘୋଷଣା କରିବ । ଷ୍ଟେସନ ପରିସରରେ କୌଣସି ଅପରାଧୀ, ସନ୍ଦିଗ୍ଧ ଅପରାଧୀ କିମ୍ବା ସନ୍ଦେହଜନକ ପରିସ୍ଥିତି ଦେଖିଲେ ତୁରନ୍ତ ଫଟୋ ଉଠାଇ କଣ୍ଟ୍ରୋଲ୍‌ ରୁମ୍‌କୁ ସୂଚନା ଦେବ ।

ରେଳ ସୁରକ୍ଷା ବଳର କାର୍ଯ୍ୟକ୍ଷମତାକୁ ବହୁଗୁଣିତ କରିବା ଉଦ୍ଦେଶ୍ୟରେ DSC ARJUNକୁ ବିକଶିତ କରାଯାଇଛି। ଏହା ୨୪ ଘଣ୍ଟା ନିରନ୍ତର ନିରୀକ୍ଷଣ ଓ ବୁଦ୍ଧିମାନ ପର୍ଯ୍ୟବେକ୍ଷଣ କରିବାରେ ସକ୍ଷମ। ଏହାର ଉନ୍ନତ ବୈଶିଷ୍ଟ୍ୟଗୁଡ଼ିକ ମଧ୍ୟରେ AI-ଆଧାରିତ ମୁହଁ ଚିହ୍ନଟ (Facial Recognition), ବାସ୍ତବ ସମୟ ବା ଜନଗହଳି ବିଶ୍ଳେଷଣ (Real-time Crowd Analytics), ଯାତ୍ରୀ ସଂଖ୍ୟା ଗଣନା (Passenger Head Count), ଅସୁରକ୍ଷିତ ବ୍ୟାଗେଜ୍ ଚିହ୍ନଟ (Unattended Baggage Detection), ସନ୍ଦେହଜନକ କାର୍ଯ୍ୟକଳାପ ଚିହ୍ନଟ (Suspicious Activity Detection), ସାର୍ବଜନୀନ ଘୋଷଣା (Public Address Announcements), ଲାଇଭ୍ ଭିଡିଓ ଷ୍ଟ୍ରିମିଂ ଏବଂ ତତ୍କାଳ ସତର୍କ ସୂଚନା (Instant Alert Generation) ଅନ୍ତର୍ଭୁକ୍ତ। ଏହି ସମସ୍ତ କ୍ଷମତା ପରିସ୍ଥିତି ସମ୍ପର୍କିତ ସଚେତନତାକୁ ଯଥେଷ୍ଟ ବୃଦ୍ଧି କରିବା ସହ ସମୟୋପଯୋଗୀ ନିଷ୍ପତ୍ତି ଗ୍ରହଣରେ ସହାୟକ ହୋଇଥାଏ ଏବଂ ପ୍ରତିରୋଧାତ୍ମକ ଓ ପ୍ରମାଣ-ଭିତ୍ତିକ ନିରୀକ୍ଷଣକୁ ଆହୁରି ସୁଦୃଢ଼ କରିଥାଏ।

ଏହି ରୋବୋର୍ଟ ଟିକୁ ରେଳ ପ୍ଲାଟଫର୍ମ, ଷ୍ଟେସନ କନକୋର୍ସ, ଟିକେଟ୍ ବୁକିଂ କାଉଣ୍ଟର, ପ୍ରତୀକ୍ଷାଳୟ, ସର୍କୁଲେଟିଂ ଏରିଆ, ପାର୍କିଂ ସ୍ଥଳ, ପାର୍ସଲ୍ କାର୍ଯ୍ୟାଳୟ ଏବଂ ଅନ୍ୟାନ୍ୟ ସମ୍ବେଦନଶୀଳ ସ୍ଥାନରେ ମୁତୟନ କରାଯାଇପାରିବ। ନିରନ୍ତର ନିରୀକ୍ଷଣ ଏବଂ ବିଶ୍ଳେଷଣ ମାଧ୍ୟମରେ ଏହା ଅପରାଧ ନିରୋଧ, ବ୍ୟସ୍ତ ସମୟରେ ଯାତ୍ରୀ ଚଳାଚଳର ସୁପରିଚାଳନା, ରେଳ ସମ୍ପତ୍ତିର ସୁରକ୍ଷା ଏବଂ ଅଗ୍ନିକାଣ୍ଡ, ଚିକିତ୍ସା ଜନିତ ଜରୁରୀକାଳୀନ ପରିସ୍ଥିତି କିମ୍ବା ସୁରକ୍ଷା ସମ୍ବନ୍ଧୀୟ ଘଟଣା ଭଳି ଆପାତକାଳୀନ ସ୍ଥିତିରେ ଫଳପ୍ରଦ ପ୍ରତିକ୍ରିୟା ପ୍ରଦାନରେ ସହାୟକ ହେବ ।

“ପ୍ରଯୁକ୍ତିବିଦ୍ୟା ରେଳ ସୁରକ୍ଷାର ଭବିଷ୍ୟତକୁ ଏକ ନୂଆ ରୂପ ଦେଉଛି। “ଡିଏସସି ଅର୍ଜୁନ” ହେଉଛି ରେଳ ନିରୀକ୍ଷଣ ସହିତ ଆର୍ଟିଫିସିଆଲ୍ ଇଣ୍ଟେଲିଜେନ୍ସକୁ ସଂଯୋଜିତ କରି ଏକ ସ୍ମାର୍ଟ, ଅଧିକ ପ୍ରତିକ୍ରିୟାଶୀଳ ଏବଂ ପ୍ରଯୁକ୍ତିବିଦ୍ୟା-ସଞ୍ଚାଳିତ ସୁରକ୍ଷା ବ୍ୟବସ୍ଥା ଗଢ଼ିତୋଳିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହି ପ୍ଲାଟଫର୍ମ ରେଳ ସୁରକ୍ଷା ବଳ କର୍ମଚାରୀଙ୍କ କ୍ଷମତାକୁ ବୃଦ୍ଧି କରିବ, ପରିସ୍ଥିତି ସମ୍ପର୍କରେ ସଚେତନତା ସୁଦୃଢ଼ କରିବ, ସକ୍ରିୟ ସୁରକ୍ଷା ପରିଚାଳନାକୁ ସକ୍ଷମ କରିବ ଏବଂ ପୂର୍ବ ତଟ ରେଳପଥରେ ଯାତ୍ରୀଙ୍କ ବିଶ୍ୱାସକୁ ଆହୁରି ମଜବୁତ କରିବ।”

କୃତ୍ରିମ ବୁଦ୍ଧିମତ୍ତା ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସକୁ ରେଳ ସୁରକ୍ଷା ବଳ (RPF) କର୍ମଚାରୀଙ୍କର ବୃତ୍ତିଗତ ଦକ୍ଷତା ଓ ସତର୍କତା ସହ ସମନ୍ୱୟ କରି, ଏହି ପଦକ୍ଷେପ ଏକ ଅଧିକ ସୁରକ୍ଷିତ, ସ୍ମାର୍ଟ, ସୁଦୃଢ଼ ଏବଂ ଯାତ୍ରୀ-କୈନ୍ଦ୍ରିକ ରେଳ ବ୍ୟବସ୍ଥା ଗଠନ ଦିଗରେ ଆଉ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସୃଷ୍ଟି କରିଛି। ଏହା ଲକ୍ଷାଧିକ ଯାତ୍ରୀଙ୍କ ପାଇଁ ଅଧିକ ସୁରକ୍ଷିତ ରେଳ ଯାତ୍ରା ସୁନିଶ୍ଚିତ କରିବା ସହିତ ରେଳବାଇର ଗୁରୁତ୍ୱପୂର୍ଣ୍ଣ ଭିତ୍ତିଭୂମି ଓ ସମ୍ପତ୍ତିର ସୁରକ୍ଷାକୁ ମଧ୍ୟ ସୁଦୃଢ଼ କରିବ।