ପୁଣି ହାଜର ହୋଇ ପକ୍ଷ ରଖିବାକୁ ରାହୁଲ ଗାନ୍ଧୀଙ୍କୁ କହିଲା ଇଡି

ନୂଆଦିଲ୍ଲୀ: ନ୍ୟାସନାଲ ହେରାଲ୍ଡ ମାମଲାରେ ତୃତୀୟ ଦିନର ଜେରା ପରେ ଆଶା କରାଯାଉଥିଲା ଏହି ଦୁର୍ନୀତି ମାମଲାର ଅନ୍ୟତମ ଅଭିଯୁକ୍ତ ରାହୁଲ ଗାନ୍ଧୀଙ୍କୁ ଆଉ ପ୍ରବର୍ତନ ନିର୍ଦ୍ଦେଶାଳୟ ଆଉ ହାଜର ହେବାକୁ ଡକାଇନପାରେ । କିନ୍ତୁ ତୃତୀୟ ଦିନରେ ଦୀର୍ଘ 8 ଘଣ୍ଟା ଧରି ଜେରା କରିବା ପରେ ପୁଣି ଥରେ 17 ତାରିଖ ଇଡି ଅଫିସରେ ହାଜର ହେବାକୁ ରାହୁଲଙ୍କୁ କହିଛି ଇଡି ।

ରାହୁଲ ଗାନ୍ଧୀ (51) ଆଜି ଦିଲ୍ଲୀର ଏପିଜେ ଅବଦୁଲ କାଲାମ ରୋଡରେ ଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅଫିସରୁ ରାତି ପ୍ରାୟ ସାଢ଼େ 9ଟାରେ ବାହାରିଥିବା ସୂଚନା ରହିଛି। ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (ପିଏମ୍ଏଲ୍ଏ) ଅଧୀନରେ ଏକାଧିକ ସେସନରେ ତାଙ୍କର ବୟାନ ରେକର୍ଡ କରାଯାଇଛି। ବୁଧବାର ଇଡିର ଜେରାକୁ ସାମ୍ନା କରିବା ପରେ ସେ ତଦନ୍ତକାରୀଙ୍କୁ ପାଖାପାଖି 30 ଘଣ୍ଟା ସାମ୍ନା କରିଛନ୍ତି।

ଇଡି କାର୍ୟ୍ୟାଳୟକୁ ଯାଇଥିବା ରାସ୍ତାରେ ଦଳର ସମର୍ଥକମାନେ ବିରୋଧ ପ୍ରଦର୍ଶନ ଜାରି ରଖିଥିବାରୁ ଏହି ପୁରୁଣା ଦଳ ବିରୋଧୀ ନେତାଙ୍କ ବିରୋଧରେ ଇଡିର କାର୍ଯ୍ୟାନୁଷ୍ଠାନକୁ କେନ୍ଦ୍ରର ପ୍ରତିଶୋଧ ରାଜନୀତି ବୋଲି କହିଛି। ନ୍ୟାସନାଲ ହେରାଲ୍ଡର ମାଲିକାନାରେ ଥିବା କଂଗ୍ରେସ ଏବଂ ଏହି ଖବର କାଗଜକୁ ପ୍ରମୋଟ କରୁଥିବା ୟଙ୍ଗ ଇଣ୍ଡିଆନ ପ୍ରାଇଭେଟ ଲିମିଟେଡର ଆର୍ଥିକ ଅନିୟମିତତା ନେଇ ତଦନ୍ତ ଚାଲିଛି। ଏହି ଖବରକାଗଜଟି ଆସୋସିଏଟେଡ୍ ଜର୍ଣ୍ଣାଲ ଲିମିଟେଡ୍ (ଏଜେଏଲ୍) ଦ୍ୱାରା ପ୍ରକାଶିତ ଏବଂ ୟଙ୍ଗ୍ ଇଣ୍ଡିଆନ ମାଲିକାନାରେ ରହିଛି ।

ଏହାରି ଭିତରେ କଂଗ୍ରେସ ଅଭିଯୋଗ କରିଛି ଯେ ଦିଲ୍ଲୀ ପୋଲିସ କର୍ମଚାରୀମାନେ ବୁଧବାର କଂଗ୍ରେସ ଅଫିସରେ ଜବରଦସ୍ତ ପ୍ରବେଶ କରି ଦଳୀୟ କର୍ମୀ ଏବଂ ନେତାଙ୍କୁ ମାଡ଼ ମାରିଛନ୍ତି । ରାହୁଲ ଗାନ୍ଧୀଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଲଗାତାର ତୃତୀୟ ଦିନରେ ଜେରା କରିବା ପ୍ରତିବାଦରେ ଆଜି ଦଳ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି। ସଚିନ ପାଇଲଟ୍, ବି. ଭି. ଶ୍ରୀନିବାସଙ୍କ ସମେତ ଦଳର ବହୁ ବରିଷ୍ଠ ନେତାଙ୍କୁ ଆଜି ଦିନ ତମାମ ପୋଲିସ ଅଟକ ରଖିଥିଲା।